ޑިވެލޮޕްމެންޓް ބޭންކްގެ ލައިސަންސް މި ހަފްތާ ތެރޭ ދޫކުރެވޭނެ: ގަވަރުނަރު މުނައްވަރު

ރާއްޖޭގެ ފުރަތަމަ ޑިވެލޮޕްމަންޓް ބޭންކް، ޑިވެލޮޕްމެންޓް ބޭންކް އޮފް މޯލްޑިވްސް އުފެއްދުމަށްޓަކައި ބޭނުންވާ ލައިސަންސް މި ހަފްތާ ތެރޭ ދޫކުރެވޭނެކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.

މުނައްވަރު މިފަދައިން ވިދާޅުވީ، ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުންނެވެ.

މިގޮތުން މުނައްވަރު ވިދާޅުވީ، ޑިވެލޮޕްމެންޓް ބޭންކުގެ ލައިސަންސް ދިނުމަށް ބޭނުންވާ ދިރާސީ މަސައްކަތް ނިމި، އެމްއެމްއޭގެ ބޯޑުން ފާސްކޮށްފައިވާކަމަށާއި، އެއާއެކު މި ހަފްތާ ތެރޭގައި ބޭންކް ލައިސަންސް ދެވި ވަރަށް އަވަހަށް މަސައްކަތް ފެށިގެންދާނެކަމަށް އުއްމީދު ކުރައްވާކަމަށެވެ.

މިފަދަ މާލީ އިދާރާތައް ރާއްޖޭގެ ބޭންކިން ނިޒާމަށް ވަރަށް މުހިންމުކަން ފާހަގަކުރައްވައި މުނައްވަރު ވިދާޅުވީ، ޓުއަރިޒަމް އިންޑަސްޓްރީގެ ހަދަމުންދާ ނުވަތަ މަސައްކަތް ހުއްޓިފައިވާ ރިސޯޓުތަކަށް ބޭންކުން ސަމާލުކަން ދޭން ޖެހޭ ކަމަށެވެ.

"އަޅުގަނޑުމެން މިހެދޭ ޤަވާއިދުތަކުގެ އެއް މަޤްޞަދަކަށް ވަނީ މާލީ ނިޒާމު ކުރިއަރައި ދިއުން. އެގޮތަށް ކުރިއަރައިގެންދާއިރު ސަރުކާރުން މި މަސައްކަތް ލީޑް ކުރުމަށް އުފައްދާ ބޭންކެއްގެ ގޮތުގައި އަޅުގަނޑަށް ޑިވެލޮޕްމެންޓް ބޭންކް ފާހަގަވަނީ. އަޅުގަނޑު ދެކެނީ އެ ބޭންކުން ވަރަށް ބޮޑަށް ސަމާލުކަން ދޭން ޖެހެއޭ ޓުއަރިޒަމް އިންޑަސްޓްރީގެ ހަދަމުންދާ ނުވަތަ މަސައްކަތް ހުއްޓިފައިވާ ރިސޯޓުތަކަށް."

މުނައްވަރު ވިދާޅުވިއެވެ.

މީގެ އިތުރުންވެސް މުނައްވަރު ވިދާޅުވީ، އިންޓަނޭޝަނަލް ފައިނޭންޝަލް ސެންޓަރ ޤާއިމްކުރަން ޖެހެނީވެސް މާލީ ނިޒާމުގެ ޤާބިލީއްޔަތުކަން އިތުރުކުރަންކަމަށާއި، އޭގެ ސަބަބުން  ބޭރު ޤައުމުތަކުން މިފަދަ މަޝްރޫޢުތަކަށް ފައިނޭންސް ހޯދުމުގެ ބަދަލުގައި ރާއްޖޭގެ ބޭންކިން ނިޒާމުގެ ތެރެއިން މި މަޝްރޫޢުތަކަށް ފައިނޭންސް ކުރެވި އޭގެ މަންފާ ލިބިގެންދާނެކަމަށެވެ.

ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ރާއްޖޭގެ ޑިވެލޮޕްމެންޓް ބޭންކު އުފައްދާވާފައި ވަނީ މޭމަހުގެ 16 ވަނަ ދުވަހުއެވެ.

އެއާއިއެކު، ބޭންކް އުފެއްދުމަށްޓަކައި، ބޭނުންނާ ލައިސަންސް ހޯދުމަށް އެމްއެމްއޭ އަށް ހުށަހަޅާފައިވާކަން އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވަނީ މިދިޔަ ޖުލައި މަހުގެ 28 ވަނަ ދުވަހު ހާމަކުރައްވާފައެވެ.