ހަމާސްގެ ލީޑަރު، ޔަހްޔާ ސިންވާރު އެންމެ ފަހު ނޭވާ ދޫކޮށްލެއްވީ ޖިހާދުގެ މައިދާނުގައި!

ފަލަސްތީނުގެ މިނިވަންކަމަށް ކެނޑިނޭޅި މަސައްކަތް ކުރަމުންދިޔަ ހަމާސް ގެ ލީޑަރު، ޔަހްޔާ ސިންވާރު އަވަހާރަކޮށްލާފައިވާކަން ހަމާސް އިން ކަށަވަރުކޮށްދީފިއެވެ.

ހަމާސްއިން ޣައްޒާގައި ހަރަކާތްތެރިވާ އެންމެ އިސް ފަރާތްކަމަށްވާ ޚަލީލް ހައްޔާ ވިދާޅުވީ، އުމުރުފުޅުން 62 އަހަރުގެ ސިންވާރަކީ ޖެހިލުންކުޑަ ހިތްވަރުގަދަ ލީޑަރެއްކަމަށާއި، ފަލަސްތީނަށްޓަކައި، އޭނާގެ ފުރާނަ ގުރުބާން ކޮށްފައިވާކަމަށެވެ.

ފަލަސްތީނުގެ އަލް އަޤްޞާ ޓީވީ މެދުވެރިކޮށް ހައްޔާ ފޮނުއްވި ވީޑިއޯ މެސެޖެއްގައި ވިދާޅުވީ، ސިންވާރު، އެބޭފުޅާގެ އެންމެ ފަހު ވަގުތުވެސް ހުންނެވީ ހިތްވަރުގަދަކަމާއި އެކު ޔަހޫދީ ފައުޖާއި ދެކޮޅަށް ހަމަލާދިނުމުގައި ސާބިތުވެވަޑައިގެންކަމަށެވެ.

ސިންވާރު ޝަހީދުކޮށްލި ނަމަވެސް، ހަމާސް ފަހަތަށް ނުޖެހޭނެކަމަށާއި، ޤުދުސް އަކީ ފަލަސްތީނުގެ ވެރިރަށް ގޮތުގައި ހަމަޖެހެންދެން ހަމާސް އިން އިސްރާއީލާއި ދެކޮޅަށް ޖިހާދު ކުރާނެކަމުގެ ޔަގީންކަން ހައްޔާ ދެއްވިއެވެ.

މީގެ އިތުރުންވެސް، ހައްޔާ ވިދާޅުވީ، ޔަހޫދީން ފައުޖުން ޣައްޒާގައި ހިންގަމުންދާ އުދުވާން ހުއްޓާނުލާހާ ހިނދަކު، ހަމާސްގެ ބެލުމުގެ ދަށުގައިވާ އިޒްރާއީލަށް ނިސްބަތްވާ މީހުން ދޫކޮށްނުލާނެ ކަމަށެވެ.

ޔަހޫދީ ފައުޖުން ވަނީ ސިންވާރު އަވަހާރަކޮށްލުމުގެ ކުރިން ނަގާފައިވާ ޑްރޯން ފޫޓޭޖެއް އާއްމުކޮށްފައެވެ. އެމީހުންގެ ބޭނުމަކަށްވީ، ސިންވާރަށް މުސްލިމުންނާއި ފަލަސްތީނުގެ ރައްޔިތުން ކުރާ ޤަދަރު ކަނޑުވައިލުމެވެ.

އެހެންނަމަވެސް، ސިންވާރު އެންމެ ފަހު ވަގުތުކޮޅުވެސް ދެއްކެވި ހިތްވަރަށް އެތައް ބަޔަކު އަންނަނީ ތައުރީފުކޮށް، އެބޭފުޅާގެ މަތިވެރި ޖިހާދުން ހިތްވަރު ލިބިގަންނަމުންނެވެ.

އެ ވީޑިއޯ ފޫޓޭޖުން ފެންނަ ގޮތުގައި، ވަރަށް ބޮޑަށް ހަލާކުވެފައިވާ އިމާރާތެއްގެ ސޯފާގައި އިންވާރު އިށީދެވަޑައިގެން އިންނެވިއިރު، އެއް އަތް ވަރަށް ބޮޑަށް ޒަހަމްވެފައިވާކަން އެނގެއެވެ.

ސިންވާރަށް އަމާޒުކޮށް ޔަހޫދީން ހަމާދިނުމުގެ ކުރިން އަތުގައި އޮތް ލަކުޑިބުރިއެއް ޑްރޯންއާއި ދިމާލަށް އެއްލާ މަންޒަރުވެސް ފެނިގެންދެއެވެ.

ސިންވާރު ހަމާސްގެ ލީޑަރަކަށް އައްޔަނުކުރެވުނީ، މީގެ ކުރިން އެމަގާމު ފުރުއްވަމުން ދިޔަ އިސްމާއީލް ހަނިއްޔާ އަށް މިއަހަރުގެ އޮގަސްޓް މަހުގެ 6 ވަނަ ދުވަހު އިސްރާއީލުން ހަމަލާދީ އަވަހާރަކޮށްލުމާއި ގުޅިގެންނެވެ.