ހޮޅުދޫ މީހުންނަށް ދިރިއުޅެވޭގޮތަށް ހޮޅުމީދޫ ތަރައްޤީކުރަނީ

ނ.ހޮޅުދޫ އާއި އެންމެ ގާތުގައިވާ ފަޅުރަށް އަދި މިހާރުވެސް ހޮޅުދޫގެ އިޙްތިޞާސްތެރޭގައި ހިމެނޭ ނ.ހޮޅުމީދޫ ހޮޅުދޫ ރައްޔިތުންނަށް ދިރިއުޅެވޭނެ ގޮތަށް ތަރައްޤީ ކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ މިހާރު ރާއްޖޭގެ އުތުރުގެ 4 އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ނ.ހޮޅުދޫއަށް ވަޑައިގެން ހޮޅުދޫގެ ރައްޔިތުންނާ ބައްދަލުކޮށް ދެއްކެވި ވާހަކަފުޅުގައެވެ.

ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވީ އެމަނިކުފާނު ހޮޅުދޫގެ ރައްޔިތުންނަށް ކޮށްދެއްވާނެ ކަމަށް ވައުދުވެ ވަޑައިގެންނެވި ހުރިހާ ކަމެއްވެސް ކޮށްދެއްވާނެ ކަމަށާއި ، ހޮޅުދޫ ރައްޔިތުން އެންމެ ބޮޑަށް ބޭނުންވާ ބޯހިޔާވަހިކަމަށް މި ފަސްއަހަރުގެ ތެރޭގައި ހައްލު ހޯއްދަވައި ދެއްވާނެ ކަމަށެވެ.

ރައީސުލްޖުމްހޫރިއްޔާ ވިދާޅުވީ ރަށުގެ ރައްޔިތުން ގެދޮރުވެރިކުރުވުމަށް ހިންގާ އެންމެ ބޮޑު މަޝްރޫޢު ހިންގާނީ ހޮޅުދޫގެ އިޙުތިޞާސުގައި އޮތް ފަޅު ރަށެއްކަމަށްވާ ހޮޅުމީދޫގައިކަމަށެވެ. އަދި އެ ރަށް ތަރައްޤީކުރައްވާއިރު ހުރިހާ އަސާސީ ޚިދުމަތްތައް ރަނގަޅު ފެންވަރުގައި ޤާއިމުކުރައްވާނެކަމަށްވެސް ރައީސުލްޖުމްޙޫރިއްޔާ ވިދާޅުވިއެވެ.

"ރަށުގެ އިޙުތިޞާދުގައި އޮތް ހޮޅުމީދޫ ރަށުގެ ބައެއްގެ ގޮތުގައި ހިމަނާ އެތަނަށް ބޭނުންވާ ހުރިހާ އިންފްރާސްޓްރަކްޗަރ ޤާއިމުކުރާނަން. އެތަނަށް ބޭނުންވާ ޕްލޭން ހަދާނަން. ބޯހިޔާވަހިކަން، ޔުޓިލިޓީ އަދި މަގުތައް ތަރައްޤީކުރުމުގެ މަސައްކަތްތައް ގެންނަން."

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވިއެވެ.

މީގެ އިތުރުން ރައީސް ވިދާޅުވީ ހޮޅުދޫއަށް ދިމާވެފައިވާ ބިމުގެ ދަތިކަން ހައްލުކޮށް ދެއްވުމަށްޓަކައި އެރަށުގެ ފަޅުން ހިއްކެއް އޮތް އެންމެ ބޮޑަކަށް ބިން ހިއްކަވައި ދެއްވާނެ ކަމަށެވެ.

ރައީސް ވިދާޅުވީ ހޮޅުދޫއަކީ ތައުލީމީ ގޮތުން ތާރީޙީ ސްކޫލެއް ހުރި، ތައުލީމަށް ލޯބިކުރާ ރައްޔިތަކު ދިރިއުޅެމުންގެންދާ ރަށަކަށްވާއިރު  މޭނާ ސްކޫލް އަލުން ބިނާކޮށް، މިހާރަށްވުރެ ފުޅާކޮށް ތަޢުލީމު ދެވޭގޮތަށް އިމާރާތެއް ތަރައްޤީ ކޮށްދެއްވާނެކަމަށެވެ.

ރައީސުލްޖުމުހޫރިއްޔާ ހޮޅުދޫއަށް ވަޑައިގެންނެވުމުން އެރަށުގެ ރައްޔިތުން ވަނީ އެމަނިކުފާނަށް ވަރަށް ހޫނު މަރުޙަބާއެއް ދަންނަވާފައެވެ.