އުވިފައިވާ ބްރޯޑްކާސްޓިން ކޮމިޝަނަށް ލިބެންޖެހޭ ފައިސާގެ ބައެއް ހިސާބުތައް ގެއްލުނު މައްސަލައެއް

މޯލްޑިވްސް ބްރޯޑްކާސްޓިން ކޮމިޝަން ވުޖޫދުގައި އޮތްއިރު، އެ ކޮމިޝަނަށް ލިބެންޖެހޭ ފައިސާގެ ބައެއް ހިސާބުތައް ގެއްލުނު މައްސަލައެއް ފެންމަތިވެއްޖެއެވެ.

ބްރޯޑްކާސްޓިން ކޮމިޝަނަށް ލިބެންޖެހޭ ފައިސާގެ ހިސާބުތައް ގެއްލުނު މައްސަލަ ފެންމަތިވެފައިވަނީ އޮޑިޓަރ ޖެނެރަލްގެ އޮފީހުން ނެރެފައިވާ އެ ކޮމިޝަނުގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓްގައެވެ. މި ރިޕޯޓްގައި ވާގޮތުން 2024 ވަނަ އަހަރު ކޮމިޝަނަށް ލިބެންޖެހޭ ފައިސާގެ ތެރެއިން ނުލިބިހުރި ފައިސާ ގެ ހިސާބުތައް ތައްޔާރުކުރެވެން ނެތްކަމަށް އޮޑިޓަށް ވަނީ އަންގާފައެވެ. އެކަން އެގޮތަށް ދިމާވީ ކޮމިޝަނުގެ ސާވާއަށް ދިމާވި މައްސަލައަކާ ގުޅިގެން ލިޔެކިޔުންތައް ފެންނަން ނެތުމުން ކަމަށްވެސް ކޮމިޝަނުން ވަނީ ބުނެފައެވެ.

އެހެންކަމުން ބްރޯޑްކާސްޓިން ކޮމިޝަނުގެ 2024 ވަނަ އަހަރުގެ ކޮމްޕްލަޔަންސް އޮޑިޓް ތައްޔާރުކުރުމުގައި 2024 ވަނަ އަހަރުގެ ނިޔަލަށް ކޮމިޝަނަށް ލިބެންޖެހޭ ފައިސާގެ ތެރެއިްނ ނުލިބިވާ ފައިސާގެ މައުލޫމާތު އެނގެން ނެތްކަމަށް އޮޑިޓް ރިޕޯޓްގައި ވަނީ ބުނެފައެވެ.

އޮޑިޓް ރިޕޯޓްގައި ބުނެފައިވަނީ ފައިނޭންސް މިނިސްތްރީން ބަލަހައްޓަމުންދާ ސެޕް ސިސްޓަމުގައި ލިބެންހުރި މައުލޫމާތަށް ބަލާއިރު، 2024 ވަނަ އަހަރުގެ ރެކޯޑް ކުރެވިފައިވާ ހިސާބުތަކަށް ބަލާއިރު، ކޮމިޝަނަށް 7.4 މިލިއަން ރުފިޔާ ލިބެން ޖެހެއެވެ. ނަމަވެސް އެ އަހަރުގެ އެ ހިސާބުތައް ރަނގަޅަށް ބެލެހެއްޓިފައި ނެތުމުން ލިބެންޖެހި ނުލިބިވާ ފައިިސާގެ ފުރިހަމަ ތަފްސީލް އެނގެން ނެތްކަމަށް އޮޑިޓް ރިޕޯޓްގައި ވަނީ ފާހަގަކޮށްފައެވެ.

އޮޑިޓް އޮފީހުން ތައްޔާރުކުރި ބްރޯޑްކާސްޓިން ކޮމިޝަނުގެ 2023 ވަނަ އަހަރުގެ ކޮމްޕްލަޔަންސް އޮޑިޓަށް ބަލާއިރު އެއަހަރުގެ ނިޔަލަށް އެ ކޮމިޝަނަށް 35.6 މިލިއަން ރުފިޔާ ލިބެން ޖެހެއެވެ. އެ އަހަރުގެ އޮޑިޓް ރިޕޯޓްގައިވެސް ވަނީ، ކޮމިޝަނަށް ލިބެންޖެހޭ ފައިސާ ހޯދުމުގައި މާލިއްޔަތު ޤަވާއިދާ އެއްގޮތަށް އަމަލުކުރަމުން ނުދާކަން ފާހަގަކޮށް އެކަންކަން ރަނގަޅުކުރަން އަންގާފައެވެ.

ބްރޯޑްކާސްޓިން ކޮމިޝަނަށް ލިބެންޖެހޭ ފައިސާގެ ހިސާބުތައް ގެއްލުނުކަމަށް އޮޑިޓް ރިޕޯތްގައި ބުނެފައިވާއިރު، މިހާރު އެ ކޮމިޝަނަކީ އުވިފައިވާ ކޮމިޝަނެކެވެ. އެ ކޮމިޝަން އުވިފައިވަނީ، މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލު, ރައީސް ޑރ. މުޙައްމަދު މުޢިއްޒު މިދިޔަ އަހަރުގެ ސެޕްޓެމްބަރުމަހުގެ 18 ވަނަ ދުވަހު ތަސްދީގުކުރެއްވުމާ ގުޅިގެންނެވެ. ބްރޯޑްކާސްޓިން ކޮމިޝަން އުވުމާއެކު އެތަނުން ކުރަމުން އައި މަސައްކަތްތައް މިހާރު ކުރަނީ އަލަށް އުފެއްދި މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުންނެވެ.