”އެމްޑީޕީގެ ވެރިކަމުގައި ކުންފުނިތަކަށް 18053 މުވައްޒަފުން ނެގި، މިސަރުކާރުގައި މިހާތަނަށް ނެގީ 4938 މުވައްޒަފުން“

ސަރުކާރު ހިއްސާވާ ކުންފުނިތަކުގެ މުވައްޒަފުންގެ ޢަދަދު މިހާރު 41667 އަށް އަރާފައިވާ ކަމަށް މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު ޙަސަން ޒަރީރު މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) ކުރެއްވި ސުވާލަކަށް ޖަވާބު ދެއްވަމުން ވަޒީރު ޒަރީރު ވަނީ ޕީސީބީގެ ތަފާސްހިސާބުތައް ޙިއްޞާކުރައްވައިފައެވެ. އެ ތަފާސްހިސާބުތައް ދައްކާ ގޮތުން 2018 ވަނަ އަހަރު ނިމުނުއިރު ސަރުކާރު ކުންފުނިތަކުގައި ތިބީ 18676 މުވައްޒަފުންނެވެ. އެމްޑީޕީ ސަރުކާރުގެ ފަސް އަހަރު ތެރޭ އިތުރު 18053 މީހުން ވައްދައި 2023 ނިމުނުއިރު އެ ޢަދަދު 36729 އަށް މައްޗަށް ޖެހިފައިވެއެވެ.

"2018 ވަނައަހަރު ދައުލަތުގެ ކުންފުނިތަކުގައި ތިބީ 18676 މުވައްޒަފުން. 2019 އިން ފެށިގެން 2023 އަށް އައި އިރު އެ މުވައްޒަފުންގެ އަދަދު މިވަނީ ގާތްގަނޑަކަށް 100 އިންސައްތަ އިތުރުވެފަ. އެގޮތުން 2023 ވަނައަހަރު ނިމުން އިރު 36729 މުވައްޒަފުން ދަްުލަތުގެ ކުންފުނިތަކުގައި ތިބި. މިއީ 2018 ވަނަ އަހަރާ ބަލާއިރު 18053 މުވައްޒަފުންގެ އިތުރުވުމެއް… މިދިޔަ މަހުގެ ނިޔަލަށް މުވައްޒަފުން ތިބި އަދަދަކީ 41667 އެހެންވީމާ 2024ވަނަ އަހަރުން ފެށިގެން މިހާތަނަށް ވެއްދިފައިވާ މުވައްޒަފުންގެ އަދަދަކީ 4938 މުވައްޒަފުން މިއީ 13 ޕަސެންޓުގެ އިންކްރިމެންޓެއް"

ވަޒީރު ޒަރީރު

ވަޒީރު އިތުރަށް ފާހަގަކުރެއްވި ގޮތުގައި ކުރިއަރާފައިވާ ޤައުމުތަކާ އަޅައިބަލާއިރު ރާއްޖޭގެ ޕަބްލިކް ސެކްޓަރުގައި މަސައްކަތްކުރާ މީހުންގެ ނިސްބަތް އާބާދީގެ ދެބައިކުޅަ އެއްބަޔަށް ވުރެ މައްޗެވެ. އެހެންކަމުން ދައުލަތުގެ ބަޖެޓަށް ބަރޯސާވާ މިންވަރު ކުޑަކުރުމަށާއި އިޤްތިޞާދު ކުރިއެރުވުމަށްޓަކައި ކުންފުނިތައް ރައިޓްސައިޒް ކުރުމުގެ މަސައްކަތް މެދުނުކެނޑި ކުރިއަށް ގެންދަވާނެ ކަމަށް ވިދާޅުވިއެވެ.

ނިމިދިޔަ އެމްޑީޕީ ސަރުކާރުގައި ކުންފުނިތަކަށް ގިނަ ޢަދަދެއްގެ މުވައްޒަފުން ނެގުމާ ގުޅިގެން އެ މީހުންނަށް މުސާރަ ދެވޭނެ ގޮތް ހެދުމަށް އެޑްވާންސް ސަބްސިޑީގެ ގޮތުގައި 634 މިލިއަން ރުފިޔާ ދޫކޮށްފައިވެއެވެ.