މިހާރު ކޫއްޑޫއިން މިނެޓަކުން 160 ލީޓަރު ތެޔޮ އެޅޭނެ

ރާއްޖޭގެ ގިނަ މަސްވެރިން ތެޔޮއެޅުމަށާއި، މަސްކިރުމަށާއި، ލަފާފުރުމަށް ބޭނުންކުރާ އެންމެ މުހިއްމު އެއް ރަށްކަމަށްވާ ކޫއްޑޫގައި މަސް ދޯނި ފަހަރަށް މިނެޓަކު 160 ލީޓަރު ތެޔޮ އެޅޭ ޕަންޕެއް ގާއިމްކޮށްފިއެވެ.

މިކަން ހާމަކޮށްފައިވަނީ މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ކުރެއްވި އެކްސް ޕޯސްޓެއްގައެވެ.

އެ ޕޯސްތުގައި ބުނެފައިވަނީ މިފަދަ ޕަންޕެއް ޤާއިމު ކުރެވުނީ މަސްދޯނިތަކަށް ތެޔޮއެޅުމުގައި މަސްވެރިން ގިނަ ވަގުތު ހޭދަކުރަން ޖެހޭ ޖެހުމަށް ލުއިފަސޭހަ ގޮތްތަކެއް ހޯދައި ދިނުމުގެ މަޤްޞަދުގައި ކަމަށެވެ.

"ކޫއްޑޫގައި ގާއިމުކޮށްފައިވާ  އެފްއެސްއެމް ތެޔޮ ސްޓޭޝަންތަކުން މަސްދޯނިތަކަށް ތެޔޮ އެޅުމުގައި ގިނަ ވަގުތު ހޭދަކުރަންޖެހޭތީ، އެކަން ހައްލުކުރުމަށް ކުރަމުންދާ މަސައްކަތުގެ  ތެރެއިން މިނެޓަކު 160 ލީޓަރު ތެޔޮ އެޅޭ ޕަންޕް އިންސްޓޯލްކޮށް ޙިދުމަތްދޭން ވަނީ ފަށާފައި."

މިނިސްޓްރީގެ ޕޯސްޓުގައި ބުނެފައިވެއެވެ.

މިނިސްޓްރީގެ ފަރާތުން މަސްވެރިންނަށް ލުއި ފަސޭހަ ގޮތްތަކެއް ހޯދައި ދެމުން އަންނަ އިރު މަސްވެރިކަމާއި ބެހޭ ވަޒީރު އަހްމަދު ޝިޔާމް މުހައްމަދު ވިދާޅުވެފައި ވަނީ ރާއްޖޭގެ މަސްވެރިންނަށް ދިމާވެފައިވާ މައްސަލަތައް ހައްލުކޮށްދިނުމަށް ކެނޑިނޭޅި މަސައްކަތް ކުރައްވަމުން ގެންދަވާ ކަމަށެވެ.

އެގޮތުން މިދިޔަ ސަރުކާރުން މަސްވެރިންނަށް ނުދީހުރި ގިނަ އަދަދެއްގެ ފައިސާ މިހާރު މި ސަރުކާރުން ހަވާލުކުރަމުން ގެންދާ ކަމަށެވެ.

މީސްމީޑިޔާ މެދުވެރިކޮށް އާއްމުންކުރާ ސުވާލުތަކަށް ސީދާ ރައީސް ޖަވާބު ދެއްވާގޮތަށް ރައީސުލްޖުމްހޫރިއްޔާގެ އޮފީހުން ދާދިފަހުން ފެށްޓެވި ސިލްސިލާ "ރައީސްގެ ޖަވާބު" ޕްރޮގްރާމުގައި އާއްމުންގެ ފަރާތުން ކުރި ސުވަލަކަށް ޖަވާބު ދެއްވަމުން ރައީސުލުރައީސުލްޖުމުހޫރިއްޔާ ޑރ.މުހައްމަދު މުއިއްޒުވެސް ވިދާޅުވެފައި ވަނީ މަސްވެރިންނަށް ދޭންޖެހިފައިވާ ފައިސާ ވަރަށް އަވަހަށް މަސްވެރިންނާއި ހަވާލުކުރައްވާނެ ކަމަށެވެ.

"މިފްކޯއިން ލޯނެއް ނަގައިގެން ވިޔަސް، އެ ފައިސާ ވަރަށް އަވަހަށް ހަވާލު ކުރަން އަޅުގަނޑުމެން މަސައްކަތް ކުރަނީ، އިރާދަކުރެއްވިއްޔާ މިކަން ވަރަށް ޔަގީން ކަން އެބަ އޮތް ވަރަށް އަވަހަށް ހައްލުކޮށްދެވޭނެ ކަމަށް، ހުރިހާ މަސްވެރިންނަށް ދޭން ހުރި ހުރިހާ ފައިސާއެއް ވަރަށް އަވަހަށް އިރާދަކުރެއްވިއްޔާ ހަވާލު ކުރުމަށް މި މަސައްކަތް ކުރަނީ،".

ރައީސް ޑރ.މުހައްމަދު މުއިއްޒު ވިދާޅުވެފައި ވެއެވެ.