ސަލަފުގެ ނާއިބު ރައީސް ވިދާޅުވެ ދެއްވީ އިލްމުވެރީންނާމެދު އެ ޖަމިއްޔާގެ އޮތް ތަސައްވުރު

ޖަމިއްޔަތުއް ސަލަފުން އެ ޖަމިއްޔާއަށް ނިސްބަތްވާ އިލްމުވެރީންނާމެދު ޚާއްސަ ތަސައްވުރެއް ގެންގުޅޭ ކަމަށް ވިދާޅުވެ އެ ތަސައްވުރު ޖަމިއްޔާގެ ނާއިބު ރައީސް އައްޝައިހް އަހްމަދު ސަމީރު އިބްރާހިމް ހާމަ ކުރައްވައިފި އެވެ.

ޝެެއިހް ސަމީރު އެކަން ހާމަކުރެއްވީ އިއްޔެ ފެށި ޖަމިއްޔަތުއް ސަލަފުގެ އިލްމުވެރީންގެ އަހަރީ ބައްދަލްވުން ފެށުމުގެ ރަސްމިއްޔާތުގަ އެވެ. ޝެއިހް ސަމީރަކީ ސަލަފުގެ އިލްމުވެރީންގެ މަޖިލީހުގެ ރައީސްވެސް މެ އެވެ.

ސަމީރު ވިދާޅުވި ގޮތުގައި ރާއްޖޭގައި އޮތް ޖަމިއްޔާތަކާ ބެހޭ ގަވާއިދުގައި ދީނީ ޖަމިއްޔާގެ ތަސައްވުރެއް ނެތް ކަމަށެވެ. އެ ގޮތުން ޖަމިއްޔާތަކުން ވަޤުފުގެ ބޮޑެތި މަޝްރޫއުތައް ހިންގުންފަދަ ކަންކަން ކުރުމުގެ ތަސައްވުރު ނެތް ކަން ފާހަގަ ކުރެއްވި އެވެ. އެހެން ކަމުން އެފަދަ މަޝްރޫއުތައް ހިންގޭނެ ގޮތަށް ޖަމިއްޔަތުއް ސަލަފުގެ ހިންގާ ގަވާއިދަށް މުހިންމު ބަދަލުތަކެއް ގެނެސް ކަމާބެހޭ އިދާރާއަށް ހުށައަޅާ ރަޖިސްޓްރީ ކޮށްފައިވާ ކަމަށް ވިދާޅުވި އެވެ.

ޝެއިހް ވިދާޅުވީ މާތްﷲގެ ހެޔޮ ރަހްމަތާއެކު ޖަމިއްޔަތުއް ސަލަފުގައި މިއަދު ވަރަށް ގިނަ ވަސީލަތްތައް ޤާއިމު ކުރެވިފައިވާ ކަމަށެވެ. އެހެން ކަމުން އެ ވަސީލަތްތަކުގެ ފުރިހަމަ ބޭނުންކޮށް އަންނަން އޮތް ޖީލުތަކަށްޓަކާ ތަރުތީބުވެގެން މަސައްކަތްތަކެއް ކުރަން ޖެހޭ ކަމަށެވެ.

ޢިލްމުވެރީންނަކީ އަމިއްލަ ދިރިއުޅުމުގެ ކަންކަން ކުރުމަށް ފަހު ދެން ލިބޭ ވަގުތުތަކުގައި ދަރުހެއް ދިނުމުން އެ މީހުންގެ ދައުރު ނިމޭ ގޮތަށް އޮތް ބައެއް ނޫންކަން ފާހަގަ ކުރައްވާ ޝެއިހް ވިދާޅުވީ އިލްމުވެރީން ބާރުވެރިވާން ޖެހޭ ކަމަށެވެ. އަދި ސަލަފުގެ ޢިލްމުވެރީންނަކީ ލިބޭ ވަގުތެއްގައި އެ ޖަމިއްޔާއަށް ޚިދުމަތް ކުރާ ބަޔަކަށް ވުމަކީ ޖަމިއްޔާގެ ތަސައްވުރު ނޫން ކަމަށެވެ. އެއަށް ވުރެ މާފުޅާ މާ ތަނަވަސް ތަސައްވުރެއް ޖަމިއްޔަތުއް ސަލަފުގެ އެބަ އޮތް ކަމަށް ވިދާޅުވި އެވެ.

"އަޅުގަނޑުމެންނަށް ފެނުނީ އިލްމުވެރީން ބާރުވެރިވާން ޖެހޭ ކަމަށް. ހަގީގަތުގައި އަޅުގަނޑުމެންގެ ތަސައްވުރަކީ އެބާރުވެރިކަމުގެ ތެރެއިން ސަރުކާރުގެ އެކިއެކި މުއައްސަސާތަކަށް ސަރުކާރުގެ އެކިއެކި ވުޒާރާތަކަށް ސަރުކާރުގެ އެކިއެކި ސުކޫލުތަކަށް ކޮންމެ ދުވަހަކު ހެނދުނު ޓައީ އަޅައިގެން އޮފީހަށް ނިކުންނަ ފަދައިން ޖަމިއްޔަތުއް ސަލަފަށް ހުސްވެގެން އިލްމުވެރީން އޮފީހަށް ނިކުންނާނެ ދުވަހެއް. އެއީ އަޅުގަނޑުމެންގެ އުންމީދު. އޭނާގެ ހުރިހާ މަސައްކަތެއް ހުސްކުރާނީ ޖަމިއްޔަތުއް ސަލަފަށް. އޭނަގެ އޮފީހަކީ ޖަމިއްޔަތުއް ސަލަފު,"

އެ އަމާޒަށް ވާސިލުވުމަށް އެ ޖަމިއްޔާ އިން ވަރަށް މުހިންމު ގިނަ ކަންތައްތަކެއް ކުރަމުންދާ ކަމަށް ވެސް ވިދާޅުވި އެވެ. ޚާއްސަކޮށް މާލީ ގޮތުން ފުއްދުންތެރި ޖަމިއްޔާއަކަށް ވުމަށް ކުރަމުންދާ މަސައްކަތް ފާހަގަ ކުރެއްވި އެވެ.

އަދި އިލްމު ފެތުރުން އިތުރުކުރުމާއި ހަރުދަނާ މުޖްތަމައުއެއް ބިނާކުރުމަށް ކުރަން ޖެހޭ މަސައްކަތްތަކާއި އެކަމަށްޓަކައި ވަމުންދާ ތައްޔާރީތައް ވިދާޅުވެ ދެއްވި އެވެ. އެ ގޮތުން މާލޭގައި އިމާރާތެއް ކުރުމާއި އެފަދަ އިތުރު މަޝްރޫއުއެއް ވަރަށް އަވަހަށް ފެށުމާއި ހުޅުމާލޭގައި ސުކޫލެއް ބިނާކުރުން ފަދަ މަޝްރޫއުތައް ފާހަގަ ކުރެއްވި އެވެ.

އަޅުގަނޑުމެންނަށް ފެނުނީ އިލްމުވެރީން ބާރުވެރިވާން ޖެހޭ ކަމަށް. ހަގީގަތުގައި އަޅުގަނޑުމެންގެ ތަސައްވުރަކީ އެބާރުވެރިކަމުގެ ތެރެއިން ސަރުކާރުގެ އެކިއެކި މުއައްސަސާތަކަށް ސަރުކާރުގެ އެކިއެކި ވުޒާރާތަކަށް ސަރުކާރުގެ އެކިއެކި ސުކޫލުތަކަށް ކޮންމެ ދުވަހަކު ހެނދުނު ޓައީ އަޅައިގެން އޮފީހަށް ނިކުންނަ ފަދައިން ޖަމިއްޔަތުއް ސަލަފަށް ހުސްވެގެން އިލްމުވެރީން އޮފީހަށް ނިކުންނާނެ ދުވަހެއް. އެއީ އަޅުގަނޑުމެންގެ އުންމީދު. އޭނާގެ ހުރިހާ މަސައްކަތެއް ހުސްކުރާނީ ޖަމިއްޔަތުއް ސަލަފަށް. އޭނަގެ އޮފީހަކީ ޖަމިއްޔަތުއް ސަލަފު

އައްޝައިޚް އަހްމަދު ސަމީރު އިބްރާހިމް | ޖަމިއްޔަތުއް ސަލަފުގެ ނާއިބު ރައީސް

ޝެއިހް ވިދާޅުވީ ޖަމިއްޔަތުއް ސަލަފަކީ ތަރުތީބުވެ ހަރުދަނާ އުސޫލެއްގެ ދަށުން ހިންގާ ޖަމިއްޔާއެއް ކަމަށެވެ. އެ ޖަމިއްޔާ ހިންގަމުން ދަނީ އިލްމުވެރީންގެ މަޖިލީހާއި އެ މަޖިލީހުގެ ދަށުން ހަރަކާތްތެރިވާ ދުވާތުންގެ މަޖިލީހަކާއި މަޝްވަރާ މަޖިލީހެއްގެ އިތުރުން ހަރަކާތްތެރި މެންބަރުންގެ މައްޗަށް ކަމަށް ވިދާޅުވި އެވެ.

"މިއަދު ޖަމިއްޔަތުއް ސަލަފުގެ ބޭފުޅުންނަށް އެނގިވަޑައިގަންނަވާނެ ތިމަންނާއަކީ ޖަމިއްޔަތުއް ސަލަފުގެ ކޮން މަގާމެއްގައި ކޮން ހައިސިއްޔަތަކުން ހުންނަވާ ކޮން ޒިންމާއެއް އަދާކުރައްވަން ޖެހިވަޑައިގަންނަވާ ބޭފުޅެއްކަން. ޖަމިއްޔަތުއް ސަލަފުގެ މީހާ, ޖަމިއްޔަތުއް ސަލަފުގެ މީހާއަށް އަމިއްލައަށް އެނގޭނެ,"

ޖަމިއްޔާގެ މައިގަނޑު ތަސައްވުރަކީ ބޭނުންޖެހޭ ހާލަތްތަކުގައި އިލްމުވެރިންނަށް އެހީތެރިވެދެއްވާނެ ފަދަ ގޮތަކަށް ކަންކަން އިންތިޒާމުވެ ތަރުތީބުވެފައި އޮތުމާއި ޝާމިލްވާނެ ފަދަ އެހީގެ ނިޒާމެއް ގާއިމު ކުރުން ކަމަށް ވިދާޅުވި އެވެ.

އަދި ވިދާޅުވީ ދިވެހިރާއްޖޭގެ ދައުވަތުގެ ހުންގާނު ޖަމިއްޔަތުއް ސަލަފުގެ އަތުގައި އޮތްއިރު މިހާރަށް ވުރެ މާފުޅާކޮށް އެ ޖަމިއްޔާގެ ޚިދުމަތް ރައްޔިތުންނަށް ފޯރުކޮށް ދިނުމަކީ އަމާޒު ކަމަށެވެ.