ރާއްޖޭގެ އިގްތިސާދު މިއަހަރު 5.2 ޕަސެންޓަށް ކުރިއަރާނެ ކަމަށް ލަފާކުރެވޭ: އައިއެމްއެފް

ރާއްޖޭގެ އިގްތިސާދު މިއަހަރު 5.2 ޕަސެންޓަށް ކުރިއަރާނެ ކަމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ލަފާކޮށްފިއެވެ.

ރާއްޖޭގެ އިގުތިސާދީ ހާލަތާއި އިގުތިސާދީ ސިޔާސަތުތަކާއި ގުޅޭ ގޮތުން އައިއެމްއެފްގެ ވަފުދެއް ވަނީ ރާއްޖެ އަށް ހަތަރު ދުވަހުގެ ޒިޔާރަތްތެއް ކޮށްފަ އެވެ. މި ޒިޔާރަތަށް ފަހު އެ ވަފުދުން ހޯދި ހޯދުންތަކަށް ރިއާޔަތްކޮށް ނެރުނު ބަޔާނުގައި ވަނީ ކޮވިޑްގެ ސަބަބުން ރާއްޖޭގެ އިގްތިސާދު ދަށްވި ނަމަވެސް 2022 ވަނަ އަހަރު ރާއްޖޭގެ އިގްތިސާދު 13.2 އިންސައްތައަށް ކުރިއަރައިގެން ގޮސްފައިވާ ކަމަށެވެ. އަދި މި އަދަދު 2023 ވަނަ 4.4 އިންސައްތަ އަށް ކުރިއަރާފައިވާއިރު، 2024 ވަނަ  އަހަރު ރާއްޖޭގެ އިގްތިސާދު 2024 ވަނަ އަހަރު 5.2 އިންސައްތަ އަށް ކުރިއަރާނެ ކަމަށް އައިއެމްއެފް އިން ވަނީ އަންދާޒާކޮށްފައެވެ.

އައިއެމްއެފް އިން ބުނީ މިއަދަދު ކުރިއަރައިގެން ދިޔުމުގެ މައިގަނޑު ސަބަބަކީ ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވާނެ ކަމަށް ލަފާކުރެވޭތީ ކަމަށެވެ. އަދި ވެލާނާ އިންޓަނޭޝަލް އެއާޕޯޓުގެ ޓާމިނަލް ބޮޑުކޮށް ހުޅުވުމާއި އެކު، ރާއްޖޭގެ ހޮޓެލް ތަކުގެ ކެޕޭސިޓީ އިތުރުކޮށްފައިވުމަކީ ވެސް މީގެ ސަބަބެއް ކަމަށެވެ.

އެހެންނަމަވެސް އައިއެމްއެފް އިން ވަނީ ރާއްޖޭގެ މާލީ ހާލަތުގެ ނާޒުކުކަން ފާހަގަކޮށް އެކަމާއި މެދު ކަންބޮޑުވުން ފާޅުކޮށްފައެވެ. މި އަހަރުގެ މެދު ތެރޭގައި ދަރަނި ކުޑަ ވާނެ ކަމަށް ލަފާ ކުރެވުނު ނަމަވެސް މުޅި ޖުމްލަ މުޅި އަހަރުގެ ތެރޭގައި ރާއްޖޭގެ ދަރަންޏަށް ބަދަލެއް ނާންނާނެ ކަމަށް ވެސް އައިއެމްއެފް އިން ވަނީ ލަފާކޮށްފައެވެ. އެހެންކަމުން، އައިއެމްއެފްއިން ވަނީ ރާއްޖޭގެ ވިޔަފާރި ރަނގަޅުކުރުމާއި، ސިޔާސަތުތައް ހަރުދަނާކުރުމާއި، ހުނަރު ތަރައްޤީކުރުން އިތުރުކުރުމަށް ގޮވާލާފައެވެ.

އައިއެމްއެފް ގެ ވަފުދު ރާއްޖެއަށް ކުރި މި ދަތުރުގައި އެބޭފުޅުން ވަނީ ތަރައްގީގެ އެޖެންޑާ އާ ގުޅޭ ގޮތުން ކަމާ ގުޅޭ ފަރާތްތަކާ އެކު މަޝްވަރާކޮށްފައެވެ. މިގޮތުން މި ބޭފުޅުން ފިނޭންސް މިނިސްޓަރު މުހައްމަދު ޝަފީގާއި، ގަވަރުނަރު އަލީ ހާޝިމްގެ އިތުރުން ސަރުކާރާއި އެމްއެމްއޭގެ އިސް ބޭފުޅުންނާ ބައްދަލުކުރައްވާފައެވެ. އަދި ޕްރައިވެޓް ސެކްޓަރގެ މަންދޫބުންނާއި، ބައިލެޓަރަލް ޑޯނަރުންނާއި، ޑިވެލޮޕްމަންޓް ޕާޓްނަރުންނާވެސް މި ވަފުދުން ބައްދަލުކޮށްފައިވެއެވެ.

އައިއެމްއެފްއިން މިފަދައިން ބުނެފައިވާއިރު، ރައީސް ޑރ.މުއިއްޒު ވަނީ ރާއްޖޭގެ އިޤްތިޞާދު ރަނގަޅުކުރުމަށް ވަރަށްބޮޑު، ބުރަ މަސައްކަތްތަކެއް ފަށާފައިވާ ކަމަށާއި ރާއްޖެއަށް އަންނަ، ކަމާގުޅޭ ބައިނަލްއަޤްވާމީ އެކިއެކި އިދާރާތަކުންވެސް އެކަން ބަލައިގަންނަކަމަށް ވިދާޅުވެފައެވެ.