ކަމަލް އަދުވާންގެ އިތުރުން ޣައްޒާގައި ހުރި އިންޑޮނޭޝިއަން ހޮސްޕިޓަލްގެ ޚިދުމަތްތައްވެސް ހުއްޓުމަކަށް!
ހައްދުފަހަނައަޅާފައިވާ ޔަހޫދީ ފައުޖުން ދެމުންގެންދާ ނިރުބަވެރި ހަމަލާތަކުގެ ސަބަބުން ފަލަސްތީނުގެ ޣައްޒާގައި ހުރި އިންޑޮނޭޝިއަން ހޮސްޕިޓަލްގެ ޚިދުމަތްތައް ހުއްޓުމަކަށް އައިސްފައިވާކަމަށް ޣައްޒާގެ ހެލްތު މިނިސްޓްރީން ބުނެފިއެވެ.
ޣައްޒާގެ ހެލްތު މިނިސްޓްރީން ބުނި ގޮތުގައި، އުތުރު ޣައްޒާގައި ތިން ހޮސްޕިޓަލެއް ހުންނައިރު، އެ ތިން ހޮސްޕިޓަލުގެ ހިދުމަތްތައް ވެސް ވަނީ ޔަހޫދީންގެ ހަމަލާތަކާއި އެކު ހުއްޓިފައެވެ. އެ ތިން ހޮސްޕިޓަލަކީ ކަމަލް އަދުވާން، ބެއިތު ހެއިނޫން އަދި އިންޑޮނޭޝިއަން ހޮސްޕިޓަލެވެ.
ޣައްޒާގެ ބެއިތު ލަހްޔާ ގައި ހުންނަ ކަމަލް އަދުވާން ހޮސްޕިޓަލަށް އަމާޒުކޮށް އިސްރާއީލުން މިދިޔަ ހަފްތާގައި ދިން ހަމަލާތަކާއިއެކު އެތަނުގައި ފަރުވާ ހޯދަމުންދިޔަ ބަލިމީހުންނާއި މުއައްޒަފުންނާއި ސިއްހީ އެހީތެރިން ބަދަލުކޮށްފައިވަނީ އިންޑޮނޭޝިއަން ހޮސްޕިޓަލަށެވެ. އެތަނުގައި އެކަށީގެންވާ ސިއްހީ ފަރުވާ ފޯރުކޮށްދޭނެ ވަސީލަތްތައް ނެތުމުން އެތަކެތި ފޯރުކޮށްދިނުމުގެ މަސައްކަތްކުރަމުން އަންނަކަމަށް މީގެ ކުރިން އދ އިން ވަނީ ބުނެފައެވެ.
އެހެންނަމަވެސް، ސިއްހީ ފަރުވާގެ އިތުރުން ޔަހޫދީ ފައުޖުން ކެނޑިނޭޅި ދެމުންގެންދާ ބޮަމުގެ ހަމަލާތަކުގެ ސަބަބުން އާއްމުން ބޯހިޔާވަހިކަން ހޯދަމުން އަންނަ އިންޑޮނޭޝިއަން ހޮސްޕިޓަލް ޔަހޫދީ ފައުޖުން ވަށާލިއިރު، ޖަބަލިއާގައި ހުންނަ އަލް އައުދާ ހޮސްޕިޓަލް ހުސްކުރުމަށްވެސް ޔަހޫދީން ވަނީ އަމުރުކޮށްފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
