ކޫއްޑޫގައި މަސްވެރިން ކުރަމުންގެންދާ އިހުތިޖާޖާއި ގުޅިގެން، މިނިސްޓަރު ޝިޔާމް އެރަށަށް ވަޑައިގަންނަވަނީ

ސަރުކާރުން މަސްވެރިންނަށް ދޭންޖެހޭ ފައިސާ ނުލިބޭތީ، ގއ.ކޫއްޑޫގައި މިއަދު އިހުތިޖާޖުކޮށް މުޒާހަރާކުރަމުންދާ މަސްވެރިންނާއި ބައްދަލުކުރެއްވުމަށް މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހްމަދު ޝިޔާމް އެރަށަށް ވަޑައިގަތުމަށް ހަމަޖެހިއްޖެއެވެ.

މިނިސްޓަރު ޝިޔާމް އެކްސް ގައި ކުރެއްވި ޕޯސްޓެއްގައި ވިދާޅުވީ ކޫއްޑޫގައި ތިއްބެވި މަސްވެރިންނާ ބައްދަލުކުރުމަށް ކޫއްޑޫއަށް ދިއުމަށްޓަކައި ށ. އަތޮޅުން ދަތުރުކުރައްވާކަމަށެވެ. އަދި މަސްވެރިންގެ ކަންބޮޑުވުންތަކާއި މަސްވެރިކަމުގެ ސިނާއަތުގައި ހުރި ގޮންޖެހުންތައް ސަރުކާރުން ހައްލު ކުރާނެ ކަމަށް މިނިސްޓަރު ވިދާޅުވިއެވެ.

" މަސްވެރިންގެ ކަންކަން ރައީސުލްޖުމްހޫރިއްޔާ ޑރ.މުއިއްޒު ގެންދަވަނީ ވަރަށްގާތުން ބައްލަވަމުން. ކޫއްޑޫގައި ތިއްބެވި މަސްވެރިންނާ ބައްދަލުކޮށްލަން އަޅުގަނޑު ކޫއްޑޫއަށް ދިއުމަށްޓަކައި ށ. އަތޮޅުން އެބަ ދަތުރުކުރުރަން. މަސްވެރިންގެ ހުރިކަންބޮޑުވުންތައް އަދި މަސްވެރި ސިނާއަތުގައި ހުރި ގޮންޖެހުންތައް ހައްލުކުރާނީ އަޅުގަނޑުމެން."

މިނިސްޓަރު ޝިޔާމް ވިދާޅުވިއެވެ.

ޑިމޮކްރެޓިކް މުޖުތަމަޢުތަކުގައި ޙައްޤު ހޯދަންކުރާ ސުލްހަވެރި އިހުތިޖާޖުތަކަށް މަރުޙަބާ ކިޔާނެ ކަމަށް ވިދާޅުވެ މިނިސްޓަރު ޝިޔާމް ވަނީ މި ކޫއްޑޫގައި މަސްވެރިން މިވަގުތު ކުރަމުންދާ އިހުތިޖާޖުގެ ބައިވެރިންގެ ނުތަނަވަސް ކަމަކީ މިވަގުތު ސަރުކާރަށް އެކަމެއްގެ ކަންބޮޑުވުން އެންމެބޮޑަށް އޮތް އަދި އެންމެ ބާރަށް ހައްލު ކުރަން މަސައްކަތް ކުރަމުން ގެންދާ ކަންބޮޑުވުމެއްކަން ފާހަގަކުރައްވާފައެވެ.

މީގެ އިތުރުންވެސް، މިނިސްޓަރު ޝިޔާމް ވަނީ ކޫއްޑުގެ އޮޕަރޭޝަން ކުރިޔަށް ގެންދެވޭނެ މާހައުލެއް އޮތުމަކީ އިހުތިޖާޖުގައި ބައިވެރިނުވާ އެތައް ދޯންޏެއްގެ މަސްވެރިންގެ ވަރަށް ބޮޑު އެދުމެއްކަން ފާހަގަކުރައްވާ، އެ މާހައުލު ޤާއިމުކޮށްދެއްވުމަށް އިހުތިޖާޖުގައި ތިއްބެވި މަސްވެރިންގެ އަރިހުން އެދިވަޑައިގެންފައެވެ.

މި ސަރުކާރަށް ވާރުތަވީ 250 ވަރަކަށް މިލިޔަން ރުފިޔާ އާއެކު މިހާރު ނުދެވި ހުރި ޖުމްލަ 280 މިލިޔަން ރުފިޔާގެ ބެކްލޮގު އެއްކޮށް މާރޗު މަހުގެ 5 ވަނަދުވަހުގެ ނިޔަލަށް ސަރުކާރުން ނިންމާނެ ކަމަށް މިނިސްޓަރު ވަނީ ވިދާޅުވެފައެވެ. އަދި މަހުގެ އަގު މުރާޖާ ކުރެވުނު ދުވަހުން ފެށިގެން ކިރުނު މަހަށްވާ 26 މިލިއަން ކޮންމެ ހަފްތާއަކު މިފްކޯއަށް ކިރާ މަހަށް، ހަފްތާއެއް ތެރޭ ފައިސާ ދެވޭނެ އިންތިޒާމުގެ ތެރެއިން މިހަފްތާ އެފައިސާ މިފްކޯއިން ހަމަޖައްސާނެކަމުގައި ވެސް މިނިސްޓަރު ވިދާޅުވިއެވެ.

މަސްވެރިން އިހުތިޖާޖް ކުރަމުންދާއިރު، ސަރުކާރުން ވަނީ މަސް ގަންނަ އަަގު 25 ރުފިޔާ އިން 20 ރުފިޔާ އަށް ދަށްކޮށްފައެވެ.

ޝިޔާމް ވިދާޅުވީ ކުރިއަށް އިންތިޚާބެއް އޮތް ދަނޑިވަޅެއްގައި، މަހުގެ އަގު ކުޑަކުރަން ސަރުކާރުން ނިންމުމަކީ ރައީސް ޑރ.މުއިއްޒުގެ ނިޔަތް ރަނގަޅުކަން ހާމަވެގެންދާ ކަމެއް ކަމަށެވެ. އަދި މި ގެނައި ބަދަލާއި އެކު މިފްކޯ ބަނގުރޫޓުނުވެ، މަސްވެރިންގެ ހާލަތު ވެސް ރަނގަޅުވެގެންދާނެކަމުގެ ޔަގީންކަން ވެސް ޝިޔާމް ދެއްވިއެވެ.