ބަންކަރިން ހިދުމަތް މިހާރު ދޭނީ އެންމެ ފައިދާ ނެރެވޭ ގޮތަށް: ޝިމާދު
ލިޔުންތެރިޔާ
އަބްދުﷲ ހުސައިން
ބަންކަރިން ހިދުމަތް މިއަދު ރާއްޖޭގައި ފަށާފައިވާއިރު، މިހާރު އެ ހިދުމަތްދޭނީ ފައިދާ ނެރެވޭ އެންމެ ރަނގަޅުގޮތަށްކަމަށް އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހިމް ވިދާޅުވެއްޖެއެވެ.
ސަރުކާރުން މިއަދު ވަނީ އިހަވަންދިއްޕޮޅުގައި ބަންކަރިން ހިދުމަތް ރަސްމީކޮށް ފަށާފައެވެ. ބަންކަރިން ހިދުމަތް ފެށުމުގެ ރަސްމިއްޔާތުގައި ވާހަކަދައްކަވަމުން ބަންކަރިން ހިދުމަތުގައި އެންމެ އިސްދައުރެއް އަދާކުރާ އެއް ކުންފުނި އެސްޓީއޯގެ މެނޭޖިންގ ޑިރެކްޓަރު ވިދާޅުވީ، އެސްޓީއޯއިން ވިޓޯލް އާ ގުޅިގެން ބަންކަރިން ހިދުމަތް ފެށުމަށް ނިންމީ ލިބުނު ހުށަހެޅުންތަކަށް ބަލައި، މިވަގުތު މާކެޓްގައި އެންމެ ރަނގަޅަށް ބަންކަރިންގެ ހިދުމަތުގައި ހަރަކާތްތެރިވަނީ އެ ކުންފުނިން ކަމަށް ވާތީ ކަމަށެވެ.
ގާތްގަނޑަކަށް ހަމަސް ދުވަހުގެ މުއްދަތަކަށްފަހު ބަންކަރިން ހިދުމަތުގެ އަމަލީ މަސައްކަތް މިއަދު ފެށިގެންދާއިރު، ފުރަތަމަ ފަށައިގަންނާނީ ދެ ބާވަތެއްގެ ކާގޯއިން ކަމަށާއި އެއީ ޑީސަލް އަދި ލޯ ސަލްފާ ފިޔުލް އިން ކަމަށެވެ. ޝިމާދު ވިދާޅުވީ ވިޓޯލްއާއެކު އެއްބަސްވުން ހަދައިގެން މަސައްކަތް ފެށި ހިސާބުން ހުށަހެޅުންތައް އަންނަން ފެށި ކަމަށާއި، ފުރަތަމަ މި ހިދުމަތް ދޭނީ ރާއްޖެ ސަރަހައްދުން ދަތުރުކުރާ ލަގްޒަރީ ޔޮޓްތަކަށާއި، ބޮޑެތި ބޯޓްފަހަރުތަކަށް ކަމަށެވެ.
ހަމަ މިހެންދާ ކޮންމެ ބޯޓަކަށް ސާވިސް ދިނުމެއް ނޫން. އަޅުގަނޑުމެން މި މަޝްރޫޢު މި ފަށަނީ ވިޓޯލް އާއެކު އެއްބަސްވެފައިވާ ޒީރޯ ވަރކިން ކެޕިޓަލްއަކުން. މާނައަކީ ކާގޯ ފޯރުކޮށްދޭނީ ވިޓޯލުން ކާގޯ ވިއްކުމަށްޓަކައި އެހީތެރިވާނީ ވިޓޯލުން އަދި ކާގޯ ވިއްކައިގެން ލިބޭ ފައިސާއިން ވިޓޯލްއަށް ހޭދަކުރާނީ
އެސްޓިއޯގެ އެމްޑީ ޝިމާދު ވިދާޅުވިއެވެ.
ޝިމާދު ވިދާޅުވީ ބަންކަރިން ހިދުމަތުގެ އިންފްރާސްޓަކްޗަރ ޤާއިމްކޮށްދިނުމަށް ވިޓޯލްގެ ފަރާތުން ވަރަށްބޮޑު އެހީތެރިކަމެއް ލިބުނު ކަމަށެވެ. އޯފްޝޯގައި ބަންކަރިން ހިދުމަތް ކުރިއަށްގެންދިއުމަކީ ދެމެހެއްޓެނިވި ގޮތެއްގައި މި ހިދުމަތް ކުރިއަށް ގެންދިއުމުގެ ހައްލެއް ނޫންކަން ފާހަގަކުރައްވަމުން ޝިމާން ވަނީ ކުރިއަށް އޮތްތަނުގައި ބަންކަރިން ހިދުމަތް ފުޅާކުރުމަށް ބިން ހިއްކައި ފިޔުލް ފާމްތަކާއި ޕޯޓެއް ތަރައްޤީ ކުރައްވާނޭ ކަމަށެވެ.
ބަންކަރިން ހިދުމަތަކީ ރާއްޖޭގެ އިޤްތިސާދު ސިންދަފާތުކުރުމަށް މުހިއްމު ހިދުމަތެއްކަން ފާހަގަކުރައްވަމުން މި ރަސްމިއްޔާތުގައި ވާހަކަދައްކަވަމުން ޝިމާދު ވިދާޅުވީ، ރައީސްގެ ވިސްނުމާއެކު ބަންކަރިން ހިދުމަތުގެ ސަބަބުން ރާއްޖޭގެ އިޤްތިސާދު އިތުރު ހަރުފަތަކަށް ކުރިއަރާ ދާނޭކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
