ކ.ގުރައިދޫގައި މަރުވި، 4 މަހުގެ ކުއްޖެއްގެ މަރުގައި ޝައްކުތަކެއް އުޅޭތީ އެކަން ބަލަނީ!
ލިޔުންތެރިޔާ
އަބްދުﷲ ހުސައިން
މާލެ އަތޮޅު ގުރައިދޫގައި މަރުވި، 4 މަހުގެ ކުއްޖެއްގެ މަރުގައި ޝައްކުކުރެވޭ ކަންތައްތަކެއް ހުރުމުން އެ މައްސަލަ ތަހުގީގުކުރަން ފަށައިފިއެވެ.
ވޮއިސްއަށް މައުލޫމާތު ލިބިފައިވާ ގޮތުގައި މިކަމެއް ފެންމަތިވެފައިވަނީ ރޭ ދަންވަރުގެ ވަގުތެއްގައްެވެ. އެއީ ކުއްޖާ ހޮސްޕިޓަލަށް ގެންދިޔަ ހިސާބުންނެވެ. މިކަމާ ގުޅޭގޮތުން ގުރައިދޫ ކައުންސިލް މެމްބަރަކު ބައެއް މީޑިއާތަކުގައި ބުނެފައިވަނީ، 4 މަހުގެ އެ ކުއްޖާ ހޮސްޕިޓަލަށް ގެންދިޔައިރުވެސް އޮތީ މަރުވެފައިކަމަށެވެ.
މިކަން އެނގޭ ފަރާތަކުން ނަން ނުޖެހުމަށް ޝަރުތުކޮށް ވޮއިސްއާ ވާހަކަދައްކަމުން ބުނީ ކުއްޖާގެ ނޭފަތުންވެސް ލޭ އައިސްފައި ހުރިކަމަށާއި، އެކަން ފުލުހުންގެ ސަމާލުކަމަށް ގެނައީ ސިއްހީމަރުކަޒުގެ ފަރާތުންކަމަށެވެ. ކުއްޖާ ހިނެވުމުގެ މަސައްކަތް ކުރިއަށްގެންދަން އުޅުނު ނަމަވެސް އެކަން ނުވީ، ކުއްޖާ މަރުގެ މައްސަލަ ބަލުމަށް ހަށިގަނޑު މާލެގެންދަންޖެހޭކަމަށް ފުލުހުން ބުނުމުންކަމަށްވެސް އޭނާ ބުންޏެވެ.
ކުއްޖާ މިހާރު އޮތީ ގަލޮޅު މޯޗަރީގައެވެ. މިކަމާ ގުޅޭގޮތުން މީޑިއާ އާ ވާހަކަދައްކަމުން ފުލުހުން ބުނީ ކުއްޖާ މަރުގެ މައްސަލަ މިއަދުގެ ވަގުތެއްގައި ފުލުހުންނަށް ރިޕޯޓްކޮށްފައިވާކަމަށާއި، ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް ފޮނުވުމަށް ނިންމާފައިވާކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
