ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބް، ގާސިމް އިބްރާހިމަށް އަރުވައިފި

ވިޔަފާރިވެރިޔާ އަދި އިޖުތިމާއީގޮތުން އެތަކެއް ހިދުމަތްތަކެއް ކުރައްވަމުން ގެންދަވާ، ގާސިމް އިބްރާހީމަށް ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބު ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަރުވައިފިއެވެ.

ގާސިމަށް ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބު އަރުވާފައިވަނީ، މިހާރު ކުރިއަށްދާ މިނިވަންދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒުއެވެ.

ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބު ގާސިމް އިބްރާހިމަށް އެރުވުމަށް ރައީސުލްޖުމްހޫރިއްޔާ ނިންމެވީ، ރާއްޖޭގެ އިޖުތިމާޢީ، އިޤްތިޞާދީ، ތަޢުލީމީ ދާއިރާގެ އިތުރުން ދިވެހި ދައުލަތަށް އަގުހުރި ޚިދުމަތްތަކެއް ކުރައްވާފައިވާ ބޭފުޅަކަށް ވާތީއެވެ. އަދި ނިޝާން މުލީގޭ ޝަރަފުގެ ޢިއްޒަތް އެމަނިކުފާނަށް އެރުވި ފަހުންވެސް އެކިއެކި ދާއިރާތަކުން ގާސިމް އިބްރާހީމް މިހާތަނަށް ކުރައްވާފައިވާ މިންނެތް މަސައްކަތްޕުޅުގެ ސަބަބުންކަމަށް ރައީސުލްޖުމްހޫރިއްޔާގެ އޮފީހުން ބުނެއެވެ.

ގާސިމް އިބްރާހީމަކީ އެމަނިކުފާނުގެ ޒުވާން އުމުރުން ފެށިގެން، މެދުކެނޑުމެއްނެތި ދިވެހިރާއްޖޭގެ ތަރައްޤީއަށާއި، ވިޔަފާރިއަށާއި، އިޤްތިޞާދަށް އަގުހުރި ޚިދުމަތްތަކެއް ކުރައްވަމުން ގެންދަވާ ބޭފުޅެކެވެ. ޤާސިމްގެ ދަރުމަވެރި ޚިދުމަތްތަކަކީ، ރާއްޖޭގައި އަމިއްލަ ފަރުދަކު މިހާތަނަށް ފޯރުކޮށްދެމުންދާ އެންމެ ފުޅާ ދާއިރާގެ ދަރުމަވެރި ޚިދުމަތްތަކެވެ.

ވޭތުވެދިޔަ ފަންސާހަކަށް އަހަރު ދުވަހުގެ ތެރޭގައި ދިވެހިރާއްޖެއަށް އައިސްފައިވާ އަދި އަންނަމުންދާ ތަރައްޤީގައި ޤާސިމްގެ ހިއްސާ ފާހަގަކޮށްލެވޭ މިންވަރަށް ބޮޑެވެ. އެބޭފުޅާ ކުރައްވާފައިވާ ތަޖުރިބާތައް ގިނަގުނައެވެ. ބިނާކުރެއްވި ދިވެހި ތަޢުލީމީ ޖީލު ފުޅާވެގެންވެއެވެ. ދިވެހިރާއްޖޭގެ ޑިމޮކްރެޓިކް ޙަޔާތުގައި ގާސިމް އިބްރާހީމް ކުރައްވާފައިވާ މަސައްކަތްޕުޅުތަކަކީވެސް އާރާސްތު މަސައްކަތްޕުޅުތަކެކެވެ.

ރާއްޖެއަށް ޑިމޮކްރަސީ ތަޢާރަފްކުރުމަށް އެކުލަވާލެވި، ފާސްކުރެވި، ޢަމަލުކުރެވެމުންދާ ޤާނޫނުއަސާސީއަކީ އެބޭފުޅާ ރައްޔިތުންގެ ޚާއްޞަ މަޖިލީހުގެ ރިޔާސަތުގައި އިންނަވައިގެން، ކުރިމަތިވެވަޑައިގެންނެވި ގޮންޖެހުންތަކާއެކު ޙާޞިލުކުރެއްވި ނަތީޖާއެކެވެ. އަދި މި ވޭތުވެދިޔަ އަހަރުތަކުގައި އެ ޤާނޫނުއަސާސީއާއި ޑިމޮކްރަސީއާއި ދިވެހިރާއްޖޭގެ މިނިވަންކަމުގެ ދިފާޢުގައި، އެއްވެސް ފަސްޖެހިވަޑައިގަތުމެއްނެތި ކުރިއަށް ނުކުމެވަޑައިގެން ކުރައްވާފައިވާ މަސައްކަތްޕުޅުތަކަކީވެސް، ފާހަގަކުރެވިގެންދާ މުހިންމު އަދި ބުރަދަން ހުރި މަސައްކަތްޕުޅުތަކެކެވެ.

ގާސިމް އިބްރާހީމަކީ މިހާރުވެސް ރައްޔިތުން މަޖިލީހުގެ މާމިގިލީ ދާއިރާ ތަމްސީލް ކުރައްވަމުން ގެންދަވާ މެމްބަރެވެ.