މަސްތުވާތަކެތި ބޭނުންކުރާ މީހުންގެ ތެރޭގައި ނަފްސާނީ ބަލިމީހުން ގިނަ: އެންޑީއޭ

ރާއްޖޭގައި މަސްތުވާތަކެތި ބޭނުންކުރާ މީހުންގެ ތެރޭގައި ނަފްސާނީ ބަލިމީހުން ގިނަކަމަށް، ނެޝަނަލް ޑްރަގް އޭޖެންސީ (އެންޑީއޭ) އިން ބުނެފިއެވެ.

އެންޑީއޭއިން މިއަދު ބޭއްވި ނޫސްވެރިންގެ ބައްދަލުވުމުގައި އެ ސެންޓަރުން މިއަދު ވަނީ ރާއްޖޭގައި މަސްތުވާތަކެތި ބޭނުންކުރާ މީހުނަށް ފަރުވާދިނުމަށް ކުރަމުންގެންދާ ކަންކަމުގެ މައުލޫމާތާއި ހުރި ގޮންޖެހުންތައް ފާހަގަކޮށްފައެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ނެޝަނަލް ޑްރަގް އޭޖެންސީ (އެންޑީއޭ) ބޯޑުގެ ޗެއާމަން، އަދި ދާހިލީ ވުޒާރާގެ ސްޓޭޓް މިނިސްޓަރު ލުބްނާ މުހައްމަދު ޒާހިރު ވިދާޅުވީ، މަސްތުވާތަކެތި ބޭނުންކުރާ މީހުންގެ މެދުގައި ނަފްސާނީ ބަލިމީހުން ހިމެނޭ އަދަދު ގިނަ ކަމަށެވެ. ލުބްނާ ވިދާޅުވީ އެކަމަށް ފަރުވާދޭން ބަލާއިރު، އެ ސެންޓަރުގައި ސައިކޭޓްރިސްޓެއް ނުހުންނަތާ ވަރަށް ގިނަ ދުވަސްވެފައިވާކަމަށެވެ. އެގޮތުން އެންޑީއޭގެ އައުބޯޑު ހަވާލުވިފަހުން މިދިޔަ ދެ އަހަރުދުވަހުގެ ތެރޭގައި އެތަން ހިންގަމުން އައިސްފައިވަނީ ސައިކޭޓްރިސްޓެއް ނެތިކަން ލުބްނާ ވިދާޅުވިއެވެ. ނަމަވެސް މިހާރު އެތަނުގައި ސައިކޭޓްރިސްޓެއް ގެނެސް މަސްތުވާތަކެތި ބޭނުންކުރާ މީހުންގެ ތެރެއިން ނަފްސާނީބަލީގެ ފަރުވާ ބޭނުންވާ މީހުންނަށް އެ ފަރުވާދެމުން ދާކަމަށް އޭނާ ވިދާޅުވިއެވެ.

ރާއްޖޭގައި ގިނައިން މަސްތުވާތަކެތި ނަގާ ގިނަ މީހުންގެ ފަރާތުން އަޅުގަނޑުމެނަށް ފެނިގެންމިދަނީ ނަފްސާނީ މައްސަލަތަކެއްގެ ތެރޭގައި އުޅެންޖެހޭކަން. ވަރަށްބޮޑަށް ނަފްސާނީ މައްސަލަތައް ހުންނަކަން ހާއްސަ ގޮތެއްގައި ސައިކޯސިސް ފަދަ ހަމަ ބޮޑެތި މައްސަލަތައް ހުންނަކަން ވަނީ ފާހަގަކުރެވިފަ

ލުބްނާ ވިދާޅުވިއެވެ

ލުބްނާ ވިދާޅުވީ މަސްތުވާ ތަކެތި ބޭނުންކުރާ މީހުންގެ ތެރެއިން ގިނަ އަދަދެއްގެ މީހުން ނަފްސާނީ ބައްޔަށް ފަރުވާކުރަންްްްްްްޖެހުމަކީ އެކަމުގެ ސަބަބުން ދައުލަތުންވެސް ބޮޑު ހަރަދެއް ކުރަންޖެހޭނޭ ކަމެއް ކަމަށެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ލުބްނާ ވިދާޅުވީ، ކުށުގެ ވެށިން ހައްޔަރުކުރާ މީހުންގެ ތެރެއިން މަސްތުވާތަކެތި ބޭނުންކުރާ މީހުންނަށް ފަރުވާދިނުމަށް ޑްރަގް އޮފެންޑަރ ރިމާންޑް ސެންޓަރެއް ގާއިމްކޮށްފައިވާކަމަށެވެ. އެ ސެންޓަރު މެދުވެރިކޮށް މިހާރު އެފަދަ މީހުންނަށް ފަރުވާދިނުމުގެ އިންތިޒާމުތައް ހަމަޖައްސަމުން އަންނަކަމަށް އޭނާ ވިދާޅުވިއެވެ. އެ ސެންޓަރުތައް ގާއިމްކޮށްފައިވަނީ، ކ.ހިންމަފުށި އަދި ހުޅުމާލޭގައެވެ.

މިކަމާ ގުޅޭގޮތުން ވާހަކަދައްކަވަމުން ސުޕްރިޓެންޑެންޓް އޮފް ޕޮލިސް އަދި ޑްރަގު އެންފޯސްމެންޓް ޑިޕާޓްމަންޓުގެ ހެޑް، ނާހިދު ހުސެއިން ވިދާޅުވީ މަސްތުވާތަކެއްޗާ ބެހޭ ގާނޫނުގެ 103ވަނަ މާއްދާގެ ދަށުން މަގުމަތީގައި އާއްމު އިޖުތިމާއީ މިންގަނޑުން ބޭރުން ހަރަކާތްތެރިވެ އުޅޭ މީހުންގެ ތެރެއިން ފުލުހުންގެ ބެލުމުގެ ދަށަށް ގެނެވޭ މީހުންގެ ތެރެއިން މަސްތުވާ ތަކެތި ބޭނުންކުރާމީހުން އެ ސެންޓަރުތަކަށް ގެންދާނޭކަމަށެވެ. އަދި އެމީހުންގެ ފަރުވާގެ ކަންކަންވެސް ކުރިއަށްދާނޭކަން އޭނާ ފާހަގަކުރެއްވިއެވެ.

ނޫސްވެރިންގެ މި ބައްދަލުވުމުގައި ވާހަކަދައްކަވަމުން ނެޝަނަލް ޑުރަގް އެޖެންސީ (އެންޑީއޭ)ގެ ސީއީއޯ މުހައްމަދު ރާޝިދު ވިދާޅުވީ މަސްތުވާ ތަކެތި ބޭނުންކުރުމުގެ ސަބަބުން ކުރިމަތިވާ ނަފްސާނީ މައްސަލަތަކަކީ، މިއަދު ފަރުވާދިނުމަށް އޮތް ބޮޑު ގޮންޖެހުމެއްކަމަށެވެ. މިއީ އެންޑީއޭއިން ތައްޔާރުވެފައި އޮތްކަމެއް ނޫންކަން ފާހަގަކުރައްވަމުން އޭނާ ވިދާޅުވީ، މަސްތުވުމުގެ ވަބާއިން ސަލާމަތްވުމަށް 1500 މީހުން ފަރުވާހޯދަމުންދާކަމަށެވެ. މީގެ ތެރޭގައި ސެންޓަރުތަކާއި މުޖުތަމައުގެ ތެރޭގައި ތިބެގެން ފަރުވާ ހޯދަމުންދާ މީހުން ތިބިކަމަށް އޭނާ ފާހަގަކުރެއްވިއެވެ.

އެންޑީއޭގެ ފަރުވާގެ ކަންކަން ދުވަސްތަކަކަށް މަޑުޖެހިފައި އޮތްނަމަވެސް މިހާރު ފަރުވާގެ ކަންކަން އެދެވޭގޮތެއްގައި ކުރިއަށްގެންދިއުމަށް މަސައްކަތްތަކެއް ކުރަމުންގެންދާކަން އޭނާ ވިދާޅުވިއެވެ.

މަސްތުވާތަކެއްޗަކީ ރާއްޖެއަށް ކުރިމަތިވެފައިވާ އެންމެ ބޮޑު އެއް ގޮންޖެހުންކަން ފާހަގަކޮށްލެވެއެވެ. މަސްތުވާތަކެތި ބޭނުންކުރާ ޒުވާނުންގެ އަދަދު އިތުރުވަމުންދާއިރު، މިއީ މުޖުތަމައުގެ ދުޅަހެޔޮކަމަށް އޮތް  ގޮންޖެހުމެއްކަމަށް ކަމާއި ބެހޭ މުއައްސަސާތަކުން ފާހަގަކުރެއެވެ.