ކޮންމެ ފަރުދެއްގެވެސް ނަފުސާނީ ދުޅަހެޔޮކަމަށް ސަމާލުވާންޖެހޭ: މެޑަމް ސާޖިދާ

އޮފީހަށް އަންނައިރު ކޮންމެ މުވައްޒަފެއްގެ ހިތުގައިވެސް އާއިލީ، ޞިއްޙީ، އަދި ދަރިންގެ ކިޔެވުން ފަދަ ކަންކަމާއި ގުޅޭ ތަފާތު ފިކުރުތަކާއި އުދާސްތައް ހުންނާނެކަމަށާ، ކޮންމެ ފަރުދެއްގެވެސް ނަފުސާނީ ޙާލަތަށް ފަރުވާތެރިވާން ޖެހޭނެ ކަމުގައި ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުޙައްމަދު ވިދާޅުވެއްޖެއެވެ.

ނޭޝަނަލް މެންޓަލް ހެލްތު ޑިޕާޓްމަންޓް (އެންއެމްއެޗްޑީ) އާއި ސިވިލް ސަރވިސް ކޮމިޝަން (ސީއެސްސީ) އަދި ޑަބްލިއުއެޗްއޯ މޯލްޑިވްސް ގުޅިގެން ސިވިލް ސަރވިސްގެ ސުޕަވައިޒަރުންނާއި މެނޭޖަރުންނަށް އަމާޒުކޮށް ދެ ދުވަހަށް ކުރިއަށް ގެންދާ މި މަހާސިންތާގައި ވާހަކަފުޅުދައްކަވަމުން އެކަމަނާ ވިދާޅުވީ އޮފީހަށް އަންނައިރު ކޮންމެ މީހެއްގެ ހިތުގައި ވެސް ޢާއިލީ ކަންބޮޑުވުންތަކާއި ޞިއްޙީ އަދި ދަރިންގެ ކިޔެވުން ފަދަ ތަފާތު ފިކުރުތައް ހުންނާނެ ކަމަށެވެ.

އެހެންކަމުން އެ އެންމެންގެ ނަފުސާނީ ޙާލަތަށް ސަމާލުކަން ދޭން ޖެހޭ ކަމަށް ވިދާޅުވެ ސިވިލް ސަރވިސްގައި އެތައް ހާސް މުވައްޒަފުންނެއް ޚިދުމަތް ކުރަމުން އަންނައިރު އެ މީހުންގެ ދުޅަހެޔޮކަމަށް ފާރަވެރިވުމުގެ މުހިންމުކަން ފާހަގަކުރެއްވިއެވެ.

ދުނިޔޭގެ ޞިއްޙަތު ޖަމިއްޔާގެ ތަފާސްހިސާބުތަކާ ހަވާލާދެއްވައި އެކަމަނާ ވިދާޅުވީ ޑިޕްރެޝަނާއި ހާސްކަމުގެ ސަބަބުން ކޮންމެ އަހަރަކު ގާތްގަނޑަކަށް 12 ބިލިއަން މަސައްކަތު ދުވަސް ދުނިޔެއިން ގެއްލޭ ކަމަށެވެ. އެއީ އުފެއްދުންތެރިކަމުގެ ނިސްބަތުން ބަލާނަމަ އެއް ޓްރިލިއަން އެމެރިކާ ޑޮލަރުގެ ގެއްލުމެއް ކަމަށެވެ. ހަމައެއާއެކު 2021 ވަނަ އަހަރުގެ ސްޓެޕްސް ސާރވޭ ދައްކާ ގޮތުން ރާއްޖޭގައި ކޮންމެ ފަސް މީހަކުން އެކަކީ ޑިޕްރެޝަންގެ ޢަލާމާތްތައް ތަޖުރިބާކުރާ މީހެއް ކަމަށް ވިދާޅުވެ މަސައްކަތުގެ މާޙައުލުގައި ހުރި ތަފާތުކުރުންތަކާއި ނުތަނަވަސްކަން ނައްތައިލުމަށް ގޮވާލެއްވިއެވެ.

މީގެ އިތުރުން ދިރާސާތަކުގެ މައްޗަށް ބިނާކޮށް ޢިލްމީ އަދި ޢަމަލީ ކަރުދާސްތައް އެކުލަވައިލައި ދިވެހި އޮފީސްތައް މުވައްޒަފުންގެ ނަފުސާނީ ރައްކާތެރިކަން ޔަޤީންވާ ތަންތަނަށް ހެދުމަށް ވެސް އެކަމަނާ ބާރުއެޅުއްވިއެވެ. ހުރިހާ މުވައްޒަފުންނަށް ވެސް އިޙްތިރާމްކުރެވޭ އެކުވެރި މާޙައުލެއް ބިނާކޮށްގެން އުފެއްދުންތެރިކަން މައްޗަށް ގެންދެވޭނެ ކަމަށް ވިދާޅުވިއެވެ.

މި ރަސްމިއްޔާތުގައި ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ ޢަލީ އާއި ސީއެސްސީގެ ރައީސް އަލްއުސްތާޛު މުޙައްމަދު މުޖްތާޒްގެ އިތުރުން މެންޓަލް ހެލްތު ޑިޕާޓްމަންޓުގެ އިސްވެރިންނާއި ދައުލަތުގެ އެކި އިދާރާތަކުގެ އިސް ބޭފުޅުން ބައިވެރިވެވަޑައިގެންނެވިއެވެ. މި މަހާސިންތާ ދެ ދުވަހުގެ މުއްދަތަށް ކުރިއަށް ދާނެއެވެ.