މީޑިއާތައް ގުޅިގެން ކުރިއަށްގެންދިޔަ "ސިލޯނާއެކު ދިވެހިން" ކާމިޔާބުކަމާއެކު ނިންމާލައިފި

އަވައްޓެރި ސްރީލަންކާއަށް އެހީވުމުގެ ގޮތުން ދިވެހި މީޑިއާތަކުން ކުރިއަށްގެންދިޔަ "ސިލޯނާއެކު ދިވެހިން" ތެލެތޯން ކާމިޔާބުކަމާއެކު ނިންމާލައިފިއެވެ.

ދައުލަތުގެ މީޑިއާ، ޕީއެސްއެމުން އިސްނަގައިގެން ކުރިއަށްގެންދިޔަ މި ތެލެތޯނުގައި ރާއްޖޭގެ 37 މީޑިއާއަކުން ބައިވެރިވިއެވެ. ވަރަށް ކުއްލިގޮތަކަށް މީޑިއާ ހައުސްތަކަށް ގޮވާލައި މީޑިއާތަކުން ދިން ފުރިހަމަ އެއްބާރުލުމާއެކު ތެލެތޯން ފަށާފައިވަނީ ނޮވެންބަރު 30 ވަނަ ދުވަހުގެ ހެނދުނު 9:00 ޖެހިއިރުއެވެ. ޓެލެތޯން ނިންމާލާފައިވަނީ މިއަދު މެންދުރުފަހު ދޭއްޖެހިފަހުންނެވެ.

ތެލެތޯން އިންތިޒާމްކުރި ސްޓިއަރިން ކޮމިޓީން ބުނެފައިވަނީ، ޓެލެތޯނަށް ގިނަ އަދަދެއްގެ ޢާންމު ރައްޔިތުންނާއި ސަރުކާރުގެ ވުޒާރާތަކާއި އިދާރާތަކާއި ކުންފުނިތަކާއި ކުލަބު ޖަމިއްޔާތަކާއި އޮފީސްތަކުގެ އިތުރުން މީޑިއާތަކުން ވަނީ ފައިސާގެ އެހީތެރިކަން ފޯރުކޮށްދީފައިވާކަމަށެވެ. އެ ހުރިހާ ފަރާތްތަކެއްގެ އެއްބާރުލުމާއެކު، ޓެލެތޯންއަށް 11.4 މިލިޔަން ރުފިޔާ އާއި 43،000 ޑޮލަރު ވަނީ ލިބިފައެވެ.

ތެލެތޯން ކުރިއަށްދިޔައިރު މާލެ ސަރަހައްދުގެ އެކި ދިމާލުގައި ފަންޑްފޮށިތައް ބެހެއްޓުނުއިރު، އެކައުންޓަށް ފައިސާ ޖަމާކުރަން ބޭނުންވާ މީހުންނަށް ފަސޭހަކަމާއެކު އެ އިންތިޒާމްތައްވެސް ވަނީ ހަމަޖައްސައިދީފައެވެ. ތެލެތޯނަށް ކުރިއަށްގެންގޮސްފައިވަނީ މިނިވަން އޮޑިޓްފާމެއް ކަމަށްވާ ކްރޯ މޯލްޑިވްސްގެ ބައިވެރިވުމާއެކުގައެވެ.

ސިލޯނާއެކު ދިވެހިން ތެލެތޯނަށް އެންމެގިނައިން ފައިސާ ހަދިޔާކޮށްފައިވަނީ ދިވެހި ފުލުހުންގެ މުއައްސަސާއިންނެވެ. ފުލުހުންގެ ފަރާތުން 2.4 މިލިއަން ރުފިޔާ ހަދިޔާކުރިއިރު، އިންޓަރނޭޝަނަލް އެއިޑް ކެމްޕެއިން ފަދަ ޖަމާއަތްތަކުންވެސް މިލިއަނުން ފައިސާ ހަދިޔާކޮށްފައެވެ.

ސްރީލަންކާއަށް އެހީވުމުގެ ގޮތުން ކުރިއަށްގެންދިޔަ މި ތެލެތޯނަށް ސްރީލަންކާ ސަރުކާރުގެ ފަރާތުން ވަނީ ތައުރީފްކޮށް ދިވެހިންނަށް ޝުކުރު އަދާކޮށް، ލަންކާއަށް އެހީވުމަށް އެންމެ އަވަހަށް އިސްނަގައި އަމަލީގޮތުން މަސައްކަތް ފެށި ބަޔަކީ ދިވެހިންކަން ފާހަަގަކޮށްފައެވެ.