މަންފާ އީދު އުފާ މި ފަހަރު އއ. ފެރިދޫގައި, މީޑިއާ ޕާޓްނަރަކީ ވޮއިސް

ދިވެހީންގެ ދީނީ ހޭލުންތެރިކަމަށް ވަރަށް ފުޅާ ދާއިރާއެެއްގައި މަސައްކަތް ކުރާ މަންފާ އިން މި ފަހަރު އީދު ފާހަގަ ކުރާނީ އއ. ފެރިދޫގައި ކަމަށް އެ ޖަމިއްޔާ އިން ބުނެފި އެވެ.

މީގެ އަހަރެއްހާ ދުވަސްކުރީން އުފެދުނު މަންފާ އަކީ މިވަގުތު ދިވެހީންގެ ދީނީ ހޭލުންތެރިކަމަށް އެންމެ ފުޅާ ދާއިރާއެއްގައި މަސައްކަތްކުރާ އެންމެ މަގުބޫލު ޖަމިއްޔާ އެވެ. އެ ޖަމިއްޔާ އިން މިދިޔަ ކުޑަ އީދު ވެސް ވަރަށް ކުލަގަދަކޮށް ފާހަގަކުރި އެވެ. ކުޑައީދު ފާހަަގަކުރީ އދ. މާމިގިލީގަ އެވެ. މިދިޔަ އަހަރުގެ ބޮޑު އީދު, އެޗްޑީސީއާ ގުޅިގެން ހުޅުމާލޭގައި ވެސް ވަރަށް ކުލަގަދަކޮށް ފާހަގަކޮށްފައިވެ އެވެ.

މަންފާއިން ބުނީ މި އަހަރުގެ ބޮޑު އީދު ފާހަގަ ކުރަން ހަމަޖެހިފައިވަނީ އއ. ފެރިދޫގައި ކަމަށެވެ. އެގޮތުން "މަންފާ އީދު އުފާ" ނަމުގައި އެ ރަށުގައި ޚާއްސަ ހަރަކާތްތަކެއް ކުރިއަށް ގެންދަން ވަނީ ނިންމާފަ އެވެ.

އެންމެ ޚާއްސަ އެއް ހަރަކާތަކީ އީދު ދުވަހު ހަވީރު އޮންނަ ކުޑަކުދީންގެ ހަވީރެވެ. މި ހަވީރުގައި ކުޑަކުދީންގެ މެދުގައި އެންމެ މަގުބޫލު ހުށައެޅުންތެރިޔާ އިބްރާހިމް ރަމީޒު (އިބޭ) ބައިވެރިވާނެ އެވެ. އިބްރާހިމް ރަމީޒުގެ އިތުރުން އަލީ ރަމީޒާއި އަހްމަދު ހަމީދު އާދަމް (ވަޖޭ) ވެސް ބައިވެރިވާނެ އެވެ.

މީގެ އިތުރުން މި ފަހަރުގެ އީދާ ދިމާކޮށް އެ ރަށުގައި މަދަހަ މުބާރާތެއް ވެސް ބޭއްވުމަށް ވަނީ ހަމަޖެހިފަ އެވެ. މި މުބާރާތުގައި އުމުރުން 15 އަހަރުން ދަށުގެ ކޮންމެ ކުއްޖަކަށްވެސް ބައިވެރިވެވޭނެ އެވެ. އަދި މުބާރާތުގެ ނަތީޖާ ފާޅުކުރުމާއި އީދާއި ގުޅިގެން ވަރަށް ޚާއްސަ އިވެންޓެއް ބޭއްވުމަށް ވެސް ވަނީ ނިންމާފަ އެވެ.

"މަންފާ އީދު އުފާ 1447" ގެ މީޑިއާ ޕާޓްނަރަކީ ވޮއިސް އެވެ. ވޮއިސް އިން މަންފާ އީދު އުފާ ހަރަކާތްތަކާއި ގުޅުންހުރި ޚަބަރުތަކާއި މައުލޫމާތުތައް ގެނެސްދޭނެ އެވެ.