ވައިގަދަވެ ބޯކޮށް ވާރޭވެހޭނެ ކަަމަށް ލަފާކޮށް ބޮޑު ސަރަހައްދަކަށް ހުދު ސަމާލު ނެރެފި

ވައިގަދަވެ ބޯކޮށް ވާރޭވެހޭނެ ކަަމަށް ލަފާކޮށް ރާއްޖޭގެ ބޮޑު ސަރަހައްދަކަށް ހުދު ސަމާލު ނެރެފިއެވެ.

މޫސުމާބެހޭ ގައުމީ އިދާރާ، މެޓް އޮފީހުން ހުދު ސަމާލު ނެރެފައިވަނީ ނ އަތޮޅުން ލ އަތޮޅަށެވެ.

އެސަރަހައްދަށް ހުދު ސަމާލު ނެރެފައިވަނީ ހެނދުނު 8:15 އިން މެންދުރު 14:00 އަށެވެ.

މެޓް އޮފީހުން ލަފާކުރާ ގޮތުގައި މިވަގުތުތަކުގައި އެ ސަރަހައްދަށް ބޯކޮށްވާރޭވެހުމާއެކު ގުގުރުން އެކަށީގެންވެއެވެ. އަދި ވިލާގަނޑުގައި ގާތްގަނޑަކަށް 35 މޭލަށް ވައިގަދަވާނެއެވެ.

މިއަދު ހަވީރު 6:00 އާ ހަމައަށް މޫސުން ލަފާކޮށް މެޓް އޮފީހުން ބުނީ މެދުރާއްޖެތެރެއާއި އުތުރަށް ބޯކޮށްވާރޭވެހުމާއެކު ގުގުރާނެ ކަމަށެވެ. އަދި ދެކުނަށް ކެރީގެ އަސަރު ކުރާނެ ކަމަށެވެ.

އަދި ރާއްޖޭގެ ހުރިހާ ސަރަހައްދަކަށްވެސް ކަނޑުތައް އާދައިގެ ވަރަކަށް ކަނޑުތައް ގަދަވެފައި ވިލާގަނޑުގައިވެސް ގަދަވާނެ ކަމަށް ލަފާކޮށްފައިވެއެވެ.