މެންބަރު އިމްތިޔާޒުގެ ބިލަކީ ޝަރީއާ ފޮހެލުމަށް ދުރާލާ ރާވައިގެން ކުރާކަމެއް ކަމަށް ޑރ އިޔާޒް ވިދާޅުވެއްޖެ

ވަކީލުންގެ ކަންކަން ހަރުދަނާ ކުރުމަށް މަފަންނު އުތުރު ދާއިރާގެ މެންބަރު އިމްތިޔާޒް ފަހުމީ ހުށަހެޅުއްވި ގާނޫނީ ހިދުމަތުގެ ބިލަކީ އިސްލާމީ ޝަރީޢާ ފޮހެލުމަށް ދުރާލާ ރާވައިގެން ކުރާކަމެއް ކަމުގައި ޑރ މުހައްމަދު ޢިޔާޟް އަބްދުލްލަތީފް ވިދާޅުވެއްޖެއެވެ.

ހަމައެކަނި ކޮމަންލޯ ކިޔަވައިގެންތިބި ބޭފުޅުންނަށް ރާއްޖޭގެ ކޯޓުތަކުގައި ވަކާލާތު ކުރުމުގެ ހުއްދަ ދިނުމަކީ އިސްލާމީ ޝަރީޢާ ފޮހެލުމަށް ދުރާލާ ރާވައިގެން ކުރާކަމެއް ކަމަށާއި އިސްލާމީ ޝަރީއަތާއި ހިލާފު އެއްވެސް ޤާނޫނަކަށް އަދި ޤަވާއިދަކަށް ބޯލަނބާ ކިޔަމަންވާކަށް ނުޖެހޭނެ ކަމުގައި ޑރ މުޙައްމަދު ޢިޔާޟް ކުރެެއްވި ޓުވީޓުގައި ވަނީ ވިދާޅުވެފައެވެ.

Hama ekani common law kiyavaigen thibbevi beyfulhunnah vakaalaathu kurumuge hudhdha dhinumaky islami Shareeaiy fohelumah dhuraalaa reyvigen kurevey kameh. Islami Shareeathaai khilaafu evves Qaanoonakah adhi gavaaidhakah boolanbaa kiyamanvaakah nujeheyne.

— Dr Mohamed Iyaz (@dr_iyaz) December 3, 2018

ވަކީލުންގެ ކަންކަން ހަރުދަނާ ކުރުމަށް މަފަންނު އުތުރު ދާއިރާގެ މެންބަރު އިމްތިޔާޒް ފަހުމީ ހުށަހެޅުއްވި ގާނޫނީ ހިދުމަތުގެ ބިލުގައި ވަކީލު ކަމުގެ ހުއްދަ ދޭނެ ޝަރުތަކުގައި ވަކީލު ކަމުގެ ހުއްދަ ދެވޭނީ ގާނޫނުގައިވާ ތަމްރީނުތައް ހާސިލްކޮށްފައިވާ މީހުންނަށް ކަމަށް ވަނީ ބުނެފަ އެވެ. އަދި ބިލްގައިވާ ގޮތުން ވަކީލު ކަމުގެ ހުއްދަ ދޭން ވަނީ ޝަރީއާ އެންޑް ލޯއިން ޑިޕްލޮމާ ނުވަތަ ފުރަތަމަ ޑިގްރީ ނުވަތަ އެލްއެލްބީ ހާސިލްކޮށްފައިވާ މީހުނަށެވެ.

އެ ގާނޫނަށް އަމަލުކުރަން ފަށާތާ، ތިން އަހަރު ދުވަހުގެ ތެރޭގައި އެ ސަނަދުތައް ނެތް މީހުން، ގާނޫނީ ދާއިރާއިން ފުރަތަމަ ޑިގްރީ ހާސިލް ކުރަން ޖެހޭނެ ކަމަށާއި ނޫންނަމަ އެމީހުންގެ ގާނޫނީ ވަކީލް ކަމުގެ ހުއްދަ ބާތިލްވެގެން ދާނެ ކަމަށް ބިލްގައިވެ އެވެ.

ހަމައެކަނި ޝަރީއާ ކިޔަވައިގެން ރާއްޖޭގައި ގިނަ ބަޔަކު ގާނޫނީ ވަކީލުކަން ކުރަމުން ދާއިރު ގިނަ އަދަދަކަށް ދިވެހިން ޝަރީއާ ކިޔަވަމުން ގެންދާ މަދީނާ ޔުނިވާސިޓީ އާއި އަޒްހަރުންވެސް ކިޔަވާދެނީ ޝަރީއާއެކަނިކަން ފާހަގަކޮށްލަންޖެހެއެވެ. މިޤާނޫނު ތަސްދީގު ކުރާހިސާބުން މި ސަނަދު ނަގާފައިވާ ފަރާތްތަކުން ވަކާލާތު ނުކުރެވޭނެއެވެ.

ރާއްޖޭގެ ޤާނޫނު އަސާސީގެ އަސާސް އަކީ ޝަރީއާކަމަށް ވެފައި މިފަދަ ބިލެއް މަޖިލީހަށް ހުށަހެޅުމުން ގިނަ އަދަދެއްގެ ފަރާތްތަކަކުން އަންނަނީ މިކަމަށް ފާޑުވިދާޅަމުންނެވެ. ޚާއްސަކޮށް ދީނީ އިލްމުވެރިން ގެ ފާޑުކިޔުން ވަނީ މި ބިލަށް އަމާޒުވެފައެވެ.