ނަޒްރާއަށް ގޮނޑި ނުލިބުނީ ފައިސަލްގެ ސަބަބުން - މަހުލޫފު

މިމަހުގެ 21 ވަނަ ދުވަހު ބޭއްވި ރައްޔިތުންގެ މަޖިލީހުގެ ވިހިވަނަ އިންތިޚާބުގައި ފުވައްމުލަކު ދެކުނު ދާއިރާއަށް ވާދަކުރެއްވި ނަޒްރާ ނަސީމަށް ގޮނޑި ކާމިޔާބުނުކުރެވުނީ، ނަޒްރާގެ ބޭބެ އަދި ކުރީގެ ނައިބު ރައީސް ފައިސަލް ނަސީމުގެ ސަބަބުން ކަމަށް ނަޒްރާގެ ފިރިކަލުން، ކުރީގެ ޔޫތު މިނިސްޓަރު އަހުމަދު މަހުލޫފު ތުހުމަތުކޮށްފި އެވެ.

އެމްޑީޕީގެ ގުރޫޕަކަށް މިއަދު މަހުލޫފް ފޮނުއްވި މެސެޖެއްގައި ވިދާޅުވެފައި ވަނީ އެމްޑީޕީއަށް ގޮނޑި ގެއްލުވާލީ ސީދާ ފައިސަލް ކަމަށެވެ. އަދި އެންޓި-ކެމްޕެއިން ކުރުމަށް އާއިލާއާއި ދަންނަ އެތައް ބަޔަކަށް ފައިސަލް ގުޅާފައިވާ ކަމަށްވެސް މަހުލޫފް ތުހުމަތުކޮށްފައިވެއެވެ.

އާއިލާގެ އަދި ދާއިރާގެ އެތައް ބަޔަކަށް ގުޅާ ދިޔައީ ނަޒޫ އާ ދެކޮޅަށް މަސައްކަތް ކުރަމުން. މިކަން ޕާޓީގެ ލީޑާޝިޕް ބޭފުޅުންނަށް އަދި ނަޒޫގެ މައިންބަފައިންނާއި އާއިލާއަށްވެސް އެނގޭ. މިކަމުގަ އަޅުގަނޑުމެން މިތިބީ ދޫދޭ ގޮތަކަށް ނޫން

މަހުލޫފު ވިދާޅުވިއެވެ.

އިންތިހާބުގައި ނަޒްރާއަށް ގޮނޑި ގެއްލުނީ 48 ވޯޓުގެ ތަފާތުންނެވެ.

މަހުލޫފް ތުހުމަތު ކުރެއްވި ގޮތުގައި، އެ މައްސަލަ ފެށުނީ އާއިލީ މައްސަލައެއްގެ އިތުރުން ނިމިދިޔަ ރިޔާސީ އިންތިޚާބުގައި ފައިސަލްގެ ބަދަލުގައި ރަނިންމޭޓަކަށް އަސްލަމް ޚިޔާރުކުރި ހިސާބުންނެވެ. އެ ކަން އެގޮތަށް ކުރެއްވުމުން ފައިސަލް ވަނީ އެ ދުވަސްވަރު ކުރީގެ ރައީސް އިބްރާހިމް މުޙައްމަދު ޞާލިހް ގެކެމްޕެއިނުންވެސް ދުރަށް ވަޑައިގެންފައެވެ.

މަހުލޫފްގެ މެސެޖު ސޯޝަލް މީޑިއާގައި ލީކްވުމާއެކު ބަލި ޤަބޫލުކުރާ ކަމަށާ ނަމަވެސް މިއީ މިކަން ހިނގާދިޔަ ގޮތް ކަމަށް އަދި ނަޒޫގެ ޓީމުން ދޫނުދޭނެ ކަމަށް މަހުލޫފް "އެކްސް"ގައި ވަނީ ވިދާޅުވެފައެވެ.