ހަރަދުތައް ހަމަޖައްސަން 5 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހަޅަނީ

ދައުލަތުގެ ހަރަދުތައް ހަމަޖެއްސުމަށް 5 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހެޅުމަށް ސަރުކާރުން ނިންމައިފިއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މާލީ ވަޒީރު މޫސާ ޒަމީރު ވިދާޅުވީ، ހިނގަމުންދާ އަހަރުގެ ހަރަދުތައް ކުރުމަށް ސަޕްލިމެންޓްރީ ބަޖެޓެއް މަޖިލީހަށް ހުށަހެޅުމަށް ތައްޔާރުވަމުންދާކަމަށެވެ. ވަޒީރު ވިދާޅުވީ ކޭޝްފްލޯ ހުރިގޮތުން ހަރަދުތަކެއް ކުރުމަށް ދަތިވާކަމަށާއި، އެހެންކަމުން އެ ހަރަދުތައް ކުރުމަށް ތައްޔާރުވަމުންދާކަމަށެވެ.

ސަޕްލިމެންޓްރީ ބަޖެޓްގެ ގޮތުގައި ހުށަހަޅާނީ ކިހާވަރެއްކަން ނިންމާނީ ކެބިނެޓާ އަދި ކަމާ ގުޅުންހުރި މުއައްސަސާތަކާ މަޝްވަރާކުރުމަށްފަހުކަމަށް ފިނޭންސް މިނިސްޓަރު ވިދާޅުވިއެވެ. މިދިޔަ އަހަރުވެސް ސަޕްލިމެންޓްރީ ބަޖެޓެއް ހުށަހަޅާފައިވާއިރު، އެއީ 6.5 ބިލިއަން ރުފިޔާއެވެ.

ސަރުކާރުން ކުރިން ބުނެފައިވަނީ ހަރަދުތައް ކުޑަނުކޮށްފިނަމަ މިއަހަރު 10 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހަޅަން ޖެހިދާނެ ކަމަށެވެ. ނަމަވެސް ހަރަދުކުޑަކުރުމަށް އެޅުނު ފިޔަވަޅުތަކާއެކު އެ އަދަދު ކުޑަވެގެންދާނޭކަމަށް ފިނޭންސް މިނިސްޓަރު މިއަދު ވަނީ ވިދާޅުވެފައެވެ.

ރައްޔިތުންގެ މަޖިލީހުން މިއަހަރު ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ. ބަޖެޓަށް އާމްދަނީގެ ގޮތުގައި ލިބޭނޭކަމަށް ލަފާކުރީ 33.5 ބިލިއަން ރުފިޔާއެވެ. ޑެފިސިޓް ހުންނާނޭކަމަށް ލަފާކޮށްފައިވަނީ 16.3 ބިލިއަން ރުފިޔާގައެވެ.