ހއ.ދިއްދޫ ބިން ހިއްކުމުގެ 70 އިންސައްތަ މަސައްކަތް ނިމިއްޖެ

ހއ. ދިއްދޫ ބިން ހިއްކުމުގެ މަޝްރޫޢުގެ %70 މަސައްކަތް ނިމިފައިވާކަމަށް، މި މަސައްކަތް ކުރަމުންދާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލުން މައުލޫމާތުދީފިއެވެ.

މި މަޝްރޫއުގެ ދަށުން، މިހާތަނަށް 78 ހެކްޓަރުގެ ބިން ހިއްކާފައިވެއެވެ. މުޅި ޖުމުލަ ހިއްކުމަށް ހަމަޖެހިފައިވަނީ 112 ހެކްޓަރުގެ ބިމެވެ.

މިއީ އެރަށުގެ އެއަރޕޯޓް ތަރައްޤީކުރުމާއި ބޯހިޔާވަހިކަމުގެ ބޭނުމަށް ހިއްކާ ބިމެކެވެ. މި މަސައްކަތް އެމްއޭސީއެލްއިން ފެށީ ޖަނަވަރީ މަހުގެ 5 ވަނަ ދުވަހެވެ.

މި މަޝްރޫއު ކުރިއަށްދަނީ މުޅި ދުނިޔޭގައިވެސް މިވަގުތު އޮތް އެންމެ ބޮޑު ޑްރެޖަރުގެ ތެރޭގައި ހިމެނޭ އެއް ޑްރެޖަރު ބޭނުންކޮށްގެންނެވެ.  ޓްރެއިން ސަކްޝަން ހޮޕަރ، ލެއިވް އެރިކްޝަން ނަމަކަށް ކިޔާ މި ޑްރެޖަރަކީ، 46000 ކިއުބިކް މީޓަރުގެ ކެޕޭސިޓީ ހުރި ޑްރެޖަރެކެވެ.

ދިއްދޫގެ ބިން ހިއްކުމުގެ މަސައްކަތަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެރަށާއި ސަރަޙައްދުގެ ރައްޔިތުންނަށް ވެވަޑައިގެންފައިވާ މުހިންމު ވަޢުދުފުޅެކެވެ. އެ ރަށަކީ 5000 މީހުން ރަޖިސްޓްރީވެފައިވާ އާބާދީއެއް އޮތް ރަށެއްކަމުގައި ވިޔަސް، އެ ރަށުގެ ތަޢުލީމާއި ޞިއްޙީ ފަރުވާފަދަ ބޭނުންތަކަށް އެރަށަށް ހިޖުރަކޮށް ދިރިއުޅޭ މީހުންނާއެކު އެ ރަށުގައި ދިރިއުޅޭ އާބާދީ 7000 އަށް އަރައެވެ.

އެހެންކަމުން، ބިން ހިއްކާ، އެ ބިމުގައި ގާއިމު ކުރެވޭ ބޯހިޔާވަހިކަމުގެ ވަސީލަތްތަކާއި، އެއާޕޯޓާއިއެކު، މުޅި އެ ސަރަޙައްދަށްވެސް އިޤްތިޞާދީ ބޮޑެތި ކުރިއެރުންތައް ލިބޭނެކަމަށް ސަރުކާރުން ހާމަކުރެއެވެ.