ހިއްކާފައިހުރި ބިންތަކުގައި އިންފްރާސްޓްރަކްޗާ ގާއިމުކުރުމުގެ މަޝްރޫއުއެއް މި އަހަރު ތެރޭގައި ފަށާނަން: ރައީސް ޑރ.މުއިއްޒު
ހިއްކާފައިހުރި ބިންތަކުގައި އިންފްރާސްޓްރަކްޗާ ގާއިމުކުރުމުގެ މަޝްރޫއުއެއް މި އަހަރު ތެރޭގައި ފައްޓަވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ޅ އަތޮޅުގެ ތިން ރަށަކަށް ރައީސް ޑރ.މުއިއްޒު ކުރައްވަމުން ގެންދަވާ ދަތުރުފުޅުގެ ތެރެއިން ޅ.ހިންނަވަރަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި، ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ ވަރަށް ގިނަ ރަށްރަށުގައި ބިން ހިއްކާފައި ހުރި ނަމަވެސް އެ ބިން އޮތީ ހަނަފަސް ބިމެއްގެ ގޮތުގައި ކަމަށެވެ. މިގޮތުން ފެން، ކަރަންޓު އަދި ނަރުދަމާ ނޭޅި ހުރުމުގެ އިތުރުން މަގުތައް ވެސް އެ ބިންތަކުގައި ހެދިފައި ނެތްކަން އެމަނިކުފާނު ފާހަގަކުރެއްވިއެވެ.
"އަޅުގަނޑުމެން ފޯމިއުލޭޓް ކުރަމުންދާ ބޮޑު މަޝްރޫއު އެއް އެއީ، މި ގޮތަށް ހިއްކާފައިހުރި ބިން ތަކުގައި އިންފްރާސްޓްރަކްޗާ ގާއިމު ކޮށްދިނުން. ފެނާއި ކަރަންޓާއި ނަރުދަމާ އާއި މަގުހެދުމާ. އެ މަޝްރޫއު ގެ ތެރެއިން މިގޮތަށް ބިން ހިއްކާފައި ހުރި، ގިނަ އަހަރުތަކެއް ވެފައި ހުރި މަޝްރޫއުތައް، ރަށްތައް ހިމެނޭ ގޮތުން އިރާދަކުރެއްވިއްޔާ މި އަހަރު ތެރޭގައި މަޝްރޫއު އެއް ފަށާނަން."
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު ވިދާޅުވީ މި މަޝްރޫއު ގެ ސަބަބުން ހިއްކި ބިމުގެ ބޭނުން ގެދޮރު ބިނާ ކުރުންފަދަ އެކި ކަހަލަ އަސާސީ އަދި އިގްތިޞާދީ މަސައްކަތްތަކަށް ބޭނުން ކުރުމުގައި ހަގީގީ ކުލަ ޖެހިގެންދާނެ ކަމަށާއި ހަމައެކަނި ފެންނަން އޮންނަ ފަސްގަނޑެއްގެ ގޮތުގައި އޮތުމުގެ ބަދަލުގައި ރައްޔިތުންނަށް އެތަނުގެ ބޭނުން ހިފޭނެ ކަމަށެވެ.
ރައީސް ޑރ.މުއިއްޒު ވަނީ މި މަޝްރޫއުގެ ތެރެއިން ހިންނަވަރުގައި ހިއްކާފައި އޮތް ބިމުގައި ވެސް ގާއިމު ކުރެވިގެންދާނެ ކަމަށް ވެސް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
