މާލެ ވެޓް މާކެޓް މަޝްރޫއު: ބިން ހަވާލުކޮށްދޭން އެދި ހަތަރު ސިޓީ، ކައުންސިލުން ދައްކަނީ ބަހަނާ

މާލެ ވެޓް މާކެޓް މަޝްރޫޢު ފެށުމަށް ބިން ހަވާލުކޮށްދޭން އެދި މާލެސިޓީ ކައުންސިލްގައި ތަކުރާރުކޮށް އެދެމުން ވެސް އެކަމަށް ދެކޮޅު ހަދާފައިވާ ކަމަށް މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުން ބުނެފި އެވެ.

އެ މިނިސްޓްރީން މިއަދު އެ މަޝްރޫއުއާ ގުޅޭގޮތުން މާލެ ސިޓީ ކައުންސިލުން އާންމުންނަށް އޮޅޭގޮތަށް މަޢުލޫމާތު ހާމަކުރާ ކަމަށް ބުނެ ބަޔާނެއް ނެރެފަ އެވެ.

އެ ބަޔާނުގައި ބުނީ މާލޭގެ މާރުކޭޓްތަކުގެ އިންފްރާސްޓްރަކްޗަރ ޒަމާނީ ފެންވަރަށް ތަރައްޤީކޮށް އާންމުންނާއި ވިޔަފާރިވެރީންނަށް ބޭނުންވާ އެންމެހައި ވަސީލަތްތައް ފޯރުކޮށްދިނުމަށް ސަރުކާރުން ކުރިއަށްގެންދާ މި މަޝްރޫޢުއަކީ، ކޮންޓްރެކްޓަރ ފައިނޭންސް އުސޫލުން ކުރިއަށް ގެންދިއުމަށް ޓްރަސްޓެންޑް މޯލްޑިވްސް ޕްރައިވެޓް ލިމިޑެޓާއި ހަވާލުކޮށްފައިވާ މަޝްރޫޢުއެއް ކަމަށާ މި މަޝްރޫޢުގެ އެއްބަސްވުމުގައި ސޮއިކުރުމަށް ފަހު، ކޮންޓްރެކްޓަރާ މަސައްކަތުގެ ސައިޓް ހަވާލުކުރުމަށްޓަކައި އެ ސަރަޙައްދުގެ ބިން މިނިސްޓްރީއާ ހަވާލުކޮށް ދިނުމަށް އެދި މާރޗް 29، 2026 ގައި މަޝްރޫޢުގެ ތަފްސީލީ ކުރެހުންތަކާއެކު މާލޭ ސިޓީ ކައުންސިލަށް ހުށައަޅާފައިވާ ކަަމަށެވެ.

އެ ސިޓީއަށް އެއްވެސް ޖަވާބެއް ލިބިފައިނުވާތީ މިހާރުގެ ލޯކަލް މާރުކޭޓް ހުރި އިމާރާތް ހުސްކުުރުމަށް ފަހު އޭޕްރީލް 18، 2026 ގެ ކުރީން ބިން ހަވާލުކޮށްދިނުމަށް އެދި އޭޕްރީލް 12، 2026 ގައި ދެވަނަ ފަހަރަށް ސިޓީ ކައުންސިލްގައި ވަނީ އެދިފަ އެވެ.

މި ސިޓީއަށް ވެސް ކައުންސިލުން ޖަވާބެއް ނުދިން ކަމަށާ ނަމަވެސް އެއްބަސްވުމުގެ ދަށުން ބިން ހަވާލުކޮށްދިނުމަށް ކޮންޓްރެކްޓަރުގެ ފަރާތުން މިނިސްޓްރީގައި ތަކުރާރުކޮށް އެދެމުންދާތީ މެއި 7، 2026 ގެ ކުރީން ހަވާލުކޮށް ދިނުމަށް އެދި މެއި 3، 2026 ގައި އިތުރު ސިޓީއެއް ފޮނުވާފައިވާ ކަމަށް މިނިސްޓްރީން ބުންޏެވެ. އެހެން ނަމަވެސް އެ މުއްދަތުގައިވެސް ބިން ހަވާލުކޮށްފައިނުވާތީ މެއި 31، 2026 ގެ ކުރީން ބިން ހަވާލުކުރުމުގެ ކަންކަން ނިންމައިދިނުމަށް އެދި މެއި 18، 2026 ގައި މިނިސްޓްރީން ވަނީ އިތުރު ސިޓީއެއް ފޮނުވާފަ އެވެ.

މިނިސްޓްރީން ބުނީ އޭގެ ފަހުން ކައުންސިލުން ވަނީ އެ ބިން ހަވާލުކުރެވެން ނެތް ކަމަށް ބަޔާންކޮށް މިނިސްޓްރީއަށް އަންގާފައި ކަމަށާ ސަބަބެއްގެ ގޮތުގައި ފާހަގަކޮށްފައިވަނީ މާޗް 9، 2023 ގައި އެ ކައުންސިލާއި ހައިރު އިންޖިނިއަރިންގ ކޮންސަލްޓަންސީ ޕްރައިވެޓް ލިމިޑެޓާ ދެމެދު ވެވުނު އެއްބަަސްވުމެއްގެ ދަށުން، މަސްމާރުކޭޓް ސަރަޙައްދު ތަރައްޤީކުރުން އެ ކުންފުންޏާއި ހަވާލުކޮށްފައިވުން ކަމަށް ބަޔާންކޮށްފައިވާ ކަމަށެވެ.

އަދި ބިން ހަވާލުކުރެވޭނީ އެއްބަަސްވުމުގައިވާ ގޮތުގެ މަތީން އެ އެއްބަސްބުން ބާތިލުކުރުމަށް ފަހު ކަމަށްވެސް ބުނެފައިވެ އެވެ.

ނަމަވެސް މިނިސްޓްރީން ބުނީ އެ މިނިސްޓްރީއަށް މަޢުލޫމާތު ލިބިފައިވާ ގޮތުގައި އެއްވެސް ބަދަލާއި ނުލައި އެއްބަސްވުން ބާތިލުކުރުމަށް ހައިރު އިންޖިނިއަރިންގ ކޮންސަލްޓަންސީ ޕްރައިވެޓް ލިމިޑެޓުން ވަނީ ކައުންސިލަށް ސިޓީވެސް ފޮނުވާފައި ކަމަށާ ނަމަވެސް މިއަދާ ހަމައަށް ވެސް އެ އެއްބަސްވުން އުވާލުމުގެ މަސައްކަތް ކައުންސިލުން ކޮށްފައިނުވާ ކަަމަށެވެ.

ވެޓް މާކެޓް ކޮމްޕްލެކްސް ތަރައްޤީ ކުރުމުގެ މަޝްރޫޢު ސަރުކާރުން ކުރިއަށް ގެންދަނީ މާލެ ސިޓީ ކައުންސިލުން ޕްލޭން ކޮށްފައިވާ ޑިޒައިނާ އެއްގޮތަށް ކަން ފާހަގަކޮށް މިނިސްޓްރީން ބުނީ އެ ކައުންސިލުން މަޝްރޫޢު ކުރިއަށް ގެންދިއުމުގެ ގޮތުން އެއްވެސް ކަމެއް ނުކޮށް އޮތުމުން ރައްޔިތުންނަށް ދިމާވާ ދަތިތަކަށް ހައްލެއް ހޯދާ ދިނުމަކީ ސަރުކާރުން ކޮށްދޭންޖެހޭ ކަމެއް ކަމުގައި ދެކޭ ކަމަށެވެ.

އެގޮތުން މާލެސިޓީ ކައުންސުލުން މަޝްރޫޢު ހަވާލުކޮށްފައިވާ ކުންފުނިން ވަގުތީ ގޮޅިތައް ހެދުން ފިޔަވާ އަމަލީ އެއްވެސް މަސައްކަތެއްކޮށްފައިނުވާތީ އެ މަޝްރޫޢުގެ އެއްބަސްވުން ބާތިލުކުރުމަކީ އެކަމުގައި އެއްވެސް ހުރަހެއް އޮތް ކަމެއް ކަމުގައި މިނިސްޓްރީން ނުދެކޭ ކަމަށާ އަދި އެ އެއްބަސްވުން ބާތިލުކުރި ނަމަވެސް އެ ބިން ސަރުކާރާއި ހަވާލުކުރުމަށް ހުރަހެއް އޮތް ކަަމަށް ނުދެކޭ ކަމަށް މިނިސްޓްރީން ބުނެ އެވެ.

މިނިސްޓްރީން ބުނި ގޮތުގައި މި ކަމުގައި މާލެ ސިޓީ ކައުންސިލުން މިއަދާ ހަމައަށްވެސް ބިން ހަވާލުނުކޮށް އޮތުމަކީ އާންމު ރައްޔިތުންގެ ލާބައާ މަންފާއަށްވުރެ ބޮޑަށް ސިޔާސީ މަސްލަހަތު އިސްކޮށްގެން އެ ކައުންސިލުން ކުރަމުންދާ ކަމެއް ކަމަށެވެ.

މި މަޝްރޫޢުގެ އިދާރީ ކަންކަމާއި ފައިނޭންސް ހަމަޖެހި، ކޮންޓްރެކްޓަރު ވެސް ޢަމަލީ މަސައްކަތް ފެށުމަށް ފުރިހަމައަށް ތައްޔާރުވެފައިވީނަމަވެސް، މި މަސައްކަތް ނުފެށި އޮތް ހަމައެކަނި ސަބަބަކީ މަޝްރޫޢު ހިންގުމަށް ކަނޑައަޅާފައިވާ ބިން ހުސްކޮށް މިނިސްޓްރީއާ ހަވާލުކޮށްފައިނުވުން ކަމުގައި މިނިސްޓްރީން ބުނެ އެވެ.

އަދި ބުނީ 600 ދުވަހުގެ ތެރޭގައި އެންމެގައި މަސައްކަތްތައް ނިންމުމަށް ކަނޑައަޅާފައިވާ މި މަޝްރޫޢުއަކީ މާލޭގެ ރައްޔިތުންނަށް ނުހަނު ބޭނުންތެރި މަޝްރޫޢުއެއް ކަމަށާ އެހެން ކަމުން މި މަސައްކަތް ލަސްވާ ކޮންމެ ދުވަަހަކީ މަޝްރޫޢުގެ އަގު ބޮޑުވެ، ރައްޔިތުންނަށް ލިބެންޖެހޭ ޚިދުމަތްތަކުން މަޙްރޫމްވާނެ ކަމެއް ކަމަށެވެ.