އުތީމު މަހާރަދުން 'އުދަރެހުން ވިދާލީ' ރާއްޖެއަށް އިސްލާހުތަކެއް ބޭނުންވެފައި ވަނިކޮށް: އާދަމް ނަސީރު

އައްސުލްޠާނުލް ޣާޒީ މުޙައްމަދު ތަކުރުފާނުލް އަޢުޡަމް ސިރީ ސަވާދީއްތަ މަހާރަދުން 'އުދަރެހުން ވިދާލި' ދުވަސްވަރަކީ ރާއްޖެއަށް އިސްލާހުތަކެއް ބޭނުންވެފައި އޮތް ދުވަސްވަރެއްގައި ކަމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް މިރޭ ވިދާޅުވެއްޖެއެވެ.

ހއ. އުތީމުގައި މިރޭ ބާއްވާ ގައުމީ ދުވަހުގެ ރަސްމީ ޖަލްސާގައި ވާހަކަދައްކަދައްކަވަމުން ވަޒީރު ވިދާޅުވީ، ދުނިޔޭގެ ތާރީޚުގެ އެކި ހިސާބުތަކުގައި މުޞްލިޙުން އުފެދޭ ކަމަށާއި، ދިވެހި ރާއްޖޭގެ ތާރީޚަށް ބަލާއިރު، އެކި ޒަމާންތަކުގައި ރާއްޖެއިން ވެސް މުޞްލިޙުން ފެންނަން އެބަ ހުރި ކަމަށެވެ.

މިމޭރުމުން ވާހަކަދައްކަވަމުން ވަޒީރު ވިދާޅުވީ ގައުމީ ދުވަށް ޚާއްސަކޮށްފައިވާ އައްސުލްޠާނުލް ޣާޒީ މުޙައްމަދު ތަކުރުފާނުލް އަޢުޡަމް ސިރީ ސަވާދީއްތަ މަހާރަދުން 'އުދަރެހުން ވިދާލި' ދުވަސްވަރަކީ ރާއްޖެއަށް އިސްލާހުތަކެއް ބޭނުންވެފައި އޮތް ދުވަސްވަރެއް ކަމަށެވެ.

އެ ދުވަސްވަރަކީ ރާއްޖޭގެ މިނިވަންކަން ގެއްލި، އަޅުވެތިވެފައިވާ ދުވަސްވަރެއް ކަމަށްވުމުން، ދިވެހި ދައުލަތެއް އަލުން އިއާދަކުރަން މުޞްލިޙަކު ބޭނުންވެފައި އޮތް ދުވަސްވަރެެއް ކަމަށް އޭނާ ވިދާޅުވެއެވެ.

"އެ ދުވަސްވަރަކީ ދިވެހިރާއްޖޭގެ ޒަމާންވީ މާތްވެގެންވާ އިސްލާމްދީން އަޅުގަނޑުމެންގެ ދެދުނިޔޭގެ އިލާހީ ބާއްޖަވެރިކަމުގައިވާ އިލާހީ ނަސީބު އަޅުގަނޑުމެނަށް ގެއްލެމުން، ފަނޑުވަމުން ދިޔަ އެ ބިން އަނބުރާ ގެންނަން އިސްލާހީ މަސައްކަތްތަކެއް ކުރަން ޖެހިފައި އޮތް ދުވަސްވަރެއް"

ވަޒީރު ވިދާޅުވިއެވެ.

މިރޭގެ ޖަލްސާގައި އިތުރަށް ވާހަކަދައްކަވަމުން، ވަޒީރު އާދަމް ނަސީރު ވިދާޅުވީ، ރައީސް ޑރ. މުޙައްމަދު މުއިއްޒު ފައްޓަވާފައި ވަނީ ވެސް މުޙައްމަދު ތަކުރުފާނު ކުރެއްވި ފަދަ އިސްލާހީ މަސައްކަތްތަކެއް ކަމަށެވެ.

އެގޮތުން، ރާއްޖޭގެ އަޚުލާގާއި، މިނިވަންކަމާއި، މަސައްކަތްތެރިކަމާއި، ޒުވާނުންގެ ފަންނުވެރިކަން އިއާދަކޮށް، އިސްލާހު ކުރުމުގެ އިތުރުން ގެއްލެމުންދާ ދިވެހިންގެ ތަރީޚާއި ތަރިކަތައް އިޔާދަކުރުމުގެ މަސައްކަތް އެމަނިކުފާނު ކުރއްވާކަމަށް ވަޒީރު ވިދާޅުވިއެވެ.

އެހެންކަމުން، ރައީސް މުއިއްޒަކީ ރާއްޖޭގެ ތާރީޚުގައި އަދުގެ މުޞްލިޙު ކަމަށާއި ދިވެހިން އަލުން އާ ހަގީގަތްތަކަށް ހޭލައްވާލުމުގެ ބާނީކަން އާދަމް ނަސީރު ވަނީ ފާހަގަކުރައްވާފައެވެ.