އޭސީސީއަށް 17 އަހަރު: ދައުލަތަށް 1.6 ބިލިއަން ހޯދަން އެންގި

އެންޓި-ކޮރަޕްޝަން ކޮމިޝަން (އޭސީސީ) އުފެދުނު ފަހުން މިހާތަނަށް ކޮމިޝަނުން ނިންމާފައިވާ މައްސަލަތަކުގެ ތެރެއިން ދައުލަތަށް އަނބުރާ ލިބެންޖެހޭ ފައިސާގެ ޖުމްލަ އަދަދު 1.6 ބިލިއަން ރުފިޔާއަށް ވުރެ އިތުރުވެފައިވާ ކަމަށް ކޮމިޝަނުގެ ރައީސް އާދަމް ޝާމިލް ވިދާޅުވެއްޖެ އެވެ.

އޭނާ މިހެން ވިދާޅުވީ، ބައިނަލްއަޤްވާމީ އެންޓި-ކޮރަޕްޝަން ދުވަސް ފާހަގަކުރުމަށް ބޭއްވި ރަސްމިއްޔާތެއްގައި ވާހަކަދައްކަވަމުންނެވެ.

ޝާމިލް ވިދާޅުވި ގޮތުގައި 2009 ވަނަ އަހަރުން ފެށިގެން 2025 ވަނަ އަހަރުގެ ނިޔަލަށް، އޭސީސީގެ ތަހުގީގުތަކުން ދައުލަތުން ގެއްލިފައިވާ ފައިސާގެ ގޮތުގައި، އެކި އިދާރާތަކަށް 1,607,657,428.66 ރުފިޔާއަށްވުރެ ގިނައިން އަނބުރާ ހޯދަންޖެހޭ ކަމަށް އަންގާފައިވެ އެވެ.

އަދި ކޮމިޝަނުން ނިންމި މައްސަލަތަކުގެ ތެރެއިން ދައުލަތަށް ލިބެންޖެހޭ ފައިސާގެ ޖުމްލަ އަދަދު 17 އަހަރަށް ބަހާލާނަމަ، އަހަރަކަށް 94,568,084.04 ރުފިޔާ އަދި މަހަކަށް 7,880,673.67 ރުފިޔާ ދައުލަތަށް އަނބުރާ ހޯދުމަށް އަންގާފައިވާކަން ފާހަގަ ކުރެއްވި އެވެ.

އޭނާ ވަނީ ކޮމިޝަނަށް ދައުލަތުން ކުރާ ހަރަދަކީ ބޭކާރު ހަރަދެއް ނޫން ކަމަށް ދެއްކުމުގެ ގޮތުން އެ ފައިސާއާ ދައުލަތުން ކުރާ ހޭދަ އަޅާ ކިޔުއްވާފަ އެވެ. ވިދާޅުވީ މި ތަފާސްހިސާބުން، ފާއިތުވެދިޔަ 17 އަހަރު ދައުލަތުގެ ބަޖެޓުން އޭސީސީގެ ހިންގުމަށް ހަރަދުކޮށްފައިވާ ކޮންމެ 1 ރުފިޔާއަކަށް، މަދުވެގެން 2.85 ރުފިޔާ ދައުލަތަށް އަނބުރާ ހޯދުމަށް ކަމާގުޅޭ މުއައްސަސާތަކަށް ކޮމިޝަނުން އަންގާފައިވާ ކަމަށެވެ.

އޭސީސީ ހިންގުމަށް 2009 ވަނަ އަހަރުން ފެށިގެން 2025 ވަނަ އަހަރާ ހަމައަށް އޭސީސީގެ ބަޖެޓުގެ ގޮތުގައި، ސަރުކާރުގެ ބަޖެޓުން ޖުމުލަ 564,111,207.76 ރުފިޔާ ހަމަޖައްސާފައިވެ އެވެ. އެއީ އަހަރަކަށް 33,183,012.22 ރުފިޔާ އަދި މަހަކަށް ނަމަ 2,765,251.02 ރުފިޔާ އެވެ.

ޝާމިލް މިހެން ވިދާޅުވި ނަމަވެސް އޭސީސީއަަކީ ރައްޔިތުންގެ އެންމެ އިތުބާރު ކުޑަ އެއް މުއައްސަސާ އެވެ. އެ ކޮމިޝަންގެ މިނިވަން ކަމާއި މުސްތަގިލު ކަމާމެދުވެސް އާންމުންް ސުވާލު އުފައްދަ އެވެ. ގިނަ ބަޔަކު އޭސީސީ ސިފަ ކުރަނީ އޭރަކު އޮންނަ ސަރުކާރަކަށް ބިރުން މަގާމު ދިފާއުކުރަން މަސައްކަތް ކުރާ މެންބަރުން ތަކެއް ތިބޭ ކޮމިޝަނެއްގެ ގޮތުގަ އެވެ.

ނިމިދިޔަ ސަރުކާރުގައިވެސް އޭސީސީގެ މަސައްކަތް ފެނުނީ އެ ގޮތަށެވެ. އޭސީސީން މަސައްކަތް ކުރާ ކަމަށް ފެންނަން ފެށީ ރިޔާސީ އިންތިހާބުން އޭރު އޮތް ސަރުކާރު ބަލިވުމުންނެވެ.