އެމްޑީޕީގެ ރައީސާއި ނައިބު ރައީސްގެ މަގާމު އާ އަސާސީ ގަވާއިދުން އުވައިލަނީ

މިރޭ ފެށުމަށް ހަމަޖެހިފައިވާ އެމްޑީޕީގެ ކޮންގްރެސްއަށް ހުށަހެޅުމަށް ތައްޔާރުކޮށްފައިވާ އާ އަސާސީ ގަވާއިދުގައި އެ ޕާޓީގެ ރައީސާއި ނައިބު ރައީސްގެ މަގާމު އުވައިލުމަށް ހިމަނައިފިއެވެ.

އާ ގަވާއިދުގައި ކަނޑައަޅާފައިވާ ގޮތުން ޕާޓީގެ އެންމެ އިސް ފަރާތެއްގެ ގޮތުގައި ދެން ހުންނާނީ ޗެއާޕާސަނެވެ. ޗެއާޕާސަނާއި އެ މަގާމުގެ ނައިބުންގެ ދަށަށް ޕާޓީ ހިންގުމުގެ އެންމެހައި މަސްއޫލިއްޔަތުތައް ބަދަލުވާނެއެވެ. ރައީސާއި ނައިބު ރައީސް ތިބެފައި ޗެއާޕާސަނެއް ވެސް ހުންނާތީ ޒިންމާތައް ފުށުއެރުމުގެ މައްސަލަތައް ކުރިން ވެސް ވަނީ ދިމާވެފައެވެ.

މީގެ އިތުރުން މިހާރު ޢަމަލުކުރާ ގަވާއިދުގައި އެމްޑީޕީއަށް ނިސްބަތްވާ ރައީސުލްޖުމްހޫރިއްޔާއެއް ހުންނެވި ހާލަތުގައި ޕާޓީގެ އެންމެ އިސް ފަރާތަކީ އެ ބޭފުޅާ ކަމަށް ބުނާ މާއްދާ ވެސް އާ ގަވާއިދުގައި ހިމެނިފައެއް ނުވެއެވެ.

އާ ގަވާއިދު ފާސްކުރުމަށް އެޖެންޑާ ކޮށްފައި ވަނީ އަންނަ ހޮނިހިރު ދުވަހަށެވެ.

ރައީސާއި ނާއިބު ރައީސްގެ މަގާމު އުވާލަން ނިންމާފައިވާއިރު، އެ ދެ މަގާމު ވެސް މިހާރު އޮތީ ހުސްކޮށެވެ. ރައީސްގެ މަގާމު އެންމެ ފަހުން ފުރުއްވި ޢަބްދުالله ޝާހިދު، ޕާޓީގެ ރިޔާސީ ޕްރައިމަރީގައި ވާދަކުރެއްވުމަށް މަގާމުން އިސްތިއުފާ ދެއްވިއިރު، ނައިބު ރައީސް ކަމުގައި ހުންނެވި ހިސާން ޙުސައިން ވެސް އެ ކެމްޕެއިންގައި ޢަމަލީ ގޮތުން ބައިވެރިވެވަޑައިގަތުމަށްޓަކައި އިސްތިއުފާ ދެއްވީއެވެ.