ހާރުދަމުގެ ކެއުމުގައި މި ބާވަތްތައް ކޮންމެހެންވެސް ހިމަނަންވާނެ!

ހާރު ކެއުމަކީ ޒަމާނުއްސުރެ ދިވެހިންގެ އާދަކާދައިގެ ތެރެއިން ހިމެނިގެންވެސް އަމަލުކުރަމުން އައި އިސްލާމީ ރިވެތި އާދައަކަށް ވާއިރު މިފަހަކަށް އައިސް އެ އާދަ އުވިދާތަން އަންނަނީ ފެންނަމުންނެވެ.

ނަމަވެސް ހާރުދަމަށް ވޭހާވެސް ލަސްކޮށްފައި ކެއުމަކީ ސުންނަތުންވެސް ސާބިތުވާ ކަމެކެވެ. ޚާއްސަކޮށް ހާރުދަމުގެ ކެއުމުގައި ކަދުރު ހިމެނުމަކީ އެކަމުގެ ސަބަބުން ގިނަގުނަ ފައުދާތަކެއް ހަށިގަނޑަށް ލިއްބައިދޭ ސުންނަތެކެވެ.

ކަދުރުގެ އިތުރުންވެސް ހާރުދަމުގެ ކެއުމުގައި ހިމަނަން މުހިންމު އެހެނިހެން ބާވަތްތައް ހުރެއެވެ. އެބާވަތްތަކާއި ގުޅޭ މައުލޫމާތު އިސްލާމިކް މިނިސްޓްރީން ގެނެސްދޭ ”ރައްޔާން“ ޕްރޮގްރާމްގެ ތެރެއިން އެތެރެ ހަށީގެ ޑޮކްޓަރ ޑރ. މުހައްމަދު އަލީ ވަނީ ދެއްވާފައެވެ.

އެގޮތުން ހާރުދަމުގެ ކެއުމުގައި ބޭނުންކުރާ ކާބޯހައިޑްރޭޓްސް އަކީ ރަނގަޅު ކާބޯހައިޑްރޭޓްސް ނުވަތަ ގުޑް ކާބޯހައިޑްރޭޓްސް އަށް ހެދުމެވެ. މިސާލަކަށް ބަތުގެ ބަދަލުގައި އޯޓްސް ނުވަތަ ބްރައުން ބްރެޑް ހިމެނުން ހިމެނެއެވެ.

ކާބޯހައިޑްރޭޓްސް އާއި އެކު ޕްރޮޓީންވެސް ހާރުދަމުގެ ކެއުމުގައި ހިމެނުމަށް ޑރ އިރުޝާދު ދެއްވައެވެ. އެގޮތުން ކަނޑުމަސް، ކުކުޅު ނުވަތަ މުގުވެސް ބޭނުން ކުރެވިދާނެ ކަމަށް ވިދާޅުވިއެވެ.

މީގެ އިތުރުން ކާބޯހައިޑްރޭޓްސް އާއި ޕްރޮޓީން އެއްކޮށްލުމުންވާ ވަރަށް ތަރުކާރީ ޕޯޝަންއެއްވެސް ކެއުމުގައި ބޭނުންކުރުމަށް ޑރ ލަފާދެއްވައެވެ. އެފަދައިން މިންހެޔޮ ކެއުމެއް ކެއުމަށް ތިން ބަޔަށް ބަހާލެވިފައިވާ ތައްޓެއްގައި ކާތަކެތި އަތުރާލުން ފަސޭހަވާނެއެވެ.

ކާ ތަކެތީގެ އިތުރުން، ހާރުދަމަށްވެސް މަދުވެގެން ދެ ތަށި ފެން ބުއިމަކީ ނުހަނު މުހިންމު ކަމެއްކަން ޑރ ފާހަގަކުރެއްވިއެވެ. އެހެންކަމުން، އެކަން ހަނދާން ބަހައްޓައިގެން ކެއުމަށް ސަމާލުވުމަށް ޑރ ވިދާޅުވެފައިވެއެވެ.