ބައެއް ވަޒީރުންނަށް ރުހުން ނުދޭން ނިންމީ ޕްރޮޖެކްޓް ތަކަށާ، ބޭރުގެ އެހީއަށް ހުރަސް އެޅުމަށް: ޝަރީފް

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ ބައެއް ވަޒީރުންނަށް ރުހުން ނުދިނުމަށް މަޖިލީހުގެ މެޖޯރިޓީ ޕާޓީ އަދި އިދިކޮޅު މައި ޕާޓީ އެމްޑީޕީ އާއި ޑިމޮކްރެޓްސް އިން ނިންމާފައިވަނީ ޕްރޮޖެކްޓް ތައް ލަސްކުރުމާއި ބޭރުގެ އެހީ ހޯދުމަށް ހުރަސް އެޅުމަށް ކަމަށް ދާދިފަހުން އެމްޑީޕީ ދޫކުރައްވައި ވެރިކަންކުރާ ޕީއެންސީ އާއި ގުޅިވަޑައިގެންނެވި މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ ޝަރީފް) ވިދާޅުވެއްޖެ އެވެ.

ރައީސުލްޖުމްހޫރިއްޔާ ޑރ މުޢިއްޒުގެ ކެބިނެޓް އެކުލަވާ ލައްވައި، ވަޒީރުންނަށް ރުހުން ދެއްވުމަށް މަޖިލީހަށް ފޮނުއްވިތާ ދެމަސް ދުވަސް ވެގެން ގޮސް، މަޖިލީހުގެ ދައުރު ނިމުނުއިރުވެސް އެ މައްސަލަ ކުރިއަށް ގެންދެވިފައެއް ނުވެއެވެ.

އެއަށްފަހު އިއްޔެ އެކަމަށްޓަކައި ދައުރުން ބޭރުން ޖަލްސާއެއް ބޭއްވުމަށް އެޖެންޑާ ކުރެވުނު އިރު، ވަޒީރުންގެ ތެރެއިން ހަތަރު ބޭފުޅަކަށް އަދި ބަންޑާރަ ނާއިބަށް ރުހުން ނުދިނުމަށް އެމްޑީޕީ އާއި ޑިމޮކްރެޓްސް އިން ވަނީ ވިޕް ނެރެފައެވެ.

އެގޮތުން ރުހުން ނުދިނުމަށް އިދިކޮޅުން ނިންމާފައިވަނީ އެޓާނީ ޖެނެރަލް އަހުމަދު އުޝާމް އާއި، ފޮރިން މިނިސްޓަރ މޫސާ ޒަމީރުއާއި، އިކޮނަމިކް މިނިސްޓަރު މުހައްމަދު ސަޢީދުއާއި، އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ އިތުރުން ހައުސިން މިނިސްޓަރ ޑރ.ހައިދަރުއެވެ.

އެކަމާއި ގުޅިގެން މަވޯޓާ ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ، ބައެއް ވަޒީރުންނަށް ރުހުން ނުދޭން އިދިކޮޅުން ނިންމީ ނާގާބިލް ވެގެން ނޫން ކަމަށާ، އެހެނެއް ކަމަކު އެއީ އެ ވަޒީރުން މާ ބޮޑަށް ގާބިލް ކަަމަށް އިދިކޮޅަށް ފެނުވަޑައިގެންނެވުމުން ނިންމެވި ނިންމުމެއް ކަމަށް އޭނާ ވިދާޅުވި އެވެ.

މިއާއެކު ޝަރީފް ވަނީ ރުހުން ނުދޭން ނިންމެވި ނިންމުމަކީ ވަރަށް ނުރައްކާތެރި ނިންމުމެއް ގޮތަށް ސިފަ ކުރައްވާފައެވެ.

މުހައްމަދު ސަޢީދަކީ ކަމަށް ގާބިލް ވުމުގެ އިތުރުން ޕްރޮޖެކްޓް ތަކަށް ޗައިނާގެ އެހީ ހޯދުމުގެ އިސް ދައުރެއް އަދާ ކުރުމުގެ ގާބިލުކަން ހުރި ބޭފުޅެއް ކަމަށް ބަލާފައި ރުހުން ނުދޭން ނިންމީ. މައިގަނޑު ގޮތެއްގައި ބަލާފައި ހުރީ ރާއްޖެއަށް ބޭރުގެ އެހީ ހޯދުމަށް ހުރަސް އަޅައި ޕްރޮޖެކްޓް ތައް ލަސްކުރަން.

އިބްރާހީމް ޝަރީފް

ޝަރީފް އިތުރަށް ވިދާޅުވީ ވަޒީރުންނަށް ރުހުން ނުދިނުމުގެ ފަހަތުގައި އޮތީ ޕްރޮޖެކްޓް ތައް ލަސްކުރުމާއި ބޭރުގެ އެހީ ހޯދުމަށް ހުރަސް އެޅުން ކަމަށެވެ.

އަދި އެއީ ރައްޔިތުންގެ މަސްލަހަތަށްވުރެ އަމިއްލަ މަސްލަހަތު ކުރިއެރުވޭތޯ ހިންގާ ހަރަކާތެއް ކަމަށްވެސް އޭނާ ވިދާޅުވި އެވެ.

ރައީސް މުޢިއްޒުގެ މިސަރުކާރުގެ ވަޒީރުންނަށް ރުހުން ދިނުމުގެ މައްސަލަ އިއްޔެ އެޖެންޑާ ކުރެވުނު ނަމަވެސް މަޖިލީހުގައި ހަމަނުޖެހުން ހިނގުމުގެ ސަބަބުން އެކަން ކުރެވޭގޮތް ނުވެފައިވާއިރު، މިއަދު 1:00 ގައިވެސް އެ މަސައްކަތް އަލުން ކުރިއަށް ގެންދިޔުމަށް ވަނީ ނިންމާފައެވެ.