17 އަހަރުން ދަށުގެ އޭޝިއަންކަޕް ކޮލިފައިންގައި ރާއްޖެ ވަރުގަދަ ގުރޫޕެއްގައި

2026 ވަނަ އަހަރު ސައުދީ އަރަބިއްޔާގައި އޮންނަ 17 އަހަރުން ދަށުގެ އޭޝިއަން ކަޕް ކޮލިފައިންގައި ދިވެހިރާއްޖެ ގުރޫޕް އެފްގައި ވާދަކުރަން ޖެހިއްޖެއެވެ.

މެލޭޝިއާގައި ހުންނަ އޭއެފްސީ ހައުސްގައި ބުރާސްފަތި ދުވަހު ބޭއްވުނު މުބާރާތުގެ ގުރުލުމުގެ ރަސްމިޔާތުގައި ގުރޫޕް އެފްގައި ރާއްޖޭގެ އިތުރުން ދެން ހިމެނެނީ ތުރުކުމެނިސްތާން، މޮންގޯލިއާ، ކުވެއިތު އަދި ތައިލެންޑެވެ.

ރާއްޖެ ހިމެނޭ ގުރޫޕް އެފްގެ މެޗުތައް ކުޅެން ހަމަޖެހިފައިވަނީ ތައިލޭންޑްގެ ޗޮންބުރީގައި ނޮވެމްބަރު 22 އިން 30 އަށެވެ. ފުރަތަމަ މެޗުގައި ރާއްޖެ އިން މޮންގޯލިއާއާ ދެކޮޅަށް ނޮވެމްބަރު 22 ނުކުންނައިރު، ދެވަނަ މެޗުގައި ނޮވެންބަރު 24 ނުކުންނާނީ ތުރުކުމެނިސްތާނާއި ދެކޮޅަށެވެ. އަދި ނޮވެމްބަރު 26 ގައި ތައިލޭންޑާ ދެކޮޅަށް ކުޅުމަށްފަހު، ކޮލިފައިންގެ ފަހު މެޗުގައި ނޮވެމްބަރު 28 ގައި ދިވެހި ޓީމު ނުކުންނާނޯ ކުވެއިތާ ދެކޮޅަށެވެ.

އޭޝިއަން ކަޕް ކޮލިފައިންގެ ކުރިން ރާއްޖޭގެ 17 އަހަރުން ދަށުގެ ޓީމު މިއަހަރު ސެޕްޓެމްބަރު 15 އިން 27 އަށް ސްރީލަންކާގެ ކޮލަމްބޯ ރޭސްކޯސް ސްޓޭޑިއަމްގައި ބާއްވާ ސާފް މުބާރާތުގައި ވާދަކުރުމަށް ވަނީ ހަމަޖެހިފައެވެ. އަދި މި މުބާރާތުގައި ރާއްޖެ ހިމެނެނީ އިންޑިއާ، ޕާކިސްތާން އަދި ބޫޓާނާއެކު ގުރޫޕް ބީގައެވެ.

އޭޝިއަން ކަޕް ކޮލިފައިންގައި ވާދަކުރާ 38 ޓީމު ވަނީ ހަތް ގުރޫޕަކަށް ބަހާލާފައެވެ. މި ސަރަހައްދުގެ އެންމެ ވަރުގަދަ ގައުމު އިންޑިއާ ހިމެނެނީ ގުރޫޕް ޑީގައެވެ. އަދި ނޭޕާލް ގުރޫޕް ޖީގައި އޮތްއިރު، ބަނގްލަދޭޝް އޮތީ ސްރީލަންކާއާއެކު ގުރޫޕް އޭގައެވެ. ބޫޓާން ހިމެނެނީ ގުރޫޕް އީގައެވެ.

މީގެ އިތުރުން، މީގެ ކުރިން ދެ އަހަރުން އެއް އަހަރު ބާއްވަމުން އައި 17 އަހަރުން ދަށުގެ އޭޝިއަން ކަޕް، 2026 ވަނަ އަހަރުން ފެށިގެން ކޮންމެ އަހަރަކު ބާއްވާ ގޮތަށް އޭޝިއަން ފުޓްބޯލް ކޮންފެޑެރޭޝަން (އޭއެފްސީ) އިން ވަނީ ނިންމާފައެވެ.