ރައީސް ޔާމީންގެ ޝަރީއަތް ލައިވްކޮށްގެން ކުރިއަށް ގެންދަން ނިންމައިފި

ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރިންގެ ކުށް ސާބިތުވެފައިވާކަމަށް ކުރީގެ ރައީސް އަބްދުالله ޔާމީންގެ މައްޗަށް ކޮށްފައިވާ ހުކުމް ބާތިލުކޮށް, ކްރިމިނަލް ކޯޓުން އަލުން ބަލަން ފެށި މައްސަލަ ކުރިއަށް ގެންދާނީ ލައިވްކޮށްގެން ކަމަށް ނިންމައިފި އެވެ.

މައްސަލަ އަލުން ބަލަން ހައިކޯޓުން ކުރި ހުކުމާ ގުޅިގެން މި މައްސަލައިގައި ޝަރީއަތް ކްރިމިނަލް ކޯޓުން މިއަދު ފަށާފައިވާއިރު، މިއަދުގެ އަޑުއެހުމުގައި ރައީސް ޔާމީންގެ ފަރާތުން ވަނީ ޝަރީއަތް ލައިވްކޮށްގެން ކުރިއަށް ގެންދިއުމަށް އެދިވަޑައިގެންފައެވެ.

މިކަމުގައި ދައުލަތުގެ އިއުތިރާޒެއް ނެތުމުން، ޝަރީއަތް ލައިވްކޮށްގެން ކުރިއަށް ގެންދަން މައްސަލަ ބައްލަވާ ގާޒީ ނިންމެވިއެވެ.

މި މައްސަލައިގައި، ރައީސް ޔާމީންގެ މައްޗަށް އުފުލާފައިވާ ދައުވާތަކާއި ގުޅޭ ހެކިތައް އެއްފަރާތްކުރުމަށް ހައި ކޯޓުން ނިންމި ނިންމުން އިސްތިއުނާފް ކުރުމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ސުޕްރީމްކޯޓަށް ހުށަހަޅާފައިވާއިރު، ސުޕްރީމް ކޯޓުން އިއްޔެ ވަނީ އެ މައްސަލަ ބަލައިގަތުމަށް ނިންމާފައެވެ.

މި މައްސަލައިގެ އަޑުއެހުންތައް އަދި ފަށާފައި ނުވިނަމަވެސް، ސްޕްރީމް ކޯޓުގެ ނިންމުމާ ގުޅިގެން އެ ބަޔަށް ބަދަލު އައިސްފާނެ ކަން ފާހަގަކުރައްވަމުން ގާޒީ ވިދާޅުވީ، އެ މައްސަލާގައި ދެން ހުރި ބައިތައް ކުރިއަށް ގެންދެވޭނެ ކަމަށެވެ.

މި މައްސަލައިގެ އަޑުއެހުން ދެން އޮންނާނީ  އަންނަ މަހުގެ 16 ވަނަ ދުވަހުއެވެ.

އާރަށް ކުއްޔަށް ދިނުމުގެ މުއާމަލާތުގައި ރިޝްވަތު ދިނުމާއި މަނީ ލޯންޑްރިންގެ ކުށުގެ ދައުވާ ޔާމީންގެ މައްޗަށް ސާބިތުވާ ކަމަށާއި މި މުއާމަލާތުގައި ބައިވެރިވާ ވ. ފުލިދޫ، ހަނދުވަރީގެ، ޔޫސުފް ނަޢީމްގެ މައްޗަށް ރިޝްވަތު ދިނުމުގެ ކުށް ސާބިތުވާކަމަށް ކްރިމިނަލް ކޯޓުން ނިންމީ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.

ކްރިމިނަލް ކޯޓުގެ ނިންމުން ރައީސް ޔާމީނާއި ޔޫސުފް ނައީމް ގެ ފަރާތުން ހައިކޯޓުގައި އިސްތިއުނާފުކުރުމުން، ހައިކޯޓުން ކަނޑައަޅާފައިވާ އުޞޫލުތަކާ އެއްގޮތަށް ކްރިމިނަލް ކޯޓުގެ ނިންމުމާމެދު އަލުން ގޮތެއް ކަނޑައެޅުމަށްޓަކައި މައްސަލަ ކްރިމިނަލް ކޯޓަށް ތަޙުވީލުކުރުމަށް ހައި ކޯޓުން ނިންމީ 18 އެޕްރީލް 2024 ގައެވެ.