ކޮންމެ ރަށެއްގައި ޤުރްއާނާ ބެހޭ މަރުކަޒުގެ ގޮތްޕެއް ޤާއިމްކޮށްދޭނަން: ރައީސް

ރާއްޖޭގެ މީހުން ދިރިއުޅޭ ރަށްތަކުގައި ޤުރްއާނާބެހޭ މަރުކަޒުގެ ގޮތްޕެއް މި ސަރުކާރުން ގާއިމްކޮށްދެއްވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ތ.ވޭމަންޑޫ ރައްޔިތުންނާ ބައްދަލުކޮށްލެއްވުމަށް އެރަށުގައި ބޭއްވި ޖަލްސާގައި ރާއްޖެ އިސްލާމްވި ދުވަހާ ގުޅުވައިގެން ވާހަކަފުޅު ދައްކަވަމުން ރައީސް ޑރ.މުއިއްޒު ވަނީ، އިސްލާމްދީންގެ ވަހުދަތު ދެމެހެއްޓުމަށް ސަރުކާރުން ކުރުމަށް ނިންމާފައިވާ މުހިއްމު ކަންކަމުގެ މައުލޫމާތު ހިއްސާކުރައްވާފައެވެ.

ރާއްޖެ އިސްލާމްވިދުވަހާ ގުޅުވައިގެން ވާހަކަފުޅު ދައްކަވަމުން ރައީސް ވިދާޅުވީ، ރާއްޖެ އިސްލާމްވިތާ އެތައް އަހަރެއް ފާއިތުވެގެންދިޔައިރު މިއޮތް ހުރިހާ ދުވަހު ދިވެހިންނަށް މިހާ އެކުވެރިކޮށް އެއް ބައެއް ގޮތުގައި އުޅެވުނީ މާތްވެގެން އިސްލާމް ދީނުގެ ސަބަބުންކަމަށެވެ. ބޮޑުތަކުރުފާނާ އެތައް އަބުޠާލުން ކުރި ޖިހާދުތަކުން އަޅުގަނޑުމެންނާ ހަމައަށް ގެނެސްދިން އިސްލާމްދީ އަންނަ އޮތް ޖީލުތަކާ ހަމަޔަށް ގެންދިއުމަށް އަޒުމް ކަނޑައަޅަންޖެހޭކަން ފާހަގަކުރައްވަމުން ރައީސް ވިދާޅުވީ އިސްލާމްދީނަށް ނަސްރު ދިނުމަކީ ސަރުކާރުގެ މުހިންމު ސިޔާސަތުތަކުގެ ތެރޭގައި ހިމެނޭ އެންމެ މުހިންމު އެއް ސިޔާސަތުކަމަށެވެ.

އެކަމުގެ ތެރޭގައި ހިމެނިގެން ވަރަށްގިނަ ކަންކަން ކުރުމަށް ސަރުކާރުން ކުރުމަށް ނިންމާފައިވާކަން ރައީސް ފާހަގަކުރެއްވިއެވެ. އެގޮތުން ރާއްޖޭގެ މީހުން ދިރިއުޅޭ ރަށްތަކުގައި ޤުރްއާނާބެހޭ މަރުކަޒުތައް ޤާއިމްކުރުމަށް ނިންމާފައިވާކަން ފާހަގަކުރައްވަމުން ރައީސް ވިދާޅުވީ، އާބާދީގެ ނިސްބަތުން އެ ރަށެއްގެ ބިން އޮތް މިންވަރަކުން ޤުރްއާނާބެހޭ މަރުކަޒުތައް ގާއިމްކުރާނޭކަމަށެވެ.

ދީން ކުރިއެރުމަށް ކުރެވުނު މަސައްކަތްތައް ފާހަގަކުރައްވަމުން ރައީސް ވަނީ ޙާފިޡުން ތަމްރީނުކުރުމަށް ކުރިއަށްގެންދިޔަ މަސައްކަތްތައް ފާހަގަކުރައްވާފައެވެ.

ޙާފިޡުން ތަމްރީނުކުރުމަށް ބަލާއިރުވެސް އިރާދަކުރެއްވީތީ އަޅުގަނޑުމެން ވަރަށް ފަހުރުވެރިވޭ މިކަމުގައިވެސް. އެއީ މިދިޔަ އަހަރު އެކަނިވެސް 24 ހާފިޒުން ތަމްރީނުކުރެވިއްޖެ. އުއްމީދުކުރަނީ އިތުރު 50 ޙާފިޡުން މިއަންނަ ރަމަޟާންމަހާ ހިސާބަށްދާއިރު އިތުރުވުން.

ރައީސް ވިދާޅުވިއެވެ

މީގެ އިތުރުން އިސްލާމިކް ސެންޓަރުތަކާއި، ރާއްޖޭގެ އެކި ހިސާބުތަކުގައި ވަޤްފް އިމާރާތްތައް އެޅޫމަށް ނިންމާފައިވާކަމަށެވެ. އަދި ރާއްޖޭގެ މީހުން ދިރިއުޅޭ ހުރިހާ ރަށަކާއި ސިޓީތަކުގެ މަގުތަކާއި، އާންމު ސަރަޙައްދުތަކުގައި ޒިކުރު ބޯޑުތައް ބެހެއްޓުމަށް ޒިކުރު ބޯޑުތައް ބެހެއްޓުމަށް ނިންމާފައިވާކަންވެސް ރައީސް ވިދާޅުވިއެވެ. އެގޮތުން އެ ބޯޑުތަކުގައި އިސްލާމްދީނުގެ މުހިންމު ޝިޔާރުތަކާއި ނަސޭހަތްތައް ބޯޑުތަކުގައި ހަރުކުރެވިގެންދާނޭކަން ރައީސް ފާހަގަކުރެއްވިއެވެ.