ހުއްޓިފައިވާ ގާދިއްފުށީ ސްކޫލުގެ އިމާރާތުގެ މަސައްކަތަށް އެންމެ އިސްކަމެއް ދީގެން ނިންމާނަން: ރައީސް މުޢިއްޒު

ގާދިއްފުށީ ސްކޫލުގެ އިމާރާތުގެ މަސައްކަތާއި އަދި ސްކޫލާގުޅިފައިވާ ހުރިހާ މަސައްކަތްތައް އެންމެ އިސްކަންދޭ މަސައްކަތްތަކުގެ ގޮތުގައި ކުރިޔަށްގެންދަވާނެ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ކޮޅުމަޑުލުގެ ބައެއް ރަށްރަށަށް އެމަނިކުފާނު ކުރައްވަމުންގެންދަވާ ދަތުރުފުޅުގެ އެންމެ ފަހު މަންޒިލުކަމުގައިވާ އެ އަތޮޅު ގާދިއްފުށްޓަށް މިއަދު ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

އެގޮތުން ރައީސުލްޖުމްހޫރިއްޔާ ވިދާޅުވީ، ތ އަތޮޅުން ވަޑައިގެންނެވި ގިނަ ރަށްރަށުގައި ހުއްޓިފައި ނޫނީ ކުރަންޖެހިފައި ހުރީ ގާތްގަނޑަކަށް އެއް ކަންތައްތަކެއް ކަމަށެވެ.

އަދި ގާދިއްފުށީގައި އެގޮތުން ހުއްޓިފައި ހުރި ކަންކަމުގެ ތެރެއިން އެންމެ މުހިންމު ކަމަކަށް އޮތީ ސުކޫލް އިމާރާތުގެ މަސައްކަތް ކަން ފާހަގަކުރައްވައި ރައީސް މުޢިއްޒު ވަނީ އެކަމަށް އެންމެ އިސްކަމެއް ދެއްވައިގެން ކުރިއަށް ގެންދަވާނެ ކަމަށެވެ.

މިހާރު ހުއްޓިފައި، އެތަށް ދުވަހެއް ވެފައި އެހެރަ ސުކޫލް އިމާރާތް، ކަމަށް ވިޔަސް، އަދި ދެން ހުރި ބަނދަރާއި އެހެން ވަރަށް ގިނަ މަސައްކަތް އެބަހުރި. އެކަންކަން އަޅުގަނޑުމެން އިރާދަކުރެއްވިޔާ ކޮށްދޭނަން. އިރާދަކުރެއްވިޔާ މިއަދު އަޅުގަނޑު ޔަގީންކަން މިދެނީ، ސުކޫލް، އެއީ އެންމެ ބޮޑަށް ބޭނުންޖެހިފައި އޮތް ކަމަކަށް ފާހަގަކުރެވޭ ކަންތައް. އެ މަސައްކަތް އެ އޮތީ ވަރަށް ބޮޑަށް ފަހަތަށް ގޮއްސައި. އެތަށް އަހަރެއްގެ އިހްމާލުން. އެހެންވީމާ އެ ސުކޫލުގެ އިމާރާތާއި ސުކޫލާއި ގުޅިފައިވާ ހުރިހާ ކަންތައް ތަކެއް، ވަރަށް އަވަހަށް ފަށްޓައިދޭނަން

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މީގެ އިތުރުން އެރަށުގެ ބިންހިއްކުމުގެ މަޝްރޫޢުވެސް ރައީސުލްޖުމްހޫރިއްޔާ ވަޢުދުވެވަޑައިގެންފައިވާ ގޮތަށް ގުރައިދޫ އެއަރޕޯޓްގެ މަސައްކަތާއެކު މިއަހަރުގެ ތެރޭގައި ފެށިގެންދާނެކަމުގައި އެމަނިކުފާނު ވިދާޅުވިއެވެ.

އަދި ބަނދަރުގެ މަސައްކަތަކީ ކުރީގެ ސަރުކާރުން އެމަސައްކަތް ކުރެވޭނެ ގޮތެއް ނެތި ހަވާލުކޮށްފައިވާ މަސައްކަތެއްކަން ފާހަގަކުރައްވައި ރައީސުލްޖުމްހޫރިއްޔާ ވަނީ އެމް.ޓީ.ސީ.ސީއާ ހަވާލުކޮފައިވާ މި މަސައްކަތްވެސް ކުރިޔަށްގެންދެވޭނެ ގޮތެއް ބައްލަވައިގެން ސަރުކާރުން އެ މަޝްރޫޢުވެސް ކުރިޔަށްގެންގޮސް ދެއްވާނެކަމުގައި ވިދާޅުވެފައެވެ. މީގެ އިތުރުން އެމަނިކުފާނު ވަނީ މި ސަރުކާރުން ރަށްރަށުގެ ތަރައްޤީގެ މަސައްކަތްތައް ކުރިޔަށްގެންދަވާނީ ތެދުވެރިކަމާ އިޚްލާސްތެރިކަމާއެކު ކަމުގައި ވިދާޅުވެފައެވެ.

ރައީސުލްޖުމްހޫރިއްޔާގެ ވާހަކަފުޅުގައި އެމަނިކުފާނު ވަނީ ކައުންސިލްތަކަށް އިޤްތިޞާދީ މަސައްކަތްތައް ކުރުމަށް ރަށެއް ލިބޭގޮތަށް ކައުންސިލުތަކަށް ފަހިކޮށްދެއްވާފައިވާ ފުރުސަތުގެ ބޭނުން ހިފުމަށް އެދިވަޑައިގެން ދެއްކެވި ވާހަކަފުޅު ތަކުރާރު ކުރައްވާފައެވެ.