ތިނަދޫ އާބާދީ އޮޅުވާލި ކަމަށް ބުނާ މައްސަލާގައި ދައުވާކުރުމަށް ޕީޖީއަށް ފޮނުވައިފި

ގދ. ތިނަދޫއަށް ސިޓީއެއްގެ ދަރަޖަ ދިނުމުގައި އެ ރަށުގެ އާބާދީ އޮޅުވާލި ކަމަށް ތުހުމަތުކުރެވޭ މައްސަލައިގެ ތަހުޤީޤު ނިންމައި ދައުވާކޮށްދިނުމަށް އެދި ފުލުހުން ޕީޖީ އޮފީހަށް ފޮނުވައިފިއެވެ.

ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެންބަރު ސައުދުالله ހިލްމީ 2024 ވަނަ އަހަރު މި މައްސަލަ މަޖިލީހަށާއި ލޯކަލް ގަވާމެންޓް އޮތޯރިޓީ (އެލްޖީއޭ) އަށް ވަނީ ހުށަހަޅުއްވާފައެވެ. އޭނާ ވިދާޅުވެފައިވާގޮތުން  ތިނަދޫގެ އާބާދީގައި 10150 މީހުން ހަމަވާ ކަމަށް ބުނެފައިވަނީ އޮޅުވާލައިގެންނެވެ.

އަދި އެކަން އެހެން ކުރީ އޭރުގެ ކައުންސިލަރުން މޭޔަރުކަމުގެ ލަޤަބު ލިބިގަތުމުގެ ބޭނުމުގައާއި ކުރީގެ ރައީސް އިބްރާހީމް މުޙައްމަދު ޞާލިޙު ތިނަދޫ ސިޓީއަކަށް ހައްދަވާނެ ކަމަށް ވަޢުދުވެވަޑައިގެންފައި އޮތުމުން ކަމަށްވެސް ތުހުމަތު ކުރެއްވިއެވެ.

މި މައްސަލައިގައި ތިނަދޫ ސިޓީގެ މޭޔަރު ސައުދު ޢަލީ މި މަހުގެ 10 ވަނަ ދުވަހު އެ ސިޓީގެ ފުލުހުންގެ އިދާރާއަށް ހާޒިރުކޮށް ސުވާލުކޮށްފައިވާއިރު މިދިޔަ ހަފުތާގައި ދައުވާކޮށްދިނުމަށް އެދި ޕީޖީ އޮފީހަށް މައްސަލަ ފޮނުވާފައިވާ ކަމަށް ފުލުހުން ބުނެއެވެ.

އެހެންނަމަވެސް ދައުވާ ކުރަން އެދުނީ ކޮން ބައެއްގެ މައްޗަށް ކަމެއް ނުވަތަ ކޮން ކުށެއްގެ ދައުވާއެއް ކަމެއް ފުލުހުން ހާމައެއް ނުކުރެއެވެ.

ތިނަދޫގެ އާބާދީ އޮޅުވާލި ކަމަށްބުނެ މީގެ ކުރިން އެންޓި ކޮރަޕްޝަން ކޮމިޝަން (އޭސީސީ) އަށްވެސް މައްސަލަ ހުށަހެޅި އެވެ. އަދި އޭސީސީން ވަނީ ތިނަދޫ ސިޓީ ކައުންސިލްގެ އިދާރާ ފާސްކޮށް، ބައެއް ލިޔެކިޔުން ގެންގޮސްފަ އވެެ.

ތިނަދޫ ސިޓީއެއްގެ ގޮތުގައި ކަނޑައެޅީ 2023 ވަނަ އަހަރުގެ އޮގަސްޓް 30 ގައި ރިޔާސީ އިންތިޚާބުގެ ކެމްޕެއިން ދުވަސްވަރު ރައީސް ޞާލިޙުގެ ވެރިކަމުގައެވެ. މި ސަރުކާރުން ވެސް ވަނީ އެ ނިންމުން ބަދަލެއް ނުގެނެސް ދެމެހެއްޓުމަށް ނިންމައިފައެވެ.

ޤާނޫނުގައި ބުނެފައިވާ ގޮތުން ސިޓީއެއްގެ ދަރަޖަ ދެވެނީ އާބާދީ 10،000 ހަމަވުމުންނެވެ.