މުޢިއްޒުފަދަ އިޚްލާސްތެރި، ތާހިރުކޮށް ވެރިކަން ކުރައްވާ ބޭފުޅަކު އަދި ނުދެކެން: ގާސިމް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަދައިން އިހްލާސްތެރިކަމާއެކު އަދި ތާހިރުކޮށް ވެރިކަން ކުރައްވާ ބޭފުޅަކު 2008 ވަނަ އަހަރުގެ ފަހުން ގައުމު ދެކެފައިނުވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެމަނިކުފާނު ނިސްބަތްވާ މާމިގިލީގައި މިރޭ އޮތް ޖަލްސާގައި ވާހަކަފުޅު ދައްކަވަމުންނެވެ. އެ ރަށުގެ ރައްޔިތުންނާއި ރައީސުލްޖުމްހޫރިއްޔާ ބައްދަލުކުރެއްވުމަށް ބޭއްވެވި ޖަލްސާގައި ގާސިމް ވިދާޅުވީ ރައީސް މުޢިއްޒު ފަދައިން އިހްލާސްތެރިކަމާއެކު ވެރިކަން ކުރައްވާ ދެވަަނަ ރައީސަކު އަދި ދެކެވަޑައިނުގަންނަވާ ކަމަށެވެ.

އެ ވާހަކަ ވިދާޅުވަނީ ހުޝާމަދު ކުރެއްވުމަށް ނޫން ކަމަށާ އަދި ރައީސްގެ ޕާޓީ ބޭފުޅަކަށް ވެގެން ނޫން ކަމަށްވެސް ވިދާޅުވި އެވެ. އަދި ވިދާޅުވީ ގާސިމް ވިދާޅުވާ ވާހަކަ އަކީ "ތެދުކަން" ހަގީގަތް ގަބޫލުކުރާ ކޮންމެ ރައްޔިތަކުވެސް ގަބޫލުކުރާނެ ކަމަށެވެ.

"މިހާތަނަށް އަޅުގަނޑު ނުދެކެމޭ 2008 ވަނަ އަހަރުން ފެށިގެން ދިވެހިރާއްޖޭގެ ރައީސުލްޖުމްހޫރިއްޔާކަން ކުރެއްވި އެއްވެސް ބޭފުޅަކު ތިހާ އިޚްލާސްތެރިކޮށް -- ޑރ. މުހައްމަދު މުޢިއްޒުއަށް ވުރެ އިޚްލާސްތެރިކަމާއެކު ރައީސުލްޖުމްހޫރިއްޔާ ކަމުގެ މަގާމު މިހާތަނަށް އަދާކުރައްވާ ބޭފުޅެއް އަޅުގަނޑު ނުދެކޭ," ގާސިމް ވިދާޅުވި އެވެ.

މިރޭގެ ޖަލްސާގައި ގާސިމް ވަނީ އެހެން ރައީސުންނާއި ރައީސް މުޢިއްޒުގެ ތަފާތުތައް ވިދާޅުވެ ދެއްވާފަ އެވެ. ވިދާޅުވީ ރައީސް މުއިއްޒު, އެއްވެސް ބޭފުޅަކަށް ކުޑައިމީސްކޮށް އެއްޗެއް ވިދާޅުވާ އަޑު ނާއްސަވާ ކަމަށެވެ. އަދި ސިޔާސީ ލީޑަރުން ދަމާ ކޫއްތާފައި ގެންގޮސް ޖަލަށް ނުލައްވާ ކަމަށެވެ.

ނަމަވެސް ނިމިގެންދިޔަ ތިން ވެރިކަމުގައި ސުޕްރީމް ކޯޓްގައި ތަޅު އަޅުވާ ފަނޑިޔާރުން ހައްޔަރު ކުރި މަންޒަރުފެނުނު ކަމަށް ވިދާޅުވި އެވެ. މިދިޔަ ވެރިކަންތަކުގައި އެތައް ފަނޑިޔާރަކު ވަކި ކުރެއްވި ކަަމަށާ އެއް ވެރިކަމުގައި ކްރިމިނަލް ކޯޓްގެ އޭރުގެ އިސް ގާޒީ ނިޒާމުން ވެސް ގެއްލުވާލި ކަމަށެވެ.

ގާސިމް ވިދާޅުވީ ތިން ސަރުކާރުން ކަންކުރި ގޮތް ބެލުމުން ހަގީގަތް ފެންނާނެ ކަމަށެވެ.

"މަނިކުފާނަށް ވުރެ [ރައީސް ޑރ. މުހައްމަދު މުޢިއްޒު] އަށް ވުރެ ތާހިރުކޮށް ވެރިކަން ކުރައްވާ އެއްވެސް ވެރިއަކު އަދި މިހާތަނަކަށް މި 2008 ގެ ފަހުން ނާދޭ," ރައީސް މުޢިއްޒަށް ވަރަށް ބޮޑަށް ތައުރީފު ކުރައްވާ ގާސިމް ވިދާޅުވި އެވެ.