ފޮއްދޫ ކައުންސިލުން އެރަށުގެ ތަރައްޤީއަށް ބޭނުންވާ ކަންކަމާ ގުޅޭގޮތުން ރައީސްއާއި މަޝްވަރާކުރައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ނ. އަތޮޅަށް މިހާރުކުރައްވަމުން ގެންދަވާ ދަތުރުފުޅުގައި ފޮއްދޫ ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވައި އެރަށު ރައްޔިތުންނަށް އެންމެ މުހިންމު ކަންކަމާ ގުޅޭގޮތުން މަޝްވަރާކުރައްވައިފި އެވެ.

މިލަދުންމަޑުލު ދެކުނުބުރީ ފޮއްދޫ ކައުންސިލް އިދާރާގައި ކުރިއަށްދިޔަ މި ބައްދަލުކުރެއްވުމުގައި، ކައުންސިލްގެ ފަރާތުން ވަނީ ރަށުގެ ތަރައްޤީއާއި ގުޅޭ ކަންކަން ރައީސްއާއި ހިއްސާކުރައްވާފަ އެވެ.

އެގޮތުން ފޮއްދޫ ކައުންސިލްގެ ފަރާތުން ފާހަގަކުރެއްވި ކަންކަމުގެ ތެރޭގައި އެ ރަށުގައި މިހާރު ތަރައްޤީކުރަންފަށާ ބަނދަރަށް ގެންނަން ބޭނުންވާ ބައެއް ބަދަލުތަކާއި ސްކޫލްގެ މަލްޓިޕަރޕަސް ހޯލުގެ މުހިންމުކަމާއި ސްކޫލަށް އިތުރު މުވައްޒަފުން ހޯދުމާއި ގުޅޭގޮތުން ވަނީ މަޝްވަރާކުރައްވާފަ އެވެ.

އަދި ހަމައެހެންމެ، ރަށުގެ ބައު އިންޖީނުގެ ހުރި ބިން އަނބުރާ ކައުންސިލާއި ހަވާލުކޮށްދެއްވުމަށް ކައުންސިލުން ވަނީ ރައީސްގެ އަރިހުން އެދިވަދައިގެންފަ އެވެ. މީގެ އިތުރުން ރަށުގެ ކުނި މެނޭޖްކުރުމުގެ މަސައްކަތުގައި ހުރި ގޮންޖެހުންތައް ހައްލުކުރުމަށް މި ބައްދަލުކުރެއްވުމުގައި މަޝްވަރާކުރެވުނެވެ.

މީގެ އިތުރުން އެރަށުގެ އ.ތ.މ ކޮމިޓީއިން ވަނީ ރަށް ސާފުކުރުމަށް ބޮޑު ސަރަހައްދެއް އޮންނައިރު އެކަނބަލުންނަށް ލިބޭ އުޖޫރައިގެ ދަތިކަމުގެ އިތުރުން ރަށުގެ ފުޓްސަލް ދަނޑު ކުޑަވުމުން، ދަނޑު ބޮޑުކުރަން ބޭނުންވާކަން ހިއްސާކުރައްވާފައިވާކަން ފާހަގަކޮށްލަންޖެހެ އެވެ. މީގެއިތުރުން ރަށުގެ ޞިއްޙީ ހާލަތު އިތުރަށް ރަނގަޅުކުރުމަށް ސަރުކާރުން ކުރައްވަމުންދާ މަސައްކަތުގެ ތެރެއިން އެ ރަށުގައި ޕޮއިންޓް އޮފް ކެއަރ ގާއިމުކުރުމާބެހޭގޮތުން މަޝްވަރާކުރައްވާފައިވެއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލާއި، އ.ތ.މ ކޮމެޓީން ފާހާގަކުރެއްވި ކަންކަން ބައްލަވާނެކަމުގައި ވިދާޅުވެފަ އެވެ. އަދި ބައްދަލަކުރެއްވުމުގައި ބައިވެރިވެވަޑައިގެންނެވި ވަޒީރުންނާއި، ދަޢުލަތުގެ ކުންފުނިތަކުގެ ވެރިން މެދުވެރިކުރައްވައި އެ މަނިކުފާނު ވަނީ އެރަށުގައި ކުރިއަށްދާ މަޝްރޫޢުތަކުގެ އަދާހަމަ މަޢުލޫމާތު ވަނީ ޙިއްޞާކުރައްވާފަ އެވެ.