އަނަންތު އަމްބާނީގެ ދަޢުވަތެއް މެސީއަށް؛ އިންޑިޔާ ދަތުރު ދިގު ކޮށްފި

އިންޑިޔާގެ ބިލިޔަނަރު، މުކޭޝް އަމްބާނީގެ ދަރިފުޅު އަނަންތު އަމްބާނީގެ ދަޢުވަތަކާއެކު، ދުނިޔޭގެ ފުޓްބޯޅަ ތަރި އަދި އާޖެންޓީނާގެ ކެޕްޓަން ލިއޮނަލް މެސީ، އޭނާގެ އިންޑިޔާ ދަތުރު ދިގުކޮށްފިއެވެ.

މެސީ އިންޑިޔާއަށް ދިޔައީ "ގޯޓް ޓުއަރ"ގެ ނަމުގައި އެ ގައުމުގެ ހަތަރު ސިޓީއެއްގައި އެކި ހަރަކާތްތައް ކުރިއަށް ގެންދިޔުމަށެވެ. އެގޮތުން އޭނާގެ އެ ދަތުރުގައި ކޮލްކަތާ، ހައިދްރަބާދު އަދި މުމްބައިއަށް ދަތުރުކޮށްފައިވާއިރު، ދަތުރު ނިންމާލަން ހަމަޖެހިފައި އޮތީ ވެރިކަން ކުރާ ސިޓީ، ނިޔު ދިއްލީއިން ނެވެ.

ނަމަވެސް އަނަންތުގެ ދަޢުވަތާއެކު، އިއްޔެ ނިންމާލަން އޮތް އެ ދަތުރު ދިގުކޮށް، މެސީއާއި އޭނާއާއި އެކު ދަތުރުގައި ބައިވެރިވި އުރުގުއޭގެ ފުޓްބޯޅަ ތަރި ލުއިސް ސުއަރޭޒްގެ އިތުރުން އެހެން ކުޅުންތެރިން މިހާރު ތިބީ ޖާމްނަގަރުގައެވެ. އެތަނަށް އެ ކުޅުންތެރިން ދިޔައީ ޖަނަވާރު ސަލާމަތްކުރުމާ އެތަކެތި ރިހެބިލިޓޭޓްކުރުމަށް ހިންގާ ބޮޑު ފެސިލިޓީއެއް ކަމަށްވާ ވެންޓާރާއަށް ޒިޔާރަތްކުރުމަށެވެ.

އިންޑިޔާގެ ނިއުސް އެޖެންސީ އޭ.އެން.އައި. (ANI) އިން ހިއްސާކުރި ވީޑިއޯތަކުން ފެންނަ ގޮތުގައި، މެސީ އާއި އޭނާގެ އެކުވެރިން ޖާމްނަގަރަށް ދަތުރުކޮށްފައިވަނީ ބޮޑު ސެކިއުރިޓީއަކާއެކުއެވެ.

އަދި އެމީހުން މިރޭ ވެންޓާރާއަށް ޒިޔާރަތް ކުރާއިރު، މަރުހަބާ ކިޔުމާ، އެ ޒިޔާރަތުގެ ކަންކަން ބަލަހައްޓާނީ އަނަންތު ކަމަށް ވެސް އޭ.އެން.އައި. ގައި ރިޕޯޓް ކޮށްފައިވެއެވެ.

މެސީގެ އިންޑިޔާ ދަތުރު ދިގުކޮށްފައިވާރު، އެ ދަތުރު ފެށިގެން އައީ ބޮޑު ހަމަނުޖެހުމަކުންނެވެ.

އެގޮތުން ދަތުރުގެ ފުރަތަމަ މަންޒިލް، ކޮލްކަތާގެ ސޯލްޓް ލޭކް ސްޓޭޑިއަމްގައި އޮތް އެކުވެރިކަމުގެ މެޗެއް ބަލާލުމަށް ދާން ހަމަޖެހިފައި އޮތް ނަމަވެސް، މެޗު ފެށުމުގެ 30 އަށް ވުރެ މިނެޓު ކުރިން މެސީ އެ ސޮޓޭޑިއަމްއަށް ގޮސް ގާތްގަނޑަކަށް 10 މިނެޓްވެފައި ސަލާމަތީ ސަބަބުތަކަށްޓަކައި މެސީ ވަނީ ސްޓޭޑިއަމް ދޫކޮށް ގޮސްފައެވެ.

އެފަދައިން ކަން ހިނގައިދިޔައިރު، މެސީ ދެކިލުމަށް ބޮޑު އަގުގައި ޓިކެޓް ނަގައިގެން ގޮސް އެތައް ބަޔަކު ސްޓޭޑިއަމްގައި އޭރު ތިއްބެވެ. އެމީހުންނަށް މެސީ ނުފެނކމެސީ ދަނޑުން ނިކުތުމާއެކު ދަނޑުގައި ތިބި އޭނާގެ ފޭނުންވަނީ ހިތްހަމަ ނުޖެހުން ފާޅުކޮށް ދަނޑުތެރެއަށް ފެންފުޅިތަކާއި އަތުޖެހުނު އެއްޗެއް އުކައި މުޅި ސްޓޭޑިއަމް ހަލަބޮލިކޮށްލާފައެވެ.