އާރްއޭސީއެލް އިން ކުރިއަށްގެންދާ މަޝްރޫޢުތައް އަވަސް ކުރުމަށް ކޮމެޓީއެއް އެކުލަވާލައިފި!

ރީޖަނަލް އެއާޕޯޓްސް، އާރްއޭސީއެލް އިން ކުރިއަށްގެންދާ މަޝްރޫޢުތައް އަވަސް ކުރުމަށް ކޮމެޓީއެއް އެކުލަވާލައިފިއެވެ.

އާރްއޭސީއެލް އިން ނެރުނު ނޫސް ބަޔާނެއްގައި ބުނީ، އެކުންފުނިން އެއަރޕޯޓްތައް ތަރައްގީ ކުރުމަށްޓަކައި ކުރަމުންދާ ބައެއް ބޮޑެތި މަޝްރޫތައް ފުރިހަމަނުވެ ލަސްވަމުން ދިއުމުގައި ކުންފުންޏައް ސީދާ ބާރު ނުފޯރުވޭ ބައެއް ކަންކަން ދިމާވަމުންދާ ކަމަށެވެ.

އެގޮތުން އެ ކުންފުނިން އެއަރޕޯޓްތައް ހިންގުމަށްޓަކައި ހަވާލު ކުރެވިފައިވާ ބިންތަކަކީ އެކިއެކި ރަށްރަށަށް ނިސްބަތްވާ ބިންތަކުން ވަކިކުރެވިފައިވާ ސަރަހައްދުތަކެއް ކަމަށާ، މިބިންތަކުގައި އެއަރޕޯޓް ތަރައްގީކުރުމަށްޓަކައި ކުރެވެމުންދާ ގިނަ މަސައްކަތްތަކަކީ އެކިއެކި ފަރާތްތަކުން ނަގަންޖެހޭ ހުއްދަތައް ލިބިގެން، ކުރެހުންތައް އެޕްރޫވް ކުރެވިގެން ނޫނީ ކުރިއައް ގެންދެވޭނެ ކަންކަމެއްނޫންކަން ކުންފުނިން ފާހަގަކޮށްފައިވެއެވެ.

އަދި އެކަންކަން ފުރިހަމަ ކުރުމައްޓަކައި އެންމެ ފުރަތަމަ ކުރަންޖެހޭއެއްކަމަކީ ލޭންޑް ރެޖިސްޓްރޭޝަންގެ ކަންކަން ފުރިހަމަ ކުރުން ކަމަށްވާއިރު، މިއަދާ ހަމައަށްވެސް ލޭންޑް ރެޖިސްޓްރޭޝަންގެ ކަންކަން އާރު. އޭ. ސީ. އެލް. އަށް ސީދާގޮތުން ބާރުނުފޯރުވޭ އެކިއެކި ސަބަބުތަކާހުރެ ފުރިހަމަނުވެފައިވާ ކަމަށް އެ ކުންފުނިން ބުނެއެވެ.

އެހެންކަމުން، ލޭންޑް ރެޖިސްޓްރޭޝަންގެ ކަންކަން ފުރިހަމަކުރުމާ ގުޅުންހުރި އެކިއެކި ފަރާތްތަކާ އެއްކޮށް ބާއްވަންޖެހޭ ބައްދަލުވުންތައް ބޭއްވުމަށްޓަކައި ކުންފުނީގެ މެނޭޖްމަންޓް ފެންވަރުގެ ކޮމެޓީއެއް މިހާރު އެކުލަވާލެވިފައުވާ ކަމަށާ އަދި އެ ކޮމިޓީން ކަމާބެހޭ ފަރާތްތަކާއެކު ބައްދަލުވުންތައް ބާއްވަމުންދާ ކަމަށް ބުނެފައިވެއެވެ.

އާރްއޭސީއެލްއިން އިތުރަށް ބުނީ، އެ ކުންފުނި ވަކި ކުންފުންޏެއްގެ ގޮތުގައި ގާއިމުކުރެވި ރާއްޖޭގެ ބައެއް ރީޖަނަލް އެއަރޕޯޓްތައް ކުންފުންޏާ ހަވާލުކުރެވުނު ދުވަހުންފެށިގެންވެސް އެއަރޕޯޓް ތަކުގައި ގާއިމުވެފައި ހުންނަންޖެހޭ ޝްޓޭންޑަރޑްތައް ގާއިމުކުރުމުގެ މަސައްކަތްތައް ކުރުމަށްޓަކައި ކުންފުނިން ވަރަށް ބޮޑުއިސްކަމެއް ދެމުންދާ ކަމަށެވެ.

އަދި ރައީސް ޑރ މުހައްމަދު މުޢިއްޒު ރާއްޖޭގެ ވެރިކަމާ ހަވާލުވެ އާރްއޭސީއެލްގެ މެނޭޖްމަންޓަށް ގެނެވުނު ބަދަލާއެކު، ކުންފުނީގެ މެނޭޖިން ޑައިރެކްޓަރ އެއްގެ ގޮތުގައި އަހްމަދު މުބީން ހަވާލުވި ހިސާބުންފެށިގެން، ކުރިއަށްވުރެ ބާރު ސްޕީޑްއެއްގައި އެއަރޕޯޓްތައް ތަރައްގީ ކުރުމަށް ކުރަންޖެހޭ ގިނަގުނަ ކަންކަން ފާހަގަކޮށް އެކަންކަން ފުރިހަމަކުރުމަށްޓަކައި ވަރަށްބޮޑު އިސްކަމެއްދެމުންދާ ކަމަށްވެސް ބުނެފައިވެއެވެ.

އެހެންކަމުން، އާރްއޭސީއެލް އިން ވަނީ އެއަރޕޯޓް ތަކުގައި ތަރައްގީގެ ގޮތުގައި ކުރުމަށް ނިންމިފައިހުރި ހުރިހާ ކަމެއްވެސް ހުއްޓުމެއްނެތި ކުރިއަށްދާނެކަމުގެ  ޔަގީންކަން ދީފައެވެ.