ތަދާއި ވޭނެއް އެކަކުވެސް ނެދޭނެ!

އަޅުގަނޑުމެން އެންމެން ދިރިއުޅެމުންގެންދާ ދުނިޔެއަކީ، ހަގީގަތުގައި ވަގުތީ ފާލަމެކެވެ. ކޮންމެ މީހަކުވެސް، އުފާވެރިކަމާއި އަމާންކަމާއި އެކު އެވަގުތީ ފާލަމުގައި ވަގުތުތައް ހޭދަކޮށް، ދާން އޮތް މަންޒިލަށް ދިއުމަށް ބޭނުންވާނެއެވެ. މި ވަގުތީ ފާލަމުގައި ގިނައިރު ހުރެލުމަށް ކޮންމެ މީހެއްގެ ހިތްވެސް އެދޭނެއެވެ. އެހެނަސް ބައެއްފަހަރު، އެހެންމީހުންގެ ކުށުން ތިމާާ އެފާލަމުގައި އަމާންކަންމަތީ ގިނަ އިރު ހުރެލުމުގެ ފުރުސަތު ކުޑަވެގެން ދެއެވެ.

އިންސާނީ ހަޟާރަތު ކުރިއަރައިގޮސް، އެތަކެއް ތަރައްގީއާއި ތަމައްދުން ހޯދިއިރު، ބައެއް ކަންކަމަކީ އަދިވެސް އިންސާނުން އެކަންކަމަށް އެކަށޭނަ ހައްލު ހޯދިފައިނުވާ ކަންކަމެވެ. މީގެ ތެރެއިން ޚާއްސަކޮށް ބަލިތައް ފާހަގަކޮށްލެވެއެވެ. އެގޮތުން އެއިޑްސް ބައްޔަކީ އިންސާނުން އެޔާއި ވަރުގަދަ ހަނގުރާމައެއް ކުރަން ޖެހިފައިވާ، ނަމަވެސް ބަލިކުރާނެ ގޮތެއް ހޯދިފައިނުވާ ނުރައްކާތެރި ބައްޔެކެވެ.

އެކުއަރޑް އިމިއުން ޑިފިޝަންސީ ސިންޑްރޯމް ނުވަތަ އެއިޑްސް އަކީ އެޗް އައި ވީ ވައިރަސް ގެ ސަބަބުން ޖެހޭ ނުރައްކާތެރި ބައްޔެކެވެ. އެޗްއައިވީ އަކީ އިންސާނާގެ ހަށިގަނޑުގެ ދިފާޢީ ބާރު އެވައިރަސްގެ ސަބަބުން ދަށްކޮށްލާ ނުވަތަ ނައްތާލާ ވައިރަސް އެކެވެ. މީގެ ސަބަބުން އެކިއެކި ޖަރާސީމްގެ ސަބަބުން ޖެހޭ ބަލިތަކުން ދިފާޢުނުވެ، ބަލި ހަށިގަނޑުގައި ފެތުރެމުންދާނެއެވެ.

އެއިޑްސް ބައްޔަކީ ނުރައްކާތެރި އަދި ވޭންދެނިވި ބައްޔެއްކަމީ ދެބަސްވެވެން ނެތް ހަގީގަތެކެވެ. އެހެނަސް އަޅުގަނޑުމެންގެ މި ދިވެހި މުޖުތަމައުގައި މި ބަލިއާއި ގުޅުވައިގެން ދެކެވޭ ބައެއް ވާހަކަތަކަކީ ހައިރާން ކުރުވަނިވި ވާހަކަތަކެވެ. މި ބަލި ޖެހެނީ ހަމައެކަނި ޖެހެނީ އަހުލާގީ ގޮތުން ދަށްފެންވަރުގެ މީހުންނަށް އެކަނި ކަމަށްބުނެ، ގޯސްކަމުގެ ނަޒަރުން ބަލީގެ ޝިކާރައަކަށްވެފައިވާ މީހުންނަށް ބަލައެވެ. މީގެ ނަތީޖާއަކަށް ވެގެންދަނީ، މި ބަލިހުރިކަން ޝައްކުވާއިރުވެސް ބައްޔަށް ފަރުވާ ހޯދާ މީހުންގެ އަދަދު މަދުވުމެވެ.

ހަގީގަތަކީ ބައެއް ފަހަރު، ތިމާގެ ކުށަކާއި ނުލާވެސް ބައެއް އިންސާނުންނަށް މިބަލި ޖެހޭގޮތް މެދުވެރިވުމެވެ. އެއީ ބަލިހުރި އެހެންމީހެއްގެ ލޭ، ދައު، ކުޅު ނުވަތަ މަނީގެ ޒަރިއްޔާއިންނެވެ. އެފަދަ ގޮތަކަށް ބަލި ވާސިލްވާ ފަރާތްތަކަށް އެބަލި މެދުވެރިވެދާނެކަން ނޭނގިހުއްޓާ އެ ބަލި ޖެހުނަސް، މުޖުތަމައުގެ މޮޅެތި ނަޒަރުތަކުން އެމީހުންނާއި ދިމާލަށް ބަލަނީ ވަރަށް އަގަލުކުޑަ ބައެއްގެ ގޮތުގައެވެ. މިފަަދަ ސަބަބުތަކާއި ހުރެ، ބަލީގެ ޝިކާރައަކަށްވެ މުޖުތަމައު ތެރެއަށް ގެއްލި ގޮސްފައިވާ މީހުންވެސް ވަކި މަދެއް ނޫނެވެ.

ހަގީގަތަށް ދަންނަވަނީނަމަ މި ބަލި މަދުކޮށް، ބަލީގެ ހޭލުންތެރިކަން އިތުރުކުރަން ވިސްނަނީމަ، އެކަން ފަށަންވީ މުޖުތަމައުއިން މި ބައްޔާއި މެދު ދެކޭ ގޮތް ބަދަލުކޮށްގެންނެވެ. މިސާލަކަށް މި ބައްޔަކީ

ހަމައެކަނި ތިމާ ކުރާ އަމަލުތަކުން ޖެހޭ ބައްޔެއްގެ ގޮތުގައި ނުދެކި، އެހެން މީހެއްގެ ކުށުންވެސް ޖެހިދާނެ ބައްޔެއްގެ ގޮތުގައި ދެކެން ފަށަންވެއްޖެއެވެ. ތިމާގެކުށް އޮވެ މި ބަލި ޖެހުނަސް، އެއީ އުމުރުގެ ބާކީބަޔަށް ތިމާ މުޖުތަމައުއިން ބާކިވެދާ ކަމަކަށް ހެދުމުގެ ވިސްނުން ހުއްޓާލަން ވެއްޖެއެވެ.

އެއިޑްސް ބައްޔަކީ ހަށިގަނޑަށް އިންތިހާއަށް ނުރައްކާތެރި ބައްޔެކެވެ. މިބަލީގައި މަރުވެފައިވާ މީހުން ހުދު އަަޅުގަނޑުމެންގެ ދިވެހިރާއްޖޭގައިވެސް އެބަތިއްބެވެ. މި ބައްޔަކީ އެއްކޮށް ފަރުވާ ނުކުރެވުނަސް، ބަލީގެ ނިޝާންތައް ފެނިއްޖެނަމަ އެ ނިޝާންތަކަށް ފަރުވާ ދެވިދާނެފަދަ ބައްޔެކެވެ. އެއިޑްސް ޖެހިފައިވާ މީހުންނަކީވެސް ހަމަ ދިރިހުރުމުގެ ހައްގު ތިބި މީހުންނެވެ.ކުރެވުނު ކުށެއް، ނުވަތަ ނުކުރާ ކުށެއްގެ މައްޗަށްވެސް މިބަލި ހަގީގަތުގައި ފެތުރިދާނެއެވެ. މިއީ އެބަލީގެ ފަރާތްތައް މުޖުތަމައުން ނެރެ ބާާކީކޮށްލުމުގެ ކުރިން ވިސްނާލަންވީ ކަންކަމެވެ. ތަދާ ވޭނުގައި ރޮއެ މަރުވާން އެދޭނީ ކާކުހެއްޔެވެ؟ އަޅާލުން ލިބޭނަމަ އެކަން ބަލައިނުގަންނާނީ ކާކުހެއްޔެވެ؟