ވިޒިޓް މޯލްޑިވްސް އިން އާ ލޯގޯއަކާއި އާ ބްރޭންޑް އައިޑެންޓިޓީއެއް

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ވިޒިޓް މޯލްޑިވްސް) އިން ދިވެހިރާއްޖޭގެ ޓޫރިޒަމް ބްރޭންޑަށް ބަދަލު ގެނެސްފި އެވެ.

އެމްއެމްޕީއާރުސީން ބުނީ މިއީ ވިސްނުންތެރި އިސްލާހުތަކަކާ އެކު އިތުރަށް ފުރިހަމަ ކުރެވިފައިވާ ލޯގޯއަކާއި ބްރޭންޑް އައިޑެންޓިޓީއެއް ކަމަށެވެ. މިއީ މަދު އިސްލާހުތަކެއް ނަމަވެސް، މިއީ ރޭވުންތެރިކަމާއެކު ގެނެވިފައިވާ ބަދަލުތަކެއް ކަަމަށާ މި ބަދަލުތަކުގެ ސަބަބުން، ހުރިހާ ވަސީލަތެއްގައި ވެސް އެއްހަމަ އަދި ފާހަގަކޮށްލެވޭފަދަ ވިޝުއަލް ޕްރެޒެންސްއެއް ގާއިމުކުރެވޭނެ ކަމަށެވެ.

އިތުރަށް ފުރިހަމަކުރުމަށް ގެނެވުނު ބަދަލުތަކުގެ ތެރޭގައި، ލޯގޯގެ ކުލަތަކުގެ ޓޯންތަކަށް ގެނެވުނު ކުދިކުދި ބަދަލުތަކަކާއި، ހުޅުވިފައިވާ، ހާމަތަންތަނުގައި އިޝްތިހާރު ހަރުކުރެވޭއިރު ބަލާމީހުންނަށް ފަސޭހައިން ދެނެގަނެވޭނެފަދަ ގޮތަކަށް ބައްޓަން ކުރުމަށް ލޯގޯޓައިޕަށް ގެނެވުނު ބަދަލުތައް ހިމެނޭ ކަމަށް ވެސް ބުންޏެވެ.

އަދި މުޅި ސިފަ ކުރިއާ އެއްގޮތަށް ބަހައްޓާފައިވީ ނަމަވެސް، މި އިސްލާހުތަކާއެކު ލޯގޯ އެއް ހަމައެއްގައި ބޭނުންކުރެވި، ބްރޭންޑް ރެކޮގްނިޝަން ވަރުގަދަވާނެ ކަމަށް ބުންޏެވެ.

ލޯގޯއަށް ގެނައި އިސްލާހުތަކާއެކު، ބްރޭންޑިންގެ ހަމަތަށް ވެސް ވަނީ މުއާސަރު ކޮށްފައި ކަމަށާ އެގޮތުން ބޭނުންކުރާ ފޮންޓުތަކާއި ލުއިކުރެވިފައިވާ ޑިޒައިން އުންސުރުތަކުން މަންޒިލާ ގުޅޭ މަންޒަރުތަކަށް އިތުރު އަހައްމިއްޔަތުކަމެއް ދެވި، އިތުރު ގްރެފިކްސްތަކަށް ބަރޯސާވުން މަދުކުރެވޭނެ ކަމަށެވެ. މީގެ ސަބަބުން ހުރިހާ މުއާމަލާތެއްވެސް އިތުރަށް ސާފުވެ އަދި ގުޅިލާމެހިފައިވާ ވިޝުއަލް ބަހުރުވައެއް ކަށަވަރު ވާނެ ކަމަށް ވެސް ބުންޏެވެ.

މި މަހުގެ ހަވަނަ ދުވަހުން ފެށިގެން ހުރިހާ މަންސަތަކެއްގައި އަދި ވަސީލަތްތަކެއްގައިވެސް މިހާރު ބޭނުން ކުރަމުން ދަނީ އިސްލާހު ކޮށްފައިވާ ލޯގޯ އަދި ބްރޭންޑިން ކަމަށް އެމްއެމްޕީއާރުސީން ވަނީ ބުނެފަ އެވެ.