ގއ. އަތޮޅު ކައުންސިލާއި، އެއަތޮޅު ވިލިނގިލީ ކައުންސިލާއި ރައީސުލްޖުމްހޫރިއްޔާ ބައްދަލުކުރައްވައިފި

ގއ. އަތޮޅު ކައުންސިލާއި، އެއަތޮޅު ވިލިނގިލީ ކައުންސިލާއި އަދި ވިލިނގިލީގެ އ.ތ.މ ކޮމިޓީގެ މެންބަރުންނާއި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބައްދަލުކުރައްވައިފިއެވެ.

މި ބައްދަލުކުރެއްވުން އޮތީ ރައީސް ޑރ.މުހައްމަދު މުއިއްޒު ރާއްޖޭގެ ދެކުނުގެ 4 އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ގއ. ވިލިގިއްޔަށް ވަޑައިގެން ގއ. އަތޮޅު ކައުންސިލުގެ އިދާރާގައެވެ.

މި ބައްދަލުކުރެއްވުމުގައި އަތޮޅުކައުންސިލުން ވަނީ އެއަތޮޅު ސްޓޭޓް ހައުސްގެ މަރާމާތަށް ބޭނުންވާކަމާއި އަދި އަތޮޅުގެ ތަރައްޤީއަށް ބޭނުންވާ ބައެއް ކަންތައްތައް ރައީސުލްޖުމުހޫރިއްޔާއަށް ދަންނަވާފައެވެ. އޭގެ އިތުރުން  އެ އަތޮޅުގެ ހުރިހާ ރަށެއްގެ މިސްކިތްތައް މަރާމާތުކުރަން ބޭނުންވާ ފައިސާ މިހާރު ލިބިފައިވާކަން ވެސް ވަނީ އެކައުންސިލުން ފާހަކަގުރައްވާފައެވެ.

މި ބައްދަލުކުރެއްވުމުގައި ވިލިގިލި ކައުންސިލު މެންބަރުން ފާހަގަކުރެއްވި ކަންކަމުގެ ތެރޭގައި ވިލިގިނލީ ބަނދަރުގެ މަސައްކަތް އަވަހަށް ނިންމަން ބޭނުންވާކަމާއި، އަތޮޅު ހޮސްޕިޓަލުގެ ޚިދުމަތް ފުޅާކުރުމަށް އައު އިމާރާތުގެ މަސައްކަތް އަވަސްކުރުންމުހިއްމުކަން ފާހަގަކުރެއްވިއެވެ.

އޭގެ އިތުރުން ކައުންސިލުން ވަނީ ހައުސިންގ ޔުނިޓުތަކުގެ މަސައްކަތް ލަސްވަމުންދިއުމުގެ ކަންބޮޑުވުން ފާލުކުރެއްވުމުގެ އިތުރުން، ވިލިނގިލި ކައުންސިލުގެ އިޙްތިސާސްގެ ދަށަށް ފަޅު ރަށެއް ގެންނަން ބޭނުންވާކަމާއި، ކުނި މެނޭޖްކުރުމުގައި ކުރިމަތިވާ ދަތިތައް ރައީސުލްޖުމުހޫރިއްޔާ ޑރ. މުހައްމަދު މުއިއްޒާ ހިއްސާކުރައްވާފައެވެ.

މި ބައްދަލުކުރެއްވުމުގައި ރައީސުލް ޖުމުހުރިއްޔާ ޑރ. މުހައްމަދު މުއިއްޒުވަނީ އަތޮޅު ކައުންސިލާއި ވިލިނގިލި ކައުންސިލުން ފާހަގަކުރެއްވި ހުރިހާ ކަމަކަށް ސަމާލުކަންދެއްވައިގެން އެ ހުރިހާ ކަމެއް ހައްލުކޮށްދެއްވާނެކަމަށް ވިދާޅުވެ ލައްވާފައެވެ.