އެމްއެމްޕީއާރުސީގެ ވައްކަންތައް ބެލުމުގެ ބަދަލުގައި އެމްޑީޕީން ހެދީ ޑީލް: ސައީދު

ޕީޕީއެމް ވެރިކަމުގައި ދައުލަތް ލޫޓުވައި، ވައްކަންކުރުން ހައްދުން ނައްޓައިފިކަމަށް ބުނެ، އެމްޑީޕީން ވެރިކަމަށްއައިސް އެންމެފަހުން ފެނިގެންދިޔައީ އެމްއެމްޕީއާރުސީ ހިޔާނާތުގެ ބައިވެރިންނާއެކު ޑީލްހެއްދެވި މަންޒަރުކަމަށް، މި ސަރުކާރުގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

އޮޑިޓަރ ޖެނެރަލް ނެރުއްވި ފެނަކަ ކުންފުނީގެ އޮޑިޓް ރިޕޯޓާ ގުޅޭގޮތުން ދައުލަތުގެ މީޑިއާގައި މިރޭ ވާހަކަދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، ދައުލަތް ލޫޓުވުމުގެ ވާހަކަ އެމްޑީޕީން ދައްކާއިރު، އެޕާޓީގެ ވެރިކަމުގައި އަމަލުތައް ފެނިގެންދިޔައީ ދިމާއިދިކޮޅަށް ކަމަށެވެ. އެގޮތުން އެމްއެމްޕީއާރުސީގެ ހިޔާނާތް ބަލާނޭކަމަށް ވެރިކަމަށް އައި ޕާޓީގެ ފަރާތުން ފެނިގެންދިޔައީ މުޅިން އެހެން މަންޒަރެއްކަމަށް މިނިސްޓަރު ފާހަގަކުރެއްވިއެވެ.

ވެރިކަމަށް އައުމުގެ ކުރިން އެމްޑީޕީން އެންމެ އަޑުހަރުކޮށް ދެއްކި އެއް ވާހަކައަކީ އެމްއެމްޕީއާރުސީގެ ހިޔާނާތުގެ ވާހަކަ ކަމަށާއި، ރައްޔިތުން މަޖިލީހުގެ ސުޕަ މެޖޯރިޓީ އޮވެ، ރައީސް ސޯލިހުގެ ފަސް އަހަރުގެ ވެރިކަން ނިމިގެންދިޔައިރު، ވައްކަމުގެ އެއްވެސް މައްސަލައެއް ބެލިފައިނުވާކަމަށް ސައީދު ވިދާޅުވިއެވެ.

ރައީސް އިބްރާހީމް ޞާލިހު އަތްޕުޅުގައި ހުރިހާ ބާރެއް ޖަމާކޮށްފައި އޮތް އިނގޭތޯ އެންމެ މައްސަލައެއް ވެސް ބެލުނުތޯ. އެމްއެމްޕީއާރުސީގެ މައްސަލަ ބެލުމުގެ ބަދަލުގައި ޑީލެއްގެ ތެރެއިން އެކަން ދިޔައީ ނޫންތޯ އޮއްބާލައިގެން. އޭރު އެ ބޭފުޅުން އަތްޕުޅު ނޫންތޯ ހުރިހާ ބާރެއް އޮތީ އެހެންވީމާ ތަނެއް ލޫޓުވުން ނުވަތަ ތަނެއް ވައްކަން ގިނަވެގެން ކަންބޮޑުވެގެން އަންނަ ބަޔަކު އައިސް އެންމެ ފުރަތަމަ ބަލަންޖެހޭ ކަންތައްތައް ނުބަލައެއް ނޫންތޯ.

މިނިސްޓަރު ސައީދު ވިދާޅުވިއެވެ

ސައީދު ވިދާޅުވީ އެމްޑީޕީ ވެރިކަމުގައި ފެނަކައިގެ ތެރޭގައި އުސޫލާ ހިލާފަށް ހިނގާދިޔަ ކަންކަމުގެ ވާހަކަ އޭސީސީ ފަދަ ކަމާބެހޭ މިނިވަން މުއައްސަސާތަކުން ދެއްކިނަމަވެސް އެ މައްސަލަތައް ބެލިފައިނުވާކަމަށެވެ. މި ސަރުކާރުން މިނިވަން މުއައްސަސާތަކަށް ނުފޫޒު ނުފޯރުވާނޭ ކަމަށާއި، މިއަދު އެ މުއައްސަސާތަކުން ހިޔާނާތާގުޅޭ މައްސަލަތައް މިނިވަންކަމާއެކު ބަލަމުންދާކަން މިނިސްޓަރު ފާހަގަކުރެއްވިއެވެ.

އެމްޑީޕީ ވެރިކަމުގައި އެމްއެމްޕީއާރުސީ ހިޔާނާތުގެ މައްސަލަ ބެލުމުގެ ބަދަލުގައި ޑީލް ހެއްދެވިކަމަށް ސައީދު ވިދާޅުވިއިރު، އެމްއެމްޕީއާރުސީ ހިޔާނާތުގެ މައްސަލާގައި ކޯޓުން ހުކުމްކުރި ކުރީގެ ނައިބުރައީސް އަހުމަދު އަދީބު އާއި އެމްއެމްޕީއާރުސީގެ މެނޭޖިންގ ޑިރެކްޓަރު ޢަބްދުﷲ ޒިޔަތަށް ރައީސް ސޯލިހުގެ ވެރިކަމުގައި އެމަނިކްފާނު ވަނީ އެބޭފުޅުންގެ އަދަބު ލުއިކޮށްދެއްވައި މައާފްދެއްވާފައެވެ.