ދަނގެތި ޢީދުއުފާ: އެންމެ ”ގަދަ ފަހުލަވާނު“ ހޮވުމަށް މުބާރާތެއް؛ ޢީދަށް އަންނަ މެހެމާނުންނަށްވެސް ބައިވެރިވެވޭނެ
ލިޔުންތެރިޔާ
ޚަދީޖާ އަރުފާ
ކުރިއަށް އޮތް ބަރަކާތްތެރި އަޟުހާ ޢީދު ފާހަގަކުރުމަށް ދަނގެތީގައި ކުރިއަށް ގެންދާ މުބާރާތްތަކުގައި ބައިވެރިވުމުގެ ފުރުސަތު ހުޅުވާލައިފިއެވެ.
ޢީދުއުފާ އިމުގެ ތެރޭގައި ފާހަގަކުރުމަށް ދަނގެތީ ޖަމިއްޔަތުލް ޤަލަމުން އިސްނަގައިގެން، އެރަށު މުވައްސަސާތަކާއި، މަދަނީ ޖަމިއްޔާ ތަކާއި ގުޅިގެން ގިނަ ހަރަކާތްތަކަކާއި މުބާރާތްތަކެއް ބޭއްވުމަށް ވަނީ ނިންމާފައެވެ.
އެގޮތުން، މި އަހަރުގެ ކުޅިވަރުތައް ހިންގުމުގައި، އެ ރަށު ޖަމިއްޔަތުލް އަންވާރު، ދަނގެތީ ސިއްހީ މަރުކަޒު، ދަނގެތީ މަސައްކަތްތެރިންގެ ޖަމިއްޔާ، އަންހެނުންގެ ތަރައްގީއަށް މަަސައްކަތްކުރާ ކޮމިޓީ، ދަނގެތި ޕޮލިސް ސްޓޭޝަން، ދަނގެތީ ޔޫތު ސެންޓަރު، ދަނގެތީ ސްޓެލްކޯ އަދި އަލް އަސްރު ބައިވެރިވެއެވެ.
އެގޮތުން، ބާއްވާ މުބާރާތްތަކުގައި ބައިވެރިވުމުގެ ފުރުސަތު މިހާރު ހުޅުވާލާފައިވާއިރު، އެންމެ ފާހަގަކޮށްލެވޭ އެއް މުބާރާތަކީ މިފަހަރު އަލަށް ބާއްވާ ”ގަދަ ފަހުލަވާނު“ މުބާރާތެވެ. މިއީ، އެންމެ ވަރުގަދަ މީހެއް ހޮވުމަށް ފިރިހެނުންނަށް ޚާއްސަ ކޮށްގެން ބާއްވާ މުބާރާތެކެވެ.
މި މުބާރާތުގައި ބައިވެރިވާ މީހުންގެ ބުންވަރު ހުރި މިންވަރެއް ބެލުމަށް ތަފާތު މަސައްކަތްތައް ހަވާލުކުރެވޭއިރު، މަސައްކަތްތައް އަވަހަށް ނިންމައި އެއީ "ގަދަ ފަހުލަވާނު“ ކަން ސާބިތުކޮށްދޭ މީހާއަށް 3000 ރުފިޔާގެ ފައިސާގެ އިނާމެއް ދިނުމަށް ވަނީ ނިންމާފައެވެ.
މި މުބާރާތުގެ އިތުރުން، ޒުވާނުންގެ ވާދެމުގެ މުބާރާތަކާއި، ބޮޑެތި މީހުންގެ ވާދެމުގެ މުބާރާތެއްގެ އިތުރުން މަސްރޭހެއްވެސް ބޭއްވުމަށް ވަނީ ނިންމާފައެވެ. އެ މުބާރާތްތަކުގައި ވާދަކުރުމުގެ ފުރުސަތު މިހާރު ވަނީ ހުޅުވާލާފައެވެ.
ކޮންމެ މުބާރާތަކުންވެސް ވަނަވަނައަށް އަންނަ ފަރާތްތަކަށް ފައިސާގެ އިނާމް ދިނުމަށް ވަނީ ނިންމާފައެވެ.
މުބާރާތްތަކުގައި ބައިވެރިވުމަށް އަންނަނިވި ލިންކުތައް މެދުވެރިކޮށް ފޯމު ފުރުމުން ބައިވެރިވެވޭވެނެ ކަމަށް ޖަމިއްޔަތުން ޤަލަމުން ބުނެއެވެ.
ގަދަ ފަހުލަވާނު: https://forms.gle/WqfGrtYaQME5SKvV8
ޒުވާނުންގެ ވާދެމުން މުބާރާތް:
https://forms.gle/KeCPpkG4Tn1JqgSG9
ބޮޑެތި މީހުންގެ ވާދެމުން މުބާރާތް:
https://forms.gle/XKDw5ZvKzcGPT3n39
މަސްރޭސް:
https://forms.gle/NZSg4NDLVMRKFdnXA
ޢީދަށް ދަނގެއްޗަށް ޒިޔާރަތްކުރާ މެހެމާނުންނަށްވެސް މުބަރާތްތަކުގައި ބައިވެރިވެވޭނެ ކަމަށް ޖަމިއްޔަތުލް ޤަލަމުން ބުނެއެވެ.
އިސްލާމީ ހަމަތަކާއި، އިމުގެ ތެރޭގައި، ދިވެހި ސަގާފަތާ، އާދަކާދަތަކާ އެއްގޮތަށް، އެންމެން ގުޅިގެން، ބައިވެރިކުރުވައިގެން ދަނގެތީގައި ކުރިއަށް ގެންދާ މި ހަރަކާތްތަކުގެ މެއިން ސްޕޮންސަރަކީ ބީއެމްއެލް އިސްލާމިކްއެވެ. މީޑިއާ ޕާޓްނަރަކީ ވޮއިސް އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
