މީޑިއާ އިންތިހާބު: ވޯޓްލެވޭ ރަޖިސްޓާޑް އޮތީ ކިތައް މީޑިއާ؟

މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ އިންތިހާބަށް ވޯޓުލެވޭ މީޑިއާތަކުގެ ނަންތައް އިލެކްޝަންސް ކޮމިޝަނުން މިއަދު އާއްމުކޮށްފިއެވެ.

މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ގާނޫނުގެ ދަށުން، ބާއްވަން ޖެހޭ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް މެމްބަރުން ހޮވުމަށް އިންތިހާބު ބޭއްވުމަށް ތައްޔާރުވަމުންދާއިރު، އިންތިހާބު ބޭއްވުމަށް އިލެކްޝަނުން ނިންމާފައިވަނީ އަންނަ އޮކްޓޯބަރުމަހުގެ 11 ވަނަ ދުވަހެވެ.

އިލެކްޝަނުން ވަނި ކޮމިޝަނުގެ މެމްބަރުކަމަށް ކުރިމަތިލާން އެދޭ ފަރާތްތަކަށް މިމަހުގެ 25 ވަނަ ދުވަހު އެ ފުރުސަތު ހުޅުވާލާފައެވެ. އެއާއެކު އިންތިހާބުގައި ވޯޓުދެވޭ މީޑިއާތަކުގެ ނަންތައް އިލެކްޝަންސް ކޮމިޝަނުން މިއަދު ވަނީ އާއްމުކޮށްފައެވެ. އިލެކްޝަނުން  އާއްމުކުރި މި ލިސްޓްގައި 353 މީޑިއާއެއްގެ ނަން ހިމެނެއެވެ. މީގެ ތެރޭގައި ޤަވާއިދުން ހިނގާ މީޑިއާތަކާއި މީގެ ކުރިން އާއްމުން އަޑުއަހާފައިނުވާ ރަޖިސްޓާޑް މީޑިއާތައް ހިމެނެއެވެ. އިލެކްޝަނުގެ މި ލިސްޓްގައި ބްރޯޑްކާސްޓް މީޑިއާގެ ގޮތުގައި ހިންގާ 18 ކުންފުނި ހިމެނެއެވެ.

ލިސްޓަށް ޝަކުވާ ހުށަހަޅަން ބޭނުންވާ ފަރާތްތަކަށް އެފުރުސަތު ހުޅުވާލާފައިވަނީ މިއަދުން ފެށިގެން މާަދަމާ މެންދުރުފަހު 15:00 ނިޔަލަށެވެ.

މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލު ރައީސް ތަސްދީގުކުރައްވާފައިވަނީ މިހިނގާ ސެޕްޓެމްބަރުމަހުގެ 18 ވަނަ ދުވަހެވެ.  މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން މިވަގުތު ހިންގަމުންދަނީ ސިވިލް ސާވިސް ކޮމިޝަނުން އެކުލަވައިލާ ފަސް މެންބަރުންގެ ވަގުތީ ކޮމިޓީއަކުންނެވެ.

މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން އެކުލެވިގެންވަނީ 7 މެމްބަރުންގެ މައްޗަށެވެ. އެއީ ރައްޔިތުންގެ މަޖިލީހުން އައްޔަނުކުރާ 3 މެމްބަރުންނާއި މީޑިއާތަކުން އައްޔަނުކުރާ 4 މެމްބަރުންނެވެ.