ޓްރަމްޕް ނެރުނު ބައެއް އަމުރު ތަކާއި ދެކޮޅަށް ދައުވާ ކުރަން ހުށަހަޅައިފި

އެމެރިކާގެ ރައީސް ޑޮނަލްޑް ޓްރަމްޕްގެ ދެވަނަ ދައުރުގެ ފުރަތަމަ ދުވަހު ނެރުނު އަމުރުތަކާ ދެކޮޅަށް ޙައްޤުތަކަށް މަސައްކަތްކުރާ ޖަމާޢަތްތަކާއި އަދި ސްޓޭޓް ގަވަމަންޓްތަކުން ޤާނޫނީ ފިޔަވަޅު އަޅަން ހުށަހަޅައިފިއެވެ.

މީގެ ތެރޭގައި އެމެރިކަން ސިވިލް ލިބަރޓީސް ޔޫނިއަން (އޭސީއެލްޔޫ) އާއި ލީގަލް ޑިފެންސް ފަންޑުން ހޯމަ ދުވަހުގެ ރޭ ހުށަހެޅި މައްސަލައެއް ހިމެނެއެވެ. މި މައްސަލައިގައި ބުނެފައިވަނީ ޓްރަމްޕްގެ ޢަމަލުތަކަކީ ޤާނޫނު އަސާސީއާ ޚިލާފު ކަންކަން ކަމަށެވެ.

އަންގާރަ ދުވަހު 18 ސްޓޭޓަކުންވެސް މިފަދަ މައްސަލައެއް ހުށަހަޅާފައިވެއެވެ. މި މައްސަލަތަކަކީ ޓްރަމްޕް އޭނާގެ މަޤާމާ ހަވާލުވުމާއެކު ސޮއިކުރި ރެކޯޑު އަދަދެއްގެ 26 އެގްޒެކެޓިވް އޯޑަރާ ގުޅިގެން ކުރިމަތިވާނެ ކަމަށް ބެލެވޭ ގިނަ ޤާނޫނީ ގޮންޖެހުންތަކުގެ ތެރެއިން ބައެކެވެ.

ޓްރަމްޕް ސޮއިކުރި އަމުރުތަކުގެ ތެރޭގައި އެމެރިކާގައި އުފަންވާ ކުދިންނަށް ރައްޔިތުކަން ދިނުމުގެ ސިޔާސަތު ބަދަލުކުރުމާއި، ދެކުނު ސަރަޙައްދުގެ ބޯޑަރުގައި ޤައުމީ ކުއްލި ނުރައްކަލުގެ ޙާލަތު އިޢުލާނުކުރުމާއި، ފެޑެރަލް ޑައިވަރސިޓީ ޕްރޮގްރާމްތައް އުވާލުމާއި، އަދި ޓްރާންސްޖެންޑަރ ފަރާތްތަކުގެ ޙައްޤުތައް ނުބަލައިގަތުން ހިމެނެއެވެ.

އޭސީއެލްޔޫގެ އިމިގްރަންޓްސް ރައިޓްސް ޕްރޮޖެކްޓްގެ ޑެޕިއުޓީ ޑިރެކްޓަރ ކޯޑީ ވޮފްސީ ބުނީ ރައްޔިތުކަމާ ގުޅޭ ޓްރަމްޕްގެ ނިންމުމަކީ ޤާނޫނު އަސާސީގެ 14 ވަނަ އިސްލާޙުން ކަށަވަރުކޮށްދޭ ޙައްޤުތަކާ ޚިލާފު ކަމެއް ކަމަށެވެ. އަދި މިއީ އެމެރިކާގެ އަސާސްތަކާ ޚިލާފު، އަނިޔާވެރި ޢަމަލެއް ކަމަށެވެ.

ކެލިފޯނިއާގެ އެޓަރނީ ޖެނެރަލް ރޮބް ބޮންޓާ ބުނީ ޓްރަމްޕް އޭނާގެ ދެވަނަ ދައުރު ފަށާފައިވަނީ ޤައުމުގެ އަސާސީ ޙައްޤުތަކެއް ނައްތާލައި، ޤާނޫނު އަސާސީއަށް އިޙްތިރާމް ނުކޮށް ކަމަށެވެ. އަދި ޓްރަމްޕާ ބައްދަލުކުރާނީ ކޯޓުގައި ކަމަށްވެސް ބުންޏެވެ.

ޓްރަމްޕްގެ އަމުރުގެ ދަށުން އެމެރިކާގައި އުފަންވާ ކުދިންގެ ތެރެއިން ޤާނޫނީ ހައިސިއްޔަތު ނެތް ބިދޭސީންނާއި ވަގުތީ ވާރކް ވީޒާގައި ތިބޭ މީހުންގެ ދަރިންނަށް އެމެރިކާގެ ރައްޔިތުކަން ނުދޭނެއެވެ.

މިކަމާ ގުޅިގެން ޤާނޫނީ ގޮތުން އުފެދިފައިވާ ސުވާލަކީ 1868 ވަނަ އަހަރު ފާސްކުރެވުނު ޤާނޫނު އަސާސީގެ 14 ވަނަ އިސްލާޙު މާނަކުރާނެ ގޮތެވެ. މި އިސްލާޙުގައި ބަޔާންކޮށްފައިވަނީ "އެމެރިކާގައި އުފަންވާ އަދި އެމެރިކާގެ ޤާނޫނީ އިޚްތިޞާޞްގެ ދަށުގައިވާ އެންމެހައި ފަރާތްތަކަކީ އެމެރިކާގެ ރައްޔިތުން" ކަމަށެވެ

މި މައްސަލައިގައި ދަޢުވާކުރާ ފަރާތްތަކުން ބުނާ ގޮތުގައި ޓްރަމްޕްގެ އަމުރަކީ ޤާނޫނު އަސާސީގެ މި މާއްދާއާ ސީދާ ފުށުއަރާ އަމުރެކެވެ. އަދި މިއީ އެމެރިކާގެ ޑިމޮކްރަސީގެ މައިގަނޑު އަސާސްތަކުގެ ތެރެއިން އެއް އަސާސް ނައްތާލުމަށް އަމާޒުކޮށްފައިވާ ފިޔަވަޅެއް ކަމަށް ފާހަގަކޮށްފައިވެއެވެ.

ވައިޓް ހައުސްގެ އިސް އޮފިޝަލުން ބުނާ ގޮތުގައި ޓްރަމްޕް އޭނާގެ ފުރަތަމަ ދުވަހު ނެރުނު 26 އެގްޒެކެޓިވް އޯޑަރުގެ އިތުރުން 16 މެމޮރަންޑަމާއި ޕްރޮކްލަމޭޝަން ވެސް ނެރެފައިވެއެވެ. މިއީ ޖުމްލަ 42 ރިޔާސީ ފިޔަވަޅެވެ.