ތުއްތު ކުދިން ފޯސްޓާކުރާ، ސަރުކާރު ވަޒީފާތަކުގައި އުޅޭ ބެލެނިވެރިންނަށް ޚާއްސަ ޗުއްޓީއެއް ދެނީ
ސަރުކާރުގެ ވަޒީފާގައި އުޅޭ ފަރާތްތައް ޤާނޫނީ ބެލެނިވެރިކަމާ ހަވާލުވާއިރު، އެފަރާތްތަކަށް ޚާއްޞަ ޗުއްޓީއެއް ދޭން ނިންމާފައިވާ ކަމަށް އިޖްތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.
އެ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ، ދައުލަތުގެ ބެލުމުގެ ދަށަށް ގެނެވޭ ކުދިން ފޯސްޓާ ކުރުމާއި ގުޅޭ ގޮތުން ހުރި އެކި ކަންބޮޑުވުންތައް ސަރުކާރަށް ހުށަހެޅިފައިވާ ކަމަށެވެ.
އޭގެ ތެރެއިން އެއް ކަންބޮޑުވުމަކީ ކުދިންނާއެކު ވަގުތު ހޭދަކުރަން ނުލިބޭ މައްސަލަ ކަމަށާ، ޚާއްސަކޮށް އެންމެ ތުއްތު ކުދިން ފޯސްޓާ ކުރާ ބެލެނިވެރިންނަށް އެކުދިން ތުއްތު އިރު ކުދިންނަށް އަޅާލައި ވަގުތު ހޭދަ ނުކުރެވުން ކަން ވަޒީރު ފާހަގަކުރެއްވިއެވެ.
ކުދިންނާ ހަވާލުވާއިރު ވަރަށް ތުއްތު ކުދިން. ވަރަށް ގިނަ ފަހަރަށް އެ ކުދިންނަކީ ހޮސްޕިޓަލުތެރެއިން، ވިހައި ނިމިގެން، އެންއައިސީޔޫ ތެރޭގައި އަދި އޭގެ ފަހުން ވޯޑުގެ ތެރޭގައިވެސް މަހެއްހާ ދުވަހު އެކުދިން، ބަލަހައްޓަންޖެހޭ. އެ ބަލަހައްޓާ މުއްދަތު ތެރޭގައި ވަޒީފާ އަދާކުރާ ފޯސްޓާ ބެލެނިވެރިން ވަޒީފާއަށް ދަމުން ހޮސްޕިޓަލުގައި ގިނައިރުތަކެއްވާންދެން ތިބޭންޖެހޭ.
އިޖްތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް
ވަޒީރު ވިދާޅުވީ، ވިހެއުމުގެ ޗުއްޓީގެ ގޮތިގައި އަންހެނުންނަށް 6 މަސްދުވަސް، އަދި ފިރިހެނުންނަށް 1 މަސް ލިބޭ ކަމަށާ، އެހެންކަމުން، ފޯސްޓާ ބެލެނިވެރިންނަށްވެސް ޚާއްސަ ޗުއްޓީއެއް ދިނުމާމެދު މަޝްވަރާކުރެވިފައިވާ ކަމަށެވެ.
މި އޭޕްރީމްމަހު ފޯސްޓާކުރާ ފަރާތްތަކަށްވެސް ޚާއްސަ ޗުއްޓީއެއް ލިބޭ ގޮތަށް މިހާރު ހަމަޖެހިފައި އެ އޮތީ. އެއީ އަޅުގަނޑުމެންގެ ކުދިންނާ، އެ ކުދިންނާ ހަވާލުވާން ތިބި މީހުންނަށް ލިބިގެންދާ ބޮޑު ލުޔަކަށްވާނެ
އިޖްތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް
ހޮސްޕިޓަލުގެ ތެރެއިން ނޫން ގޮތަށް ފޯސްޓާ ކުރެވޭ އެކުދިންނާ ގާތް ގުޅުމެއް އުފެއްދުމަށް ވަގުތުތަކެއް ބޭނުންވާ ކަމަށާ، އެފަރާތްތަކަށްވެސް ޗުއްޓީ ދިނުމާމެދު މަޝްވަރާކުރެވި އެކަންވެސް ހަމަޖެހިފައިވާ ކަމަށް ވަޒީރު ވިދާޅުވިއެވެ. މި ޗުއްޓީގެ ސަބަބުން ފޯސްޓާ ކުރާ ބެލެނިވެރިންނާއި އެ ކުދިންނާ ދެމެދު ރަނގަޅު ގުޅުމެއް އުފެދިގެންދާނެކަން ވަޒީރު ފާހަގަކުރެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
