ކުރިއަށްއޮތް ހައްޖު މޫސުމަށް ރާއްޖެއިން ހަމަޖައްސަންޖެހޭ އިންތިޒާމުތައް ނިންމައިފި

ކުރިއަށްއޮތް ހައްޖު މޫސުމަށް ރާއްޖެއިން ހަމަޖައްސަންޖެހޭ އެންމެހައި ކަންކަން ހަމަޖައްސައި ނިންމައިފިއެވެ.

ރާއްޖެއިން ހައްޖަށްދާ ދިވެހިންގެ ބަލަދުވެރި ފަރާތަކީ މޯލްޑިވްސް ހައްޖު ކޯޕަރޭޝަނެވެ. ހައްޖުގެ އިންތިޒާމުތައް ހަމަޖެއްސުމަށް މޯލްޑިވްސް ހައްޖު ކޯޕަރޭޝަނުން ކުރަމުންގެންދާ މަސައްކަތްތަކުގެ މައުލޫމާތު ހިއްސާކުރައްވަމުން ޙައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ވިދާޅުވީ، ރާއްޖެއިން މިފަހަރު ހައްޖަށްދާ މީހުންނަށް ހަމަޖައްސަންޖެހޭ އެންމެހާ އިންތިޒާމްތައް ހަމަޖައްސައި ނިމިފައިވާކަމަށެވެ.

ޝަކީލް ވިދާޅުވީ، ރާއްޖެއިން މިފަހަރު ހައްޖަށްދާ 1،000 ހައްޖުވެރިންގެ ވިސާގެ ކަންތައްވެސް ނިމިފައިވާ ކަމަށާއި، ހައްޖުވެރިްނ މައްކާގައި ތިބުމަށް ހަމަޖެހިފައިވާ ހޮޓާތައްވެސް ހަމަޖެހި ނިމިފައިވާކަމަށެވެ. މިހާރު ކުރިއަށްދަނީ ހޮޓަލުގެ ހުރި ހިދުމަތްތައް އިތުރަށް ފުރިހަމަ ކުރުމުގެ މަސައްކަތްކަމަށް ޝަކީލް ވިދާޅުވިއެވެ. މި މަސައްކަތަކީ މިފަހަރުގެ ރޯދަމަހު އުމްރާއަށްދިޔައިރު ފުރިހަމަ ކުރުމަށް ފާހަގަކުރެވުނު ކަންކަން ކަމަށް ޝަކީލް ފާހަގަކުރެއްވިއެވެ.

އޭނާ އިތުރަށް ވިދާޅުވީ، ރާއްޖެއިން ހައްޖަށްދާ މީހުންގެ ކަންކަން ވީހާވެސް ރަނގަޅަށް ލުއިފަސޭހަވާނޭގޮތަށް އިންތިޒާމްކޮށްދިނުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުވެސް އެދިވަޑައިގަންނަވާފައި ވާަކަމަށެވެ.

އެންމެފަހުގެ ހައްޖު ދަތުރުގައި ލިބުނު ހިޔާލްތަކަށް ބަލައި އަޅުގަނޑުމެން މިދަނީ އެކަންކަން އިތުރަށް ފުރިހަމަ ކުރުމަށް މަސައްކަތްކުރަމުން. އެގޮތުން މިދިޔަ ފަހަރު މައިގަނޑު ގޮތެއްގައި ލިބުނު އެއް ފީޑްބެކަކީ މިނާގައި ފާހާނާ މަދުކަން. މިކަމާ ގުޅިގެން ސައުދީ ސަރުކާރުގެ ކަމާގުޅޭ މުައައްސަސާތަކާ ވާހަކަދައްކައި އެފަރާތުން ވަނީ އަޅުގަނޑުމެން އެދުނު ގޮތަށް މީގެ ކުރިން ހުރިވަރަށްވުރެ ފަސްގުނަ އިތުރުކޮށްފައި

ޙައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް

މިފަހަރު ރާއްޖެއިން ހައްޖަށް ދިއުމަށްޓަކައި ފުރާ އެޑްވާންސްޓީމް ދަތުރުކުރުމަށް ހަމަޖެހިފައިވަނީ މެއިމަހުގެ 4 ވަނަ ދުވަހެވެ. އެއަށްފަހު ހައްޖުވެރިންގެ ފުރަތަމަ ފްލައިޓް މެއިމަހުގެ 15 ވަނަ ދުވަހު ފުރުމަށް ޝެޑިއުލް ކޮށްފައިވާއިރު، ދެން ފްލައިޓްތައް ޝެޑިއުލްކޮށްފައިވަނީ މެއި. 17، 18 އަދި 19 ވަނަ ދުވަހުއެވެ.

ރާއްޖެއިން މިފަހަރު ހައްޖަށް މީޙުން ގެންދިއުމަސް ހަމަޖެހިފައިވަނީ ޤައުމީ އެއާލައިން މޯލްޑިވިއަންގެ އިތުރުން ސައުދީއާ އެއާލައިން ގައެވެ.

ރާއްޖެއިން ހައްޖަށްދާ މީހުންނަށް އެންމެ ފަސޭހަކަމެއްގެ ގޮތުގައި އޮންނާނީ މައްކާ ރޫޓުގެ ދަށުން ހައްޖަށް ދިއުމެވެ. މައްކާ ރޫޓަކީ ހައްޖުވެރިން އަމިއްލަ ޤައުމުން ފުރުމުގެ ކުރިން، ދެ ޤައުމުގެ އިމިގްރޭޝަނުން ކުރަންޖެހޭ ކަންކަން އަމިއްލަ ޤައުމުގެ އެއަރޕޯޓްގައި ތިބެ ނިންމައިގެން ފުރުމެވެ. ނަތީޖާއަކީ ޖިއްދާގެ އެއާޕޯޓްގެ އިމިގްރޭޝަންގައި ޙައްޖުވެރިން މަޑުކުރަން ނުޖެހި ހޮޓަލަށް ދެވޭގޮތަށް ކަންކަން އިންތިޒާމް ވެގެން ދިއުމެވެ. އެގޮތުން ހައްޖުވެރިންގެ ލަގެޖްތައް ވެސް ލިބޭނީ ސީދާ ހޮޓަލަށެވެ.

ހައްޖު ކޯޕަރޭޝަނުން ހައްޖުގެ ކަންކަން އިންތިޒާމުކޮށް ނިންމިއިރު، މިއީ މިހާ އަވަހަށް ހައްޖުގެ އިންތިޒާމުތައް ނިންމި ފުރަތަމަ ފަހަރެވެ. ހައްޖު ކޯޕަރޭޝަނާ ހައްޖުގެ ކަންކަން ހަވާލުވުމަށްފަހު އެ ކުންފުނިން ގެންދަނީ އަހަރަކަށް ވުރެ އަހަރެއް ހައްޖާޖީންނަށް ދެމުންދާ ހިދުމަތްތައް ފުރިހަމަ ކުރަމުންނެވެ.