ބޭސްފިހާރަތަކުން އާސަންދަ ބިލްކުރަނީ އާއްމު އަގުތަކަށްވުރެ މާ ބޮޑުކޮށް: އޮޑިޓް

ބޭސްފިހާރަތަކުން އާސަންދައަށް ބިލްކުރާއިރު، އާއްމުކޮށް ބާޒާރުގައި ވިއްކާ އަގުތަކަށްވުރެ އެތައް ގުނަ ބޮޑުކޮށް އާސަންދައަށް ބިލްކުރާކަމަށް އޮޑިޓް ރިޕޯޓްގައި ބުނެފިއެވެ.

އޮޑިޓަރ ޖެނެރަލްގެ އޮފީހުން މިއަދު ނެރެފައިވާ އިޖުތިމާއީ ސިއްހީ އިންޝުއަރަންސް ސްކީމްގެ ޕާފޯމަންސް އޮޑިޓްގައި ބުނެފައިވަނީ، ބާޒާރުން ލިބެން ހުންނަ އަގަށްވުރެ ބޮޑުކޮށް އާސަންދައިން ބޭސް ދޫކޮށްފައި ހުންނަކަން ފާހަގަކުރެވޭ ކަމަށާއި، ރާއްޖެ އެތެރެކުރާ އަދި އާންމުކޮށް ބޭނުންކުރެވޭ ބައެއް ބޭސްތައް ބާޒާރުން ލިބެން ހުރި އަގަށްވުރެ ބޮޑުކޮށް އާސަންދަ ސްކީމުން ހަރަަދުކުރާކަން ފާހަގަކުރެވިފައިވާކަމަށެވެ. އެގޮތުން އާންމުކޮށް ބޭނުންކޮށް އުޅޭ 26 ބޭހެއް ބޭސްފިހާރަތަކުން ދޫކުރާ އެންމެ ކުޑަ އަގާއި އާސަންދައިން އެބޭސް ދޫކުރާ އަގާ އަޅާބެލިއިރު، 17 ބޭހެއްގެ އަގު ބާޒާރުން ވިއްކްާ އަގަށްވުރެ ބޮޑުކޮށް ސްކީމް މެދުވެރިކޮށް ދޫކޮށްފައިވާކަމަށެވެ. މީގެ ތެރެއިން ބައެއް ބޭސްވިއްކާ ތަންތަނުން ބޭސްވިއްކާ އެންމެ ކުޑަ އަގަށްވުރެ 63 އިންސައްތައާ ހަމަޔަށްވެސް ބޮޑުކޮށްފައި ހުންނަކަން ފާހަގަކުރެވޭކަމަށް ރިޕޯޓްގައި ވަނީ ފާހަގަކޮށްފައެވެ.

އޮޑިޓް ރިޕޯޓްގައި ބުނީ ބޭހާބެހޭ ޤަވައިދުގައި ބަޔާންކޮށްފައިވާ މިންގަނޑަށްވުރެ ބޮޑުކޮށް އާސަންދައިން ބޭހުގެ އަގު ކަނޑައަޅާފައިވާކަމަށެވެ. އެގޮތުން އާސަންދައިން ބޭސް ވިއްކާ އަގު ކަނޑައެޅުމުގައި ބޭހާބެހޭ ގަވާއިދުގައިވާ މިންގަނޑަށް އަމަލުކުރަމުން ނުދާއިރު، ބޭހުގެ އަގު ކަނޑައެޅުމުގައި ބޭސް ވިއްކާ ފަރާތްތަކުންވެސް އަމަލުކުރަނީ އެކިފަހަރު އެކިގޮތަށްކަމަށް ވަނީ ބުނެފައެވެ. ރިޕޯޓްގައި ވަނީ ފާމަސީތަކުން އިންވޮއިސް އަދި ސީއައިއެފް ހުށަހެޅުމަށް އުޒުރުވެރިވުމާއި، ބޭސް އެތެރެކުރާ ފަރާތްތަކުގެ ތަފާސްހިސާބުތަކުގައި ބޮޑެތި ފަރަގުތައް ހުރުމުން އަގު ކަނޑައެޅުމަށް ގޮންޖެހުންތައް ދިމާވެފައިހުރިކަންވެސް ފާހަގަކޮށްފައެވެ.

ބޭހާބެހޭ ގަވައިދުގައި ބަޔާންކޮށްފައިވާ މިންގަނޑަށްވުރެ ބޮޑުކޮށް އާސަންދައިން ބޭހުގެ އަގު ބޮޑުކޮށްފައިވުމުން އޮޑިޓްގައި ވަނީ 17 ބޭހަކަށް އެކަނިވެސް އިސްރާފަށް މަގުފަހިވާގޮތަށް 3 އަހަރުގެ ތެރޭގައި 45 މިލިއަން ރުފިޔާ އިތުރަށް ހަރަދުވާނޭކަމަށް އަންދާޒާކޮށްފައެވެ.

މި ރިޕޯޓްގައި އާސަންދައިގެ ދަށުން ބޭސް ދޫކުރުމުގައި ބޮޑެތި މައްސަލަތަކެއް ފާހަގަކޮށްފައިވާއިރު، ބޭސް ދޫކުރާ މުއްދަތު ހަމަވުމުގެ ކުރިން ބޭސް ނަގާ މައްސަލަވެސް ވަނީ ފާހަގަކޮށްފައެވެ. އަދި އެފަދަ ފަރާތްތަކާމެދު ފިޔަވަޅު އަޅާފައިނުވާކަންވެސް އޮޑިޓް ރިޕޯޓްގައި ވަނީ ފާހަގަކޮށްފައެވެ.