ޕާލް ރެސިޑެންސީ ޕްރޮގްރާމާ ގުޅޭ މަޢުލޫމާތު ސާފުކުރުމަށް ޢަދާލަތު ޕާޓީގެ އިސްވެރިން ސަޢީދާ ބައްދަލުކުރައްވައިފި

ދިވެހި ސަރުކާރުން ތަޢާރަފުކުރަން ނިންމާފައިވާ "މޯލްޑިވްސް ޕާރލް ރެސިޑެންސީ" ޕްރޮގްރާމާ ގުޅިގެން ޢަދާލަތު ޕާޓީގެ ފަރާތުން ސާފުކުރަން ބޭނުންވާ މުހިންމު ކަންކަން އޮޅުންފިލުވުމަށްޓަކައި، އެ ޕާޓީގެ އިސް ލީޑަރޝިޕުން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދާ ބައްދަލުކުރައްވައިފިއެވެ.

މި ބައްދަލުވުމުގައި ޢަދާލަތު ޕާޓީގެ ފަރާތުން އިސްކޮށް ބައިވެރިވެވަޑައިގެންނެވީ އެ ޕާޓީގެ ރައީސް އައްޝައިޚް މުޙައްމަދު ޝިފާނެވެ. މީގެއިތުރުން ޕާޓީގެ އިސް ލީޑަރޝިޕްގެ އެހެނިހެން ބޭފުޅުންވެސް މި ބައްދަލުވުމުގައި ބައިވެރިވެވަޑައިގެންނެވިއެވެ.

"ޕާލް ރެސިޑެންސީ" ޕްރޮގްރާމަކީ ރާއްޖޭގައި ބޮޑެތި އިންވެސްޓްމެންޓުތައް ކުރާ ފަރާތްތަކަށް ޚާއްޞަކޮށްގެން ސަރުކާރުން ތަޢާރަފުކުރާ ވިސާ ޕްރޮގްރާމެކެވެ. މިއީ ބޭރުގެ އިންވެސްޓަރުންނަށް ރާއްޖޭގައި އިންވެސްޓްކޮށް، ދިގު މުއްދަތަކަށް ދިރިއުޅުމުގެ ފުރުޞަތު ފަހިކޮށްދިނުމުގެ މަޤްޞަދުގައި ކުރިއަށްގެންދާ ޕްރޮގްރާމެކެވެ.

މި ޕްރޮގްރާމް ރަސްމީކޮށް އިޢުލާނުކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސިންގަޕޫރަށް ކުރެއްވި ރަސްމީ ދަތުރުފުޅުގެ ތެރެއިންނެވެ. އަދި މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ މި ދާއިރާގައި ދުނިޔޭގެ މަޝްހޫރު ކުންފުންޏެއް ކަމަށްވާ ހެންލީ އެންޑް ޕާޓްނާސްއާ ޙަވާލުކޮށްގެންނެވެ.