މަހާޒް ޓެކްސް ޓްރިބިއުނަލަށް: އަބްދުއްރަހީމް ވިދާޅުވީ އިއްޔެ ކަމުނުދިޔަސް މާދަން ކަމުހިނގައިދާނެ ކަމަށް
ސުޕްރީމު ކޯޓުގެ ފަނޑިޔާރުކަމުން މި ސަރުކާރުގައި ވަކިކުރެއްވި މަހާޒް އަލީ ޒާހިރު، ޓެކްސް އެޕީލް ޓްރިބިއުނަލަށް އައްޔަނުކުރެއްވުމަށް ފޮނުވުމަކީ ދުނިޔޭގެ އާދަކަމަށް ސިފަކުރައްވައި މަޖިލީހުގެ ރައީސް ޢަބްދުއްރަޙީމް އަބްދުالله އެކަން ދިފާއުކުރައްވައިފިއެވެ.
އަބްދުއްރަހީމް އެހެން ވިދާޅުވީ މިއަދުގެ މަޖިލީހުގައި ސަރުކާރު ފަރާތުން ގުރައިދޫ ދާއިރާގެ މެންބަރު ހަނާން މުހައްމަދު ރަޝީދު ހުށަހެޅުއްވި ރީއެމްޕްލޯއިމެންޓް ބިލަށް ބަހުސްކުރައްވަމުން ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ވިދާޅުވި ވާހަކަފުޅަށް ރައްދުދެއްވަމުންނެވެ.
އެގޮތުން ސުޕްރީމު ކޯޓުން މަހާޒް ވަކިކުރެއްވި މަހާޒްއަކީ ވެރިކަންކުރާ ޕީއެންސީގެ މެންބަރުންގެ ގާތުގައި "ކޮރަޕްޓް، ނަޒާހަތްތެރިކަމެއް އަދި އޮއްޓަރެއް ވެސް ނެތް" ފަނޑިޔާރެއް ކަމަށާއި، އެފަދަ ބޭފުޅަކު ޓެކްސް އެޕީލް ޓްރިބިއުނަލަށް ރައީސް ފޮނުއްވައިފައިވާ ކަމަށް މެންބަރު މީކާއިލް ވިދާޅުވިއެވެ.
އަދި އެކަމުގެ ޙަޤީގަތާއި މެދު ސުވާލު އުފެދޭ ކަމަށް ވެސް މެންބަރު މީކާއިލް ވިދާޅުވިއެވެ.
މިއަދު މި ރައްޔިތުންގެ މަޖިލީހުގެ ތަޅުމުގައި އަޅުގަނޑުމެންނަށް އިވިގެން މި ދިޔައީ، އިއްޒަތްތެރި ރައީސް، ދިވެހިރާއްޖޭގެ ޓެކުހުގެ ކަންކަން ބެލުމަށް ދިވެހި ރައްޔިތުންގެ ޓެކުހުގެ ކަންކަމުގައި ގޮތް ނިންމުމަށް ޓެކްސް އެޕީލް ޓްރައިބިއުނަލަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތަކުގެ ތެރެއިން އެންމެ އިސްކަން ދެއްވާފައިވާ ނަމަކީ އެއްކަލަ ޕީއެންސީގެ މެންބަރުންނަށް ދާދިފަހުން ކޮރަޕްޓްވި ނަޒާހާތްތެރިކަމެއް ނެތް، އެއްވެސް ކަހަލަ އޮށްޓަރެއް ނެތް، އެފަދަ ފަނޑިޔާރެއްގެ ނަންފުޅު މިހާރު މި ރައްޔިތުންގެ މަޖިލީހަށް މިވަނީ ރައީސުލްޖުމްހޫރިއްޔާ ފޮނުއްވައިފައި
ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް
މެންބަރު އެފަދައިން ވިދާޅުވުމުން މަޖިލީހުގެ ރިޔާސަތުގައި އިންނެވި އަބްދުއްރަހީމް ވަނީ އެކަމަށް ޖަވާބުދެއްވާފައެވެ.
އެގޮތުން ދުނިޔެ ހިނގާއިރު އެކި ދުވަހު އެކި ގޮތަށް ކަންކަން ހިނގުމަކީ ފިތުރަތުގެ އުސޫލު ކަމަށާއި މި އުސޫލުން، އެއް ދުވަހު ކަމުދާ ލީޑަރަކު އަނެއް ދުވަހު ކަމުނުގޮސް ވެސް ހިނގައިދާނެ ކަމަށް އަބްދުއްރަޙީމް ވިދާޅުވިއެވެ.
"އެއް ދުވަހު ކަމުދާ ލީޑަރު އަނެއް ދުވަހު ކަމުނުގޮސް ހިނގައިދާނެ، އެއް ދުވަހު އިތުބާރުނުކުރެވޭ ވެރިއަކު އަނެއް ދުވަހު ފެނުނީމަ އިތުބާރު ކުރެވިދާނެ، އެއް ދުވަހަކު އެ ލީޑަރަކާ ނުލާ ދުނިޔޭގަ އުޅެވެން ނޯންނަ ލީޑަރު އަނެއް ދުވަހު އެ ލީޑަރަކާ އެކީ ދުނިޔޭގަ ނޫޅެވޭ ހިސާބަށްވެސް ދާނެ
މަޖިލީހުގެ ރައީސް ޢަބްދުއްރަޙީމް އަބްދުالله
ސުޕްރީމު ކޯޓުގެ ފަނޑިޔާރުކަމުން މަހާޒްއާއި އެކު ޑރ. އަޒްމިރަލްދާ ޒާހިރު ވަކިކުރައްވާފައިވަނީ ހުސްވި މޭއި މަހުގެ ތެރޭގައެވެ. އެ ފަނޑިޔާރުން ވަކިކުރެއްވިއިރު، މި ސަރުކާރުން ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުންނާއި، ޕާޓީން ވަކިކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލްކުރަން އޭރު ސުޕްރީމު ކޯޓަށް ވަނީ ހުށަހަޅާަފައެވެ.
އެކަމުގެ ތެރެއިން އޭރުގެ ސުޕްރީމު ކޯޓުގެ ފަނޑިޔާރުކަމުން ހުސްނުއް ސުޢޫދު ވެސް ވަނީ އިސްތިއުފާދެއްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
